Ovuhulela wa Joau 8:1-13
8 Mudhidhi ofuguliliye selu* yanotanu nawili, wirimu omaliwa noo mwari mwa mitala 30.
2 Venevo ddihawona anju atanu na eli ali owimelene vamentoni va Mulugu, vina avahiwa aparhaza atanu na eli.
3 Ofiyavo anju mwina, wattiddelile yobo ya woru munddumeyiwa lubani vina ohimela osogorho wa ebuwa; anju oddo ovahiwa muttengo mwinjene wa lubani vamodha na malobelo a akoddeli wi aperheke vebuwani ya woru eli osogorho wa mpaddo.
4 Witxi wa lubani wabudduwa mmadani mwa anju vamodha na malobeloyá a akoddeli dhihiwela wa Mulugu.
5 Mbwenyi, momaguva-mwene anjuyá ottukula yobo munddumeyiwa lubani, odhalihamo motto wa vebuwani, ovokela velaboni ya vati. Nowidhawo ohiweya oruma wa jayi, malizu, ozerima wa jayi vina ottekenyeya wa mattaka.
6 Anju abale atanu na eli anna aparhaza atanu na eli avisasanyedha wi obe.
7 Anju woroma omoba parhaza waye. Vasogorhova vahoneya maralala, vina motto wataganyiheyile na nikami, esodhá dhivokeliwa velaboni ya vati, epaddi yanoraru ya elabo eddumeyiwa, epaddi yanoraru ya miri eddumeyiwa vina mani meti otene addumeyiwa.
8 Anju wanawili omoba parhaza waye. Vina elobo yaladdana na mwango munddimuwa onttida, evokeliwa mbara. Epaddi yanoraru ya bara esadduwa bikala nikami;
9 vina epaddi yanoraru ya dhopaddutxiwa dhinna egumi dhali mbara dhikwa, vina epaddi yanoraru ya apaporo etolotxiwa.
10 Anju wanoraru omoba parhaza waye. Wirimu omotta neneri enddimuwa yattida ninga panti, neneriyá emottela epaddi yanoraru ya minje vina emottela fukuwa dha manje.
11 Nzina na neneriyá ninkuweliwa Owawa;* venevo epaddi yanoraru ya manje ahisadduwa bakala owawa, attu enjene akwa mwaha wa manjeya sabwani ahikala owawa.
12 Anju wanonayi omoba parhaza waye. Edhá opattiwa epaddi yanoraru ya nzuwa, epaddi yanoraru ya mweri vina epaddi yanoraru ya dhineneri, wila epaddi yanoraru ya dhilobo esi ekale mwiddimani vina ohikale txeza epaddi yanoraru ya mutana na epaddi yanoraru ya mattiyu.
13 Miyo ddihona, vina ddihiwa epungu yavava odhulu-dhulu elogaga na lizu noliba dhahi: “Antowa, antowa, antowa babale ankala velaboni ya vati sabwa ya oruma wa maparhaza meena ahalile anfuna wobiwa momaguva na anju araru!”
