Ovuhulela wa Joau 3:1-22
3 “Anju wa mulogo w’o Sardes omulebele dhahi: Dhilobo esi onloga ddule onna muya mitanu na minli dha Mulugu vina vineneri tanu na bili: ‘Ddinoziwa merelo awo vina ddinoziwa wi weyo onoziwiwa* ninga oliwo, mbwenyi oli wokwene.
2 Okale wovyang’anela, olibihe ehalilena weyo yafuna okwa, sabwani ddihona wi merelo awo kakwanile* vamentoni va Mulugu waga.
3 Nona wubuwelege dhakeliliwe, dhiwaliwe, okoyegevi esuwene vina otxinuwe, ddinouwaddela ogahikale mento ddinadhe ninga mbava, nne kunaganyedhe mudhidhi onfunimi odha.
4 “‘Vano, akalawo ena vari vawo o Sardes ahitakalihile guwo dhawa vina awene anele wedda na miyo na guwo dhotxena, sabwani anofwanyelela.
5 Ole onapemberhe, onabale dhahene na guwo dhotxena vina miyo kaddinafudhemo nzina naye munivuruni, mbwenyi ddinele wubuwela nzina naye vamentoni va Babaga vina vamentoni va anju aye.
6 Onna maru, ewe esile dhinloga muya wokoddela, addelaga milogo.’
7 “Anju wa mulogo w’o Filadélfia omulebele dhahi: Dhilobo esi onloga ddule oli wokoddela, oli webaribari, ole onna txavi ya Davidi, iyene agafugula kawo onwodha ofuga vina agafuga kawo onwodha ofugula:
8 ‘Ddinoziwa merelo awo—koona! Ddittiya musuwo wofuguwene osogorho wawo ohinwodha muttu mwina ofuga, ddihiziwa wi okaana ewodhelo eng’onovi, ohikoya nzu naga vina ohoniha ororomeleya na nzina naga.
9 Moone! Ddinowakosiha abale a sinagoga* ya Satana anloga wi Ayuda oku ahili, mbwenyi anzivala, adhe akokore vamentoni vawo, vina ddinele waziwiha wi ddinoukwela.
10 Vowi ohikoya nzu mwaha wa ovilela waga,* miyo vina ddinele oukoya mudhidhi wa wehiwa onfuna wafwanya attu otene a velaboni ya vati, wila otene ankala mwilaboni ehiwe.
11 Ddindha momaguva. Odidelevi ottiddela enna weyo wi ahikalewo muttu anauwakiye nlivo* nawo.
12 “‘Ole onapemberhe—ddinele omukaliha ntxikwa mumparhani mwa Mulugu waga, iyene txipo kanavenyemo, ddinele omuleba nzina na Mulugu waga vina nzina na sidadi ya Mulugu waga, Jeruzalemi Muswa, ontita wirimu wa Mulugu waga vina ddinele omuleba nzina naga niswa.
13 Onna maru, ewe esile dhinloga muya wokoddela, addelaga milogo.’
14 “Anju wa mulogo w’o Laudiseya omulebele dhahi: Dhilobo esi onloga ddi Amen, oli munamoona wororomeleya vina webaribari, oli yottanddiwa yoroma ya Mulugu:
15 ‘Ddinoziwa merelo awo, ddiziwa wi weyo kuli woridha nne woviha. Ddigahiziveliwa weyo kokala woridha obe woviha.
16 Vano, vowi weyo oli vari-vari, kunridha nne kunviha, ddinele outtapika mwano mwaga.
17 Vowi weyo onologa: “Ddili mureli, ddikaana mafumo menjene, vina kaddinjombeliwa elo,” mbwenyi kunziwa wi oli wantowa, musegedheyi, muyelegi vina oli yovi.
18 Ddinouvaha malago a ogula na miyo woru otxittikiwe na motto, wila okale mureli, guwo dhotxena wila wabale, ohikale yovi ototeye manyazo vina murobwe wa mmentoni wila wonege pama.
19 “‘Otene abale anakwelimi, miyo ddinowasaddeya vina ddinowalaga. Nona olabe na ntidi vina otxinuwe.
20 Kewani! Ddili wowimelene vamusuwo vina ddinokopela. Akala muttu onowiwa lizu naga vina afugula musuwoyá, ddinele ovolowa mba mwaye vina ddinele oja siyari na iyene, iyene onele oja na miyo.
21 Ole onapemberhe, ddinele omuttiya ogilati na miyo vampaddoni vaga dhahene ninga miyo opemberhile ddigilati vina vamodha na Babaga vampaddoni vaye.
22 Onna maru ewe esile dhinloga muya wokoddela, addelaga milogo.’”
Manota
^ Obe, “ovuwa.”
^ Obe, “kaddifwanyile mabasa awo owakwanene.”
^ Kang’ana Mazu Atapuleliwe.
^ Obe txino, “ofwara yotagiha yaga mwaha wa ovilela.”
^ Na egregu, “kara.”
