Ovuhulela wa Joau 6:1-17
-
Mwana-Nibila onofugula selu tanu na modha dhoroma (1-17)
-
Namapemberha bali vakavaloni wotxena (1, 2)
-
Ole ogilatile vakavaloni ya kori ya motto onovenyihamo murenddele (3, 4)
-
Ole ogilatile vakavaloni woriba onodhana dala (5, 6)
-
Ole ogilatile vakavaloni wamunddura onkuweliwa Okwa (7, 8)
-
Abale apiwe anowoniwa mutxiddo mwa ebuwa (9-11)
-
Ottekenyeya onddimuwa wa mattaka (12-17)
-
6 Miyo ddihona mudhidhi wafugulile Mwana-Nibila selu* yoroma mwa esile tanu na bili vina ddihiwa yottanddiwa modha enna egumi, mwa esile nayi elogaga na lizu ninga na oruma wa jayi, dhahi: “Kadhawuno!”
2 Vina ddimona kavalo wotxena, ole wagilatile vakavaloniva wahikana ura, ovahiwa mwereko, iyene obudduwa wopemberhene wila akwanihe opemberha waye.
3 Mufuguleliye selu* yanawili, ddihiwa yottanddiwa yanawili enna egumi elogaga: “Kadhawuno!”
4 Obudduwa kavalo mwina wanna kori yamotto, ole wagilatile vakavaloniva ovahiwa owodha wa ovenyihamo murenddele mwilaboni wila attu apegena mukalelani vina ovahiwa supadda ninddimuwa.
5 Mufuguleliye selu yanoraru ddihiwa yottanddiwa yanoraru enna egumi elogaga: “Kadhawuno!” Venevo ddimona kavalo woriba, ole wagilatile vakavaloniva wahittiddela balansa mmadani mwaye.
6 Ddihiwa oruma, waladdana na lizu naloga vari va dhottanddiwa nayi dhinna egumi niraga dhahi: “Kilu * modha ya tirigu enkala denáriyu* modha, kilu ttaru dha sevada enkala denáriyu modha, kumunonge azeiti na vinyu.”
7 Mufuguleliye selu yanonayi ddihiwa lizu na yottanddiwa yanonayi enna egumi, naloga: “Kadhawuno!”
8 Ddimoona kavalo wa munddura, ole wagilatile vakavaloniva wahikana nzina nakuweliwa Okwa. Vina Masiye* anninfwara munddunimwa, avahiwa owodha wa weddiha epaddi yanonayi ya elabo wila àpemo attuyá na supadda nolapa, na dala, na ezini vina na dhinama dhowopiha dha mwini.
9 Mufuguleliye selu yanotanu, ddihona mutxiddo mwa ebuwa egumi* ya abale apiwe mwaha wa nzu na Mulugu vina mwaha wa ovaha onamoona.
10 Awene ahikuwa na lizu noliba: “Mpaka mudhidhi gani, nyuwo Nabuya Mwinya wa dhotedhene, wokoddela vina webaribari, vanagonelinyu wattonga abale ankala velaboni ya vati vina wawirela ntxiga mwaha wa nikami nehu nikuttulilani?”
11 Vina Muttu-muttu ogaweliwa yabalo yotxena vina yolapa, vina ahaddeliwa wi arome ovuma mudhidhi mwina mung’onovi, ofiyedha wakwana muttengo wa adhari akwawa vina abalawa afuna opiwa dhahene ninga mwapeliwe awene.
12 Miyo ddihona mufuguleliye selu yanotanu na nimodha, opadduwa ottekenyeya onddimuwa wa mattaka, nzuwa niriba ninga guwo yoriba,* mweri wetene okala ninga nikami,
13 vina vineneri dha wirimu dhimottela velaboni ya vati, dhahene ninga mfigera ommottiha figu dhaye dhiti ogattekenyiwa na pevo enddimuwa.
14 Erimu efunyeya ninga rolu vina erimela, myango dhotene na suwa dhotedhene dhivenyihiwa mmimburoni mwawa.
15 Venevo amwene a velaboni ya vati, anddimuwa, asogorheli a anyakoddo, areli, attu oliba, adhari otene, vina afuru otene avitala mugurugudhani na mmaluguni a myango.
16 Anloga na myangodhá vina na maluguyá: “Kanimotteleni, munivite wila Ole ogilatile vampaddoni ahinone vina ninafwanyiwe owali wa Mwana-Nibila,
17 sabwani siku ninddimuwa na owali wawa nifiya, bani onwodha ovuneya?”
Manota
^ Obe, “ezinddiyelo.”
^ Obe, “ezinddiyelo.”
^ Obe, “lituru.”
^ Kobiri ya parata ya akadda Roma. Kang’ana Mazu Atapuleliwe.
^ Kang’ana Mazu Atapuleliwe.
^ Txino ninaddiwana nikami ninkaliha egumi nakuttuliwa waddamana na ebuwa. Kang’ana Mazu Atapuleliwe.
^ Na egregu, “muruno wa moya.” Txino moya wa ng’ombe.