Ovuhulela wa Joau 22:1-21
22 Anju odditonyihedha mwinje wa manje a egumi, okoddela ninga kristal* abudduwa vampaddoni va Mulugu, na va Mwana-Nibila,
2 mwinjeyá wavira vari va rampa enddimuwa ya sidadi. Dhipaddi dhobili dha mwinjeyá dhakana miri dha egumi dhabala milima dila 12, vina mweri-mweri dhambala milima, mataba a miridhá annavulumutxa attu a malogo.
3 Kunakalewo vina obure, vano mpaddo wa Mulugu na wa Mwana-Nibila onakale musidadimwá, vina adhari aye anelege omuttiddela Mulugu mabasa okoddela.
4 Aboyá anele wona kove yaye, vina nzina naye ninakale vakoveni vawa.
5 Kunakalewo vina omattiyu, awene kanafune vina txeza ya panti nne txeza ya nzuwa, vowi Yehova Mulugu agannamoneya na txeza yaye, vina awene anele olamulela okala n’okala-wene.
6 Iyene oddaddela: “Mazu aba, b’ororomeleya* vina b’ebaribari. Ndde, Yehova Mulugu wavudheleli anamavuhulela, omuruma anju waye wila àtonyihedhe adhari aye esile dhinfuna wireya mohigonela.
7 Kavuruwana! Ddinodha momaguva. Wohagalala ddule oniwelela mazu ovuhuleliwa ali muroluni mpu.”
8 Wali miyo, Joau wewa vina wona dhilobo esi, mwiwalemi, vina monilemi ddikokora osogorho wa anju wadditonyihedha dhilobodhá eso wila ddimwebedhe.
9 Mbwenyi anju oddo oddaddela: “Porhe! Kukose ejuwene, miyo ddili bahi mudhari ninga weyo vina wa abalawo anamavuhulela na wa abale aniwelela mazu a rolu eji. Omwebedhe Mulugu.”
10 Iyene oddaddela vina: “Kuvite mazu a ovuhuleliwa ali muroluni mpu, vowi mudhidhiyá opimeleliwe ohaddamela.
11 Ole oli wohiligana adhowegenavi ohiligana waye, vina ole oli wonyakuwa adhowegenavi onyakuwa waye, mbwenyi ole oli woligana eddegenavi oligana waye, vina ole oli wokoddela vamentoni va Mulugu enjedhedhegevi okoddela waye vamentoni va Mulugu.
12 “‘Kavuruwana! Ddindha momaguva vina yottuva enavahemi eli na miyo, wila ddimuttuvele muttu ddi muttu mowiwanana na merelo aye.
13 Miyo ddili Woroma vina Womariha,* ddili omaromelo vina omagomo.
14 Ohagalala babale anfula dhabalo dhawa dholapa wi akaane owodha wa odhowa vali miri dha egumi vina wa ovolowa aviraga va misuwo dhinddimuwa dha sidadi.
15 Otakulu aliwo ba anabwa,* abale anira dhokwiri, abale anira dha ogonihana wonyakuwa,* atimbwini, anebedha dhingamuttu vina otene abale ankwela vina anira dh’ottambi.’
16 “‘Miyo, Yezu, ddimuruma anju waga wi auvaheni onamoona wa dhilobo esi wila milogo dhipurelemo. Miyo ddili mutxitxi vina ziza na Davidi vina neneri eng’animela na membesi.’”
17 Muya wokoddela na muteliwi,* anologa: “Mudhe!” Ole oniwa aloge: “Mudhe!” Ole onna nttona adhe; onfuna adhe amwe manje a egumi ahipitxelaga elo.
18 “Ddinowawaddela otene abale aniwa mazu ovuhuleliwa a rolu eji: Akala muttu onowenjedhedha dhilobo esi, Mulugu onele omwenjedhedha vizini dhilebiwe muroluni mpu,
19 vina akala muttu onoburutxavo elobo-txilobo ya mazu a rolu ya nivuhulo ntti, Mulugu kanamurumelihe wakela dhilobo dhapama dhilebiwe muroluni mpu, kuloga kanamuttiye oja milima dha miri dha egumi vina kanamuttiye ovolowa sidadi yokoddela.
20 “Ole omvaha onamoona wa dhilobo esi onologa: ‘Ndde, ddinodha n’owaguva.’”
“Amen! Mudhe, Nabuya Yezu.”
21 Mahala manddimuwa a Nabuyehu Yezu akale na akoddeli.
Manota
^ Nlugu nokoddela vina nowoneyela.
^ Obe, “okuluveleya.”
^ Na egregu, “Alfa vina Omega.” mazu aba meli Alfa vina Omega, antonya nzu noroma vina nomariha mu alfabetuni wa egregu.
^ Kuloga, abale anira dhilobo dhinimunyakuwela Mulugu.
^ Na egregu, porneya. Kang’ana Mazu Atapuleliwe.
^ Obe, “noiva.”