Akadda Roma 11:1-36
11 Ddinovuza, koddi Mulugu ol’onyanyala nlogo naye? Nne-wene! Sabwani miyo vina ddili mukadda Izrayel, mudhuli* wa Abrahamu wa nihimo na Benjami.
2 Mulugu kanyanyalile nlogo naye nisakuliliye vamaromo. Nyuwo kamunziwa enloga malebo mwaha wa Eliya, mmulobeleliye Mulugu sabwa ya Izrayel?
3 “Yehova, awene ahapa anamavuhulela enyu, atolotxa dhibuwa dhenyu, ovuneyilevo ddi miyo meka; apo antamela vina addipe.”
4 Mbwenyi txini emwakulile Mulugu? “Miyo ddikaana alobwana 7.000 ahimwebedhile Baal.”
5 N’ekalelo yakakene, nsaka nttino vina nikalawo nikuru nisakuliwe, mwaha wa mahala a Mulugu.
6 Eji epadduweli mwaha wa mahala a Mulugu, kipadduwele mwaha wa merelo awa, sabwani kopadduwela mwaha wa merelo awa, kagakalile vina mahala a Mulugu.
7 Ninaloge eni? Attu a Izrayel kafwanyile ejile yafunani, attu ang’onovi asakuliwe bafwanyile. Mbwenyi ena ahikodda.
8 Jijuwene enloga Malebo eraga: “Mulugu ohavaha tturo enddimuwa, wi mento awa ahonege vina maru awa ahiwege, ofiyedha siku na ddabuno.”
9 Davidi vina ohiloga: “Mittupo dhawa dhikale mirega, nttavi, nlugu, dhadhelagana goyi dhinafwanyelela.
10 Mento awa ahiwodhege wona vina mitana dhawa dhiworomihiwe malabo otene.”
11 Ovano ddinovuza, koddi Ayuda alokwakwattuwa bagwa, bahikana njedhelo novenya? Txibarene nne-wene! Mbwenyi mwaha wa okwakwattuwa wawa, attu a malogo meena anovuniwa wila Ayuda àkanele ntxiga.
12 Okwakwattuwa wawa onodhana mareliho menjene mwilaboni; ovuguwa wawa onowareliha attu a malogo meena, nona mareliho anele winjiva, muttengo wotene wa Ayuda na attu a malogo meena ogatugumanihiwa!
13 Ovano ddinloga na nyuwo attu a malogo meena. Vowi ddili murumiwi wa malogo, miyo ddinottittimiha mabasa aga animulabelimi Mulugu,
14 wi ddone akala ddinowattukulela attu a nlogo naga wakaanela aje attu a malago meena, wila enayámo avuneye.
15 Okoddiwa wawa ohattukulela ena a mwilaboni okaana mandano na Mulugu; akala Ayuda ena anorumelihiwa omwiyelela Mulugu, eji enkala ninga ovenyihiwa mukwani vari va aliba okwa.
16 Ottiya ejo, akala ottu woroma omunyiwe bokoddela, ottu wotene ommunyiwa, onkala wokoddela vina; akala mutxitxiyá bokoddela, dhirasidhá dhotene s’okoddela.
17 Mbwenyi, dhipaddi dhina dha mulivera dhigwaddiwawo, weyo ohikiwawo, masiki valiwevi mulivera wa mwini; ovano weyo vina onojavo dha mutxitxi wa mulivera obu,
18 kuwubuwele wi oli wattima opitta dhirasi dhina. Akala onowubuwela wi oli wa ttima, oziwe wi kahiyo weyo onkalihawo mutxitxi, mbwenyi bu mutxitxi onukalihawo weyo.
19 Ena mwa nyuwo anele ologa: “Dhirasi dhina dhigwaddiwawo wi miyo ddikiwe vamburhoni vawa.”
20 Eji ebaribari! Dhirasi dhina dhigwaddiwawo vowi kadhanna nroromelo, weyo ohikiwa vamburhoni vawa sabwa ya nroromelo nawo. Nona, kugaye, okurumuwe.
21 Akala Mulugu koveleli ogwadda dhirasi dhunuwile na muriyá, kanauwovelele wugwadda weyo vina.
22 Oziwe wi Mulugu ddwapama, mbwenyi vina ononyonyeya. Iyene ononyonyeya na abale akwakwattuwile, mbwenyi weyo onowuwoniha mahala aye ogakalavi mmahalanimwá, ogahikose ejuwene onele ogwaddiwa.
23 Ayuda agaroma ororomela, anele wikiwawo omuriniwa, vowi Mulugu okaana owodha wa wawikawo wili.
24 Akala weyo ogwaddiwe omuliverani wa mwini, nanda wikiwa omuliverani wolimiwa, oli wottiyana na mulivera ogwaddiwiwe, kinrutxa ottukula dhirasi dhagwaddiwe omuliverani wolimiwa badhikiwawo wili!
25 Abali, kaddinfuna wi muhiziwe mwaha wa dhoviteya dha Mulugu, dhawene kamunobuwele wi muli aziwitxi; epaddi eng’onovi ya ana Izrayel, ahumiha murima ofiyedha wakwana muttengo wa attu a malogo meena,
26 vina ana Izrayel otene anele ovuneya. Ninga munlogela malebo eraga: “Moboleli* onadhe Osiyoni wi agomihe dhotakala dhotene dha ziza na Jakob.
27 Ntti tti nipagano ninakose miyo na awene ddigamala okuputta dhottega dhawa.”
28 Ebaribari wi Ayuda ena kanrumela miselu dhapama, vina ejo enoupurihanimo, mbwenyi awene asakuliwa na Mulugu, vina Muluguyá onowakwela sabwa ya azamani awa.
29 Mulugu kantxinuwa mwaha wa mivaho dhivahiliye vina kantxinuwa mwaha wa wakuwela abale àkuweliye.
30 Nyuwo wale kamwamwiwelela Mulugu, mbwenyi ovanene muheddeliwa ttagaraga, sabwa ya ohiwelela wa Ayuda;
31 ovano awene kaniwelela, vina Mulugu onoulagihani ttagaraga, mbwenyi awene vina anele weddeliwa ttagaraga dhahene ninga nyuwo.
32 Mulugu onawona otene ninga adhari ohiwelela wi aweddele ttagaraga.
33 Ngani wunuwa gani wa owodha, ononelamo vina eziwelo ya Mulugu, ottonga waye kunfiyedheya, dila dhaye kadhinnoneleyamo!
34 “Bani onziwa yubuwelo ya Yehova, obe bani waromilege okala namalaga waye?”
35 “Bani waromilege omvaha elobo-elobovi wi iyene amwiyihedhe?”
36 Sabwani iyene okosa dhilobo dhotedhene vina okalihawo dhotedhene; dhotene dhinkalawo mwaha waye. Attittimihiwe okala n’okala-wene. Amen.