Akadda Roma 10:1-21
10 Abali, enfuna murimaga vina enlobelelimi wa Mulugu mudhidhi wetene jawi attu a nlogo naga avuneye.
2 Ddinovaha onamoona wi awene anozuzumela venjene omulabela Mulugu, mbwenyi ankosa ejoyá ahimuziwaga pama Muluguyá.
3 Mwaha wa awene ohiziwa ejile enona Mulugu ninga yoligana, amfwara magano awa, awene kaniwelela magano a Mulugu mwaha wa eli yoligana.
4 Sabwani Kristu ddigomihile Nlamulo, ovano wotene ole onimuroromela onowoniwa ninga muligani.
5 Mizé ohileba mwaha wa oligana ondha mwaha wa weddana Nlamulo, alogaga dhahi: “Muttu onvirihamo dhinruma nlamulo onele okalelawo esuwene.”
6 Mbwenyi mwaha wa oligana ondha mwa olagiha nroromelo, mazu a Mulugu anloga dhahi: “Kuloge mmurimani mwawo, ‘Bani onaniwelele wirimu?’ Kuloga, amudhana Kristu,
7 obe, ‘Bani onanititele mutxelani novaya?’* kuloga, amudhana Kristu mukwani.”
8 Mbwenyi txini enloga maleboyá? “Nzu nili vakuvi vawo, nili mwano mwawo vina mmurimani mwawo”; ninaddiwana, “nzu” na nroromelo, ninlaleya iyo.
9 Ogalaleya vanamwinjini na mulomo wawo wi Yezu Nabuya, vina ororomela mmurimani mwawo wi Mulugu ohinvenyiha mukwani, onele ovuneya.
10 Txibarene, wila muttu akale woligana, onofwanyela ororomela mmurimani mwaye, vina wila avuneye, onofwanyela olaleya muttaka wapama na mulomo waye.
11 Malebo anloga: “Kavo onimuroromela iyene onatxinuwe.”
12 Kuli ottiyana wa Ayuda na Agregu. Nabuya wakene oli na otene, vina iyene onowakoddelela murima otene abale animuloba wi àkamihedhe.
13 Vowi “wotene ole onlobela, aromolaga nzina na Yehova, onele ovuneya.”
14 Mbwenyi anawodhe dhavi omulobelela ole ohinimuroromelani? Vina anawodhe dhavi omuroromela, ahiwale mwaha waye? Kito anewe dhavi ahiliwo muttu onalaleyela?
15 Analaleye dhavi ahirumiwe? Jijene enloga malebo eraga: “Okoddela gani wa manyalo a abale anlaleya miselu dhapama dha dhilobo dhapama!”
16 Mbwenyi kahiyo otene eweleli miselu dhapama. Izaiya ohiloga: “Yehova, bani ororomelile dhilaleyilehu?”*
17 Nroromelo ninfwara esile dhiniwiwa. Vina esile dhiniwiwa dhindha modhela nzu mwaha wa Kristu.
18 Mbwenyi miyo ddinovuza mwaha wa Izrayel, kuloga awene kakanile gari ya wiwa? Ndde, ahiwa; txibarene malebo anloga: “Elabo yotene ya vati ehilaleyiwa, vina abale ankala wolapela-wene ahiwa muselu wawa.”
19 Miyo ddinovuzavi wili, koddi Izrayel kanonelemo? Vamaromo Mizé ohakula: “Miyo ddinele wukosihani wakanela aje attu ahili nlogo; ddinele wukosiha okubanya mwaha wa nlogo nihinna eziwelo.”
20 Izaiya na oribiwa murima, ohiloga mazu a Mulugu dhahi: “Ddifwanyiwa na abale ahadditamela, ddiziwiwa na abale ahaddivuzela.”
21 Mbwenyi mwaha wa Izrayel iyene ologile dhahi: “Ddihitapulela nlada naga siku nantero, nlogo nihiniwelela vina novadda murima.”
