Akadda Roma 1:1-32
1 Eji karta ya Paulo mudhari wa Yezu Kristu okuweleliwe okala murumiwi, vina osakuleliwe olaleya miselu dhapama dha Mulugu,
2 dhapikirheliye wale anamavuhulela aye Mmaleboni okoddela,
3 miseludhá dhinloga mwaha wa Mwanaye odhile mu zizani* mwa Davidi,
4 eji jinoniha wi iyene Mwana Mulugu sabwani Mulugu ohilabihedha muya waye wokoddela wila anvenyihe mukwani—ndde, Yezu Kristu Nabuya wehu.
5 Mwaha waye Mulugu onilagiha mahala aye ohipimeya mwa onisakula ninga arumiwi wi nattukulele attu a malogo otene omuroromela vina wiwelela nzina naye,
6 vari va malogo abo nyuwo vina mukuweliwa wi mukale anamafwara a Yezu Kristu—
7 mwa otene ali o Roma ankweliwa na Mulugu, akuweleliwe wi akale okoddela:
Mukane mahala na murenddele wa Mulugu, Babi wehu vina wa Nabuya Yezu Kristu.
8 Vamaromo-vene ddinomutamalela Mulugu waga, na nzina na Yezu Kristu mwaha wenyu, vowi nroromelo nenyu ninologiwa mwilaboni mwetemwene.
9 Sabwani Mulugu, onimulabelimi na murima wetene, ddilaleyaga miselu dhapama mwaha wa Mwanaye, onovaha onamoona wawi ddinouromolani mmalobeloni mwaga mudhidhi wetene.
10 Ddinolobela ddikumbiraga wi egawodheya ddiwodhe odha ouwonaniwo Mulugu agafuna.
11 Ddinofuna venjene odha ouwonani wila ddugaweleni mivaho dhinda wa Mulugu wi nroromelo nenyu nilibe;
12 obe wila nilibihane muttu na mukwaye munroromeloni.
13 Ddinofuna wila muziwe nyuwo abali, wi dila dhinjene ddanfuna odha ouwonaniwo, mbwenyi kiwodheyile; ddafuna ddidhe ddone dhobala dhapama dha mabasa aga olaleya, dhahene ninga mumpadduwela na malogo meena.
14 Miyo ddikaana muttorho wa walaleyela attu otene, Agregu na anawedda,* abale anna eziwelo na abale ahinna eziwelo;
15 ddinofuna vina oulaleyelani momaguva miselu dhapama nyuwo munkala o Roma.
16 Miyo kaddinkanela manyazo miselu dhapama, sabwani ji guru ya Mulugu ya wavunana attu otene anna nroromelo, voroma Ayuda ngamala Agregu.
17 Vowi oligana wa Mulugu onowonihiwa mwa abale anna nroromelo vina awene anolibiha nroromelo nawa dhahene ninga munlogela malebo eraga: “Mbwenyi muligani onakalelewo mwaha wa nroromelo.”
18 Vowi ovenyana wirimu Mulugu onowawoniha owali waye attu otene ahinimwiwelela vina attu abure. Awene anowira dhotakala àbarelaga attu oziwa ebaribari
19 vowi awene ahonihiwa dhinfwanyelani oziwa mwaha wa Mulugu, sabwani Mulugu kàviteli.
20 Mikalelo dhaye dhihinwodhihu wona dhinononeleyamo nigasunza muttanddeliwo wa elabo, ninowodha oziwa ejile eliye nigatanalela dhittanddiliye. Dhottandda dhaye dhinowoniha owodha waye ohingoma vina Omulugu waye, nona abale ampwaza kanna vorunela.
21 Attu abo amuziwilevi Mulugu, kanimuttittimiha ninga Mulugu wawa, nne vina kanimutamalela; mirima dhawa dhotowa zelu kadhinawubuweliha elo, vano aroma ozuzumela dhotowa mabasa.
22 Attu abo botowa zelu masiki vanlogani wi aziwitxi,
23 ottiya omuttittimiha Mulugu ohinkwa, awene anttittimiha maladdaniho a muttu onkwa, maladdaniho a balame vamodha na maladdaniho a dhinama dha myeddo minayi na esile dhimburunuwa vati.
24 Mowiwanana na efunelo ya mmirimani mwawa, Mulugu ohattiya wira dhotakala wi apigidhe maningo awa.
25 Awene asaddula ebaribari ya Mulugu na dhottambi, ahebedha vina ahilabela dhottanddiwa ottiya omwebedha vina omulabela Muttanddiyá onfwanyela ottittimihiwa okala n’okala-wene. Amen.
26 Nona Mulugu ohattiya ofwara dhifunelo dhawa dhamanyazo, sabwani ayana awa kanfuna ogona* na alobwana, anfuna ogona na ayana akwawa bahi;
27 yakakene jimpadduwa na alobwana, awene attiya ogona na ayana; anfunana anya-anya; mulobwana na mulobwana mukwaye eraga dha manyazo, avitotelaga goyi dhinvahana na obure wawa.
28 Ninga awene kanubuwela wi jamakamaka omuziwa pama Mulugu,* Iyene ohattiya odhowaganavi dhubuwelo dhawa dhabure vina ohattiya wiraga dhilobo dhahafwanyelani okosa.
29 Mmirimani mwawa mwahidhala obure, ahitowiwa ttagaraga, àli anamasilila,* attu abure, àdhaleliwa ntxiga, opanga, owana-wana, onyengetta, owali vina àli anamaba,
30 anamamagedha, annimutxiga Mulugu, àli anamalupa malamulo, anvittukulela, àli anamagaya, anameta dhobure,* kawiwelela amambali awa,
31 kaana ononelamo, àli ohiwananeyana, awuma mirima vina kaana ttagaraga.
32 Masiki aziwaga pama magano oligana a Mulugu awi ankosa esidhá anofwanyela okwa, ottiya okosavi awene anowarumelana vina abale ankosayá.
Manota
^ Obe, “beu.”
^ Obe, “abale ahili Agregu.”
^ Obe, “ogonihana.”
^ Obe, “ninga ahikodda eziwelo yowakwana ya Mulugu.”
^ Obe, “a nrima.”
^ Obe, “anlaganela dhilobo dhabure.”
