Ovuhulela wa Joau 20:1-15
20 Ddimona anju watita wirimu wana txavi ya ntxela novaya,* vina wahikana mmadani kurenti enddimuwa.
2 Iyene ottidda nowa enddimuwa yowopiha, nowa yawale, oli Ddiabo vina Satana, ohinfugela mwari mwa vyaka 1.000.
3 Ohinvokela mutxelani novaya, ofuga ntxelaná vina omagawo na selu,* wila ananyengette vina attu a malogo ofiyedha wakwana vyaka 1.000. Vyaka eso dhigavira, iyene onele otapuliwa mwari mwa mudhidhi mung’onovi.
4 Ddihona mipaddo, abale agilatilevo avayiwa owodha wa ottonga. Vina ddihawona abale apiwe* mwaha wa ovaha onamoona wa Yezu vina sabwa ya ologa mwaha wa Mulugu, ddihawona abale vina ahebedhile enama yowopiha nne nladdaniho naye, vina ahipidiwe ezinddiyelo ya enama ejile vakoveni nne mmadani. Awene ahiyelela okalawo vina alamulela na Kristu mwari mwa vyaka 1.000.
5 (Attu ena akwile, keyeleli okalawo mpaka ovira vyaka 1.000.) Oku ku ovenyihiwa mukwani woroma.
6 Ohagalala vina okoddela babale otene anavenyihiwe mukwani mwari mwa ovenyihiwa mukwani woroma, mwa abuwene okwa wanawili kunapatta mbwenyi anele okala anamakutta a Mulugu vina a Kristu, anele olamulela na iyene mwari mwa vyaka 1.000.
7 Dhawene, dhigavira vyaka 1.000, Satana onele ofuruliwa mburo ofugeliwiye,
8 iyene onele obudduwa wila anyengette malogo a komo dhonayi dha elabo, kuloga, Gog wa Magog, wi àtugumanihedhe oraba koddo, muttengo wawa oli ninga mutxesa wa mbara.
9 Awene abalaleyela mwilaboni mwetemwene vina arija mburo wa akoddeli na sidadi yokweleya. Mbwenyi otita motto wirimu vina ohatolotxa.
10 Ddiabo waanyengetta ovokeliwa muttaddani ya motto na enxofre, mwenemo mwaponyedhiwe enama yowopiha vamodha na namavuhulela wottambi, vina awene anele otabutxiwa okala n’okala-wene, mutana na mattiyu.
11 Mmalelani ddihona mpaddo munddimuwa wotxena, ddimona vina Ole wagilatilevo. Erimu na elabo dhannimuttawa vina kuwoneyile mburo wi dhikalevo.
12 Ddihawona abale akwile, anddimuwa na aima, bemelile vasogorho va mpaddo vina rolu dhifuguliwa. Mbwenyi rolu yina yafuguliwe yali rolu ya egumi. Abale akwile attongiwa dhifwariwaga esile dhilebiwe muroluni mowiwanana na merelo awa.
13 Vina bara ehawiyihedha abale akwile mwenemo, vina okwa na Masiye* ahawiyihedha abale akwile mwenemo, aboyá attongiwa muttu-muttu mowiwanana na merelo aye.
14 Okwa na Masiye* dhivokeliwa vanttaddani na motto. Nttadda na motto nintonya okwa wanawili.
15 Ottiya ejo, ole wahilebeliwe nzina naye munivuruni na egumi, ovokeliwa vanttaddani na motto.
Manota
^ Na egregu, “abismu.”
^ Obe, “ezinddiyelo.”
^ Na egregu, “abale apiwe na matxaddo.”
^ Kang’ana Mazu Atapuleliwe.
^ Kang’ana Mazu Atapuleliwe.