Ovuhulela wa Joau 7:1-17
7 Mmalele eso ddihawona anju anayi emelile komo dhonayi dha elabo, battidelile pama pevo dhonayi dha elabo wila pevoyá enobele elabo, bara nne miri.
2 Ddimona anju mwina adhagana omadhelo wa nzuwa na selu ya Mulugu oliwo; vina iyene okuwa na lizu noliba awaddelaga anju anayi avahiwe owodha wa ononga elabo, na bara,
3 alogaga: “Kamunonge elabo, bara nne miri mpaka iyo omala wawika selu* vakoveni adhari a Mulugu wehu.”
4 Venevo ddihiwa muttengo wa abale ekiwe selu, wali wa 144.000 aburutxiwe mwa mahimo otene a ana Izrayel:
5 Nihimo na Judá ekiwe selu attu 12.000;nihimo na Ruben 12.000;nihimo na Gadi 12.000;
6 nihimo na Azer 12.000;nihimo na Naftali 12.000;nihimo na Manasé 12.000;
7 nihimo na Simeau 12.000;nihimo na Levi 12.000;nihimo na Isakár 12.000;
8 nihimo na Zebulau 12.000;nihimo na Jozé 12.000;nihimo na Benjami ekiwe selu attu 12.000.
9 Mmalele eso, miyo ddihona muttitti munddimuwa wa attu ahawodheya okontariwa, a vilabo dhotene, mahimo otene, malogo otene vina dhilogelo dhotene, emelile osogorho wa mpaddo vina osogorho wa Mwana-Nibila, abalile dhabalo dholapa, dhotxena vina ahittiddela mmadani mwawa makubari a minddu.
10 Awene ankuwa na lizu noliba, alogaga: “Ovuneya wehu ondha wa Mulugu wehu, ogilatile vampaddoni vina ondha wa Mwana-Nibila.”
11 Anju otene àli owimelene arugunuwelaga mpaddo vina anddimuwa na dhopaddutxiwa nayi dhinna egumi, awene akokora, ahitibela kove vati osogorho wa mpaddo vina amwebedha Mulugu,
12 alogaga: “Amen! Ovuwa, nttittimiho, ononelamo, otamalela, nriho, owodha vina guru avahiwe Mulugu wehu okala n’okala-wene. Amen.”
13 N’eji munddimuwa mmodha oddivuza: “Aba bani, abalile dhabalo dholapa, dhotxena vina adhile wuvi?”
14 Dhahene miyo ddimwakula momaguva: “Nabuya waga, onziwa ddi nyuwo.” Iyene oddaddela: “Aba babale ambudduwa mugoyini enddimuwa, awene afula dhabalo dhawa dholapa vina atxeniha na nikami na Mwana-Nibila.
15 Nona awene ali osogorho wa mpaddo wa Mulugu, vina anomuttiddela mabasa okoddela mutana na mattiyu mumparhani mwaye; vina Ole ogilatile vampaddoni onele wattanikela musasa waye vadhulu vawa.*
16 Kanakane vina dala, kanakane vina nttona, vina nne nzuwa nne oviha onddimuwa kunatabutxege,
17 sabwani Mwana-Nibila oli vari va mpaddo onele wakumbuza vina onele wattukulela vali fukuwa dha manje a egumi. Mulugu onele okuputta mintori dhotedhene dha mmentoni mwawa.”
