Ovuhulela wa Joau 9:1-21
9 Anju wanotanu omoba parhaza waye. Vina ddihona neneri edhile wirimu bimottela velaboni ya vati, Mulugu ovaha neneri ejo txavi ya ntxela novaya.*
2 Neneriyá efugula ntxela novaya,* muntxelanimwa mubudduwa witxi ninga witxi ombudduwa mfornuni enddimuwa, nzuwa na pevo dhiriba mwaha wa witxi wabudduwa mutxelanimwa.
3 Muwitxinimwa mubudduwa mabalaga amwadheyele mwilaboni, vina avahiwa owodha, owodha wakakene onna awenye a velaboni ya vati.
4 Ahaddeliwa wi ahinonge mani a mwilaboni, ahinonge miri dhiti vina na miri dhina; mbwenyi ànonge bahi attu abale ahinna selu* ya Mulugu vakoveni.
5 Mabalagayá ahittiyiwa wi atabutxe attuyá abo mwari mwa myeri mitanu, ottiya wapa; otabutxa wawa wali ninga otabuwa onkaana muttu agalumiwa na wenye.
6 Masiku abo attu anelege otamela okwa, mbwenyi kanafwanye, anelege wunlela okwa, mbwenyi okwawa onele wattawa.
7 Ekalelo ya mabalagayá yali ninga ya akavalo asasanyeliwe koddo; vamusorhoni vawa vahikala elobo yaladdana na mwereko wa woru, vina kove dhawa dhakala ninga kove dha attu,
8 mbwenyi àkana mattitti ninga mattitti a ayana. Meno awa àli ninga a apoddogoma,
9 àhabala vapetoni vawa yabalo, ninga yabalo ya mujila. Vina oruma wa makapwa awa wakala ninga oruma wa karo dhigawetiwaga na akavalo attamagelaga okodddoni.
10 Ottiya ejo, awene àkana mwila onna mbula niga dha wenye, vina owodha wawa wa watabutxana attu abo mwari mwa myeri mitanu oli omwilani.
11 Awene akaana mwene, anju wa ntxela novaya.* Na elogelo ya Ebrayiko nzina naye ddi Abaddon,* mbwenyi na egregu nzina naye ddi Apolion.*
12 Moone! Ntowa noroma nihivira mbwenyi esi dhigamala onokala ntowa dila bili.
13 Anju wanotanu na mmodha omoba parhaza waye. Vina ddihiwa lizu nadha vari va manyaga ali vebuwani ya woru eli vamentoni va Mulugu,
14 alogaga na anju wanotanu na mmodha wanna parhaza waye: “Kaatapule anju onayi ali omagiwene vakuvi na mwinje Eufrate.”
15 Venevo ahitapuliwa anju abale onayi asasanyedheliwe wora, labo, mweri vina yaka wi yape epaddi yanoraru ya attu.
16 Miyo ddihiwa muttengo wawa; muttengo wa anyakoddo aweddiha akavalo wali wa amiliyau 200.
17 Vina miyo ddihawona akavalo na anyakavaloyá na mukalelo obu: Anyakavaloyá àkana yabalo ya vapetoni ya mujila, ya kori yofila ninga motto, ya mburuwe* vina ya njano ninga enxofre; misorho dha akavaloyá dhali ninga misorho dha apoddogoma vina mwano mwawa mwambudduwa motto, witxi na enxofre.
18 Epaddi yanoraru ya attu ahikwa na vizini esi ttaru, motto, witxi na enxofre dhabudduwa mwano mwawa.
19 Vowi owodha wa akavalo aba oli mwano na omwilani, sabwani mwila wawa oli ninga nowa vina okaana musorho, na mwila obo anowatabutxana attu.
20 Mbwenyi attu ena ahikwile na vizini esi katxinuwile na mabasa a mada awa, kattiyile wawebedha adomonyo vina dhingamuttu dha woru, dha parata, dha safurhi, dha malugu na dha miri dhihinwodha wiwa, nne wona, nne wedda.
21 Attu abo katxinuwile na opanga wawa, kattiyile okwiri wawa, ogonihana wonyakuwa* vina wiya wawa.
Manota
^ Na egregu, “abismu.”
^ Na egregu, “abismu.”
^ Obe, “ezinddiyelo.”
^ Na egregu, “abismu.”
^ Nintapulela, otoloxa.
^ Nintapulela, namatolotxa.
^ Obe, “azuli.”
^ Na egregu, porneya. Kang’ana Mazu Atapuleliwe.
