Ovuhulela wa Joau 21:1-27
21 Ddihona erimu eswa na elabo eswa, vowi erimu yawale na elabo yawale dhahivira, bara vina kiyaliwo.
2 Ddihona vina sidadi yokoddela, Jeruzalemi Muswa, atitaga wirimu, adhaga wa Mulugu, wabalile ninga muteliwi, okoddelihiwe wi amwakele mamunaye.
3 Venevo, ddihiwa lizu noliba nadha vampaddoni niraga: “Moone! Musasa wa Mulugu oli vari va attu, iyene onele okalaga na awene, vina awene anele okala nlogo naye. Mwinyene Mulugu onele okala na awene.
4 Mulugu onele okuputta mintori dhotedhene dha mmentoni mwawa, kunakalewo vina okwa, okubanya, wunla na wiwa opa. Dhilobo dhawale dhimala ovira.”
5 Ole wagilatile vampaddoni ohiloga: “Moone! Dhilobo dhotedhene miyo ddinokaliha dhiswa,” vina ohenjedhedha: “Kaleba, vowi mazu aba bororomeleya* vina b’ebaribari.”
6 Iyene oddaddela: “Dhimala wakwanihedheya! Miyo ddili Woroma vina Womariha,* omaromelo vina omagomelo. Ole wotene onakane nttona ddinele omvaha manje a fukuwa ya manje a egumi ahipitxelaga elo.
7 Wotene ole onapemberhe onele wakela dhilobo esi; miyo ddinele okala Mulugu waye, iyene onele okala mwanaga.
8 Mbwenyi abale ahilibile murima, ahinna nroromelo, attu onyakuwa anira dhotakala, atimbwini, anira dha ogonihana wonyakuwa,* anira dhokwiri, anebedha dhingamuttu vamodha na attambi otene anele okaana mburo wawa vattaddani vanttida motto na enxofre. Eji entonya okwa wanawili.”
9 Anju mmodha mwa abale atanu na eli attukulile matijela matanu na meli adhalile na vizini tanu na bili dhomariha, odha oddaddela: “Kadhawuno, ddinele oulagiha muteliwi,* kuloga mwadhi wa Mwana-Nibila.”
10 Anju oddo oddittukula na guru dha muya wokoddela, oddidhowana vamwangoni munddimuwa vina wolapa, iyene oddilagiha sidadi yokoddela ya Jeruzalemi etitaga wirimu, edhaga wa Mulugu,
11 vina na nttittimiho na Mulugu. Ozerimela waye waladdana na ozerimela wa nlugu nattima enddimuwa vaddiddi, ninga nlugu na jaspe ninzerimela ninga kristal.*
12 Sidadiyá yahikana ngome enddimuwa vina yolapa, yahikana misuwo 12 dhinddimuwa vina musuwo mmodha-mmodha wahikana anju mmodha. Misuwodhá dhihilebiwa mazina a mahimo 12 a ana Izrayel.
13 Misuwo miraru dhang’aneli omadhelo wa nzuwa,* miraru omadhulu,* miraru ogusuni,* miraru omaddowelo wa nzuwa.*
14 Ngome ya sidadiyá yakana vina malugu 12 a alisersi, vadhulu va nlugu nimodha-nimodha valebiwa mazina a arumiwi 12 a Mwana-Nibila.
15 Anju waloga na miyo wahittiddela mpimo, murazi wa woru wila apimena sidadi, misuwo dhinddimuwa vina ngomeyá.
16 Dhipaddi dhonayi dha sidadiyá dhela oligana, elapi na egwagwanyi dhela oligana. Anjuyá oddo opima sidadi na murazi: Yanna makilometuru 2.220,* elapi, egwagwanyi na munuwelo dhela oligana.
17 Anju oddo opima vina ngome: Yanna kovadu 144,* efwariwaga mpimo wa attu, oli vina mpimo wa anju.
18 Ngomeyá yasasanyiwe na nlugu na jaspe, sidadiyá yali ya woru yokoddeletxa ninga viduru yowoneyela.
19 Alisersi wa ngome ya sidadiyá wasasanyiwe na malugu attima ottiyana-ttiyana: Alisersi woroma wali wa nlugu na jaspe, wanawili na safira, wanoraru na kalsedoniya, wanonayi na esmeralda,
20 wanotanu na sardonika, wanotanu na nimodha na sardiyu, wanotanu nowili na krizolito, wanotanu noraru na berilu, wanotanu nonayi na topaziyu, wanokumi na krizoprazu, wanokumi na nimodha na jasintu, wanokumi na wili na ametista.
21 Vina misuwo 12 dhinddimuwa dhasasanyiwe na perola* 12, musuwo mmodha-mmodha wasasanyiwe na perola modha. Vina rampa enddimuwa ya sidadi yali ya woru yokoddeletxa ninga viduru yowoneyela.
22 Musidadimwa, kaddonilemo mparha, vowi Yehova Namawodha-wodha vamodha na Mwana-Nibila bu mparhayá.
23 Sidadiyá kili yofuneya omoneyiwa na nzuwa obe na mweri, sabwani nttittimiho na Mulugu ninomoneyamo, vina txezayamo ddi Mwana-Nibila.
24 Attu a malogo anele weddana txeza yaye, vina amwene a mwilaboni anele ottukulela nttittimiho nawa musidadimwa.
25 Misuwo dhinddimuwa dha sidadi ejo, txipo kadhinafugiwege na mutana, sabwani kamunakalege omattiyu.
26 Attu a malogo otene anele odhowanamo nttittimiho vina nriho nawa.
27 Vano, kamunattukuleliwemo elobo yokwaruliha, vina ole onkosa dhonyakuwa na dhottambi txipo kanavolowemo, anavolowemo babale alebiwe mazina awa munivuruni na egumi na Mwana-Nibila.
Manota
^ Obe, “bokuluveleya.”
^ Na egregu, “Alfa vina Omega.” Woroma vina Womariha. Mazu aba meli “Alfa vina Omega” antonya nzu noroma na nomariha mu alfabetuni wa egregu.
^ Kang’ana Mazu Atapuleliwe.
^ Obe, “noiva.”
^ Nlugu notxena vina nawoneyela.
^ Obe, “lesti.”
^ Obe, “norti.”
^ Obe, “o sul.”
^ Obe, “owesti.”
^ Na egregu, “Estadiyu 12.000.” Estadiyu modha yankaana meturu owakwana 185.
^ Meturu owakwana 64.
^ Nlugu nattima enddimuwa.
