Ovuhulela wa Joau 5:1-14
5 Miyo ddihona rolu munladani noja na Ole wagilatile vampaddoni yalebiwe oku-n’oku* vina yamagiwe pama na selu* tanu na bili.
2 Ddimona vina anju wa guru walaleya na lizu noliba dhahi: “Bani onfwanyela ofugula rolu vina okakarula seludhá?”
3 Mbwenyi kaaliwo muttu wirimu obe velaboni ya vati nne vati va elabo, wawodha ofugula rolu ejile obe wona dhalebiwemo.
4 Venevo miyo ddiroma wunla vaddiddi sabwani kaaliwo muttu woniwe wi onofwanyelela ofugula roluyá obe wona dhalebiwemo.
5 Mbwenyi, munddimuwa mmodhayavó oddaddela: “Kuwunle. Kang’ana! Poddogoma wa nihimo na Judá wa ziza na Davidi, opemberha nona iyene onowodha ofugula roluyá na seludhá tanu na bili.”
6 Vari va mpaddo na va dhottanddiwa nayi dhinna egumi, vina vari va anddimuwa, miyo ddimona Mwana-Nibila wowimelene, wakala ninga wapiwe, iyene wahikana manyaga matanu na meli na mento matanu na meli, mentoyá antonya muya mitanu na minli dha Mulugu, esuwene dhirumiwe elabo yotene ya vati.
7 Momaguva-mwene iyene osusa vina ottukula rolu yali nlada noja na Ole wagilatile vampaddoni.
8 Muttukuleliye roluyá, dhottanddiwa dhonayi dhinna egumi, vamodha na anddimuwa 24 akokora osogorho wa Mwana-Nibila, otene ahikana arpa* mmodha-mmodha na matijela a woru adhalile lubani. (Lubani ontonya malobelo a akoddeli.)
9 Vina anowiba jibo eswa, alogaga: “Nyuwo Nabuya munofwanyela ottukula rolu vina ofugula seludhá, vowi mwahipiwa vina na nikami nenyu muhagula attu a mahimo otene, a vilogelo, a malogo vina a dhilabo dhotene wi akale a Mulugu,
10 muhawira attu abo amwene vina anamakutta a Mulugu wehu, awene anele olamulela elabo ya vati.”
11 Miyo ddihang’ana vina ddihiwa lizu na anju enjene arugunuweli mpaddoyá, lizu na dhottanddiwa dhinna egumi vina na anddimuwa, muttengo wawa kuwakontareya, wali wa matxikwi na matxikwi,
12 awene anloga na lizu noliba dhahi: “Mwana-Nibila opiwe onofwanyelela wakela owodha, dhorela, zelu, guru, nriho, nttittimiho na mareliho.”
13 Vina ddihiwa dhottanddiwa dhotedhene dha wirimu, dha velaboni ya vati, dha vati va elabo, dha mbara, ndde dhotedhene dhilimo dhilogaga: “Ole ogilatile vampaddoni vamodha na Mwana-Nibila avahiwe mareliho, nriho, nttittimiho, owodha, okala n’okala-wene.”
14 Dhottanddiwa dhonayi dhinna egumi dhanloga: “Amen!” Vina anddimuwa akokora vina amwebedha Mulugu.
Manota
^ Na egregu, “mwari na otakulu.”
^ Obe, “ezinddiyelo.”
^ Arpa, yali epano yobiwa enladdana na viyola wa masaka abano.