Akadda Roma 12:1-21
12 Abali, mwaha wa Mulugu oulagihani ttagaraga yaye, ddinoukokomezani wi mumperhekele maningo enyu ninga mukutto w’egumi, oli wokoddela onrumeliwa na Mulugu vina mulabihedhe yubuwelo yenyu mmulabelagana iyene.
2 Vano muhitagihe mweddelo wa elabo ejino,* ottiya ejo, mmuttiye Mulugu asaddule yubuwelo yenyu, dhawene munele oziwa mowakwana enufunanina Mulugu, eli yapama, eli yorumeleya vina yowakwana.
3 Vano mwaha wa mahala a Mulugu avahiwemi, ddinomwaddela muttu-muttu wa nyuwo wi ahivyubuwelege opitta ejile eliye, mbwenyi muttu-muttu obuwelege n’ovipimelela, mowiwanana na munuwelo wa nroromelo ninvahile* Mulugu.
4 Maningo akaana vyano dhinjidhene, mbwenyi vyano eso dhotene kadhinkosa mabasa akakene,
5 dhahene vina masiki iyo ninjivanilevi, nili nningo nimodha, nili mumodhani na Kristu, iyo nili vyano dhili mumodhani na dhina.
6 Iyo notene nikaana mivaho dhottiyana mowiwanana na mahala a Mulugu anilagihiliye; nona, akala nikaana mvaho wovuhulela, nivuhulele bari nroromelo ninnehuna.
7 Akala nihakela mvaho wowakamihedha ena, nakamihedhe na murima wotene; akala mvaho wehu bwa osunziha, nisunzihe na murima wotene;
8 akala nihakela mvaho wa walibiha* attu ena, nalibihege;* akala nihakela mvaho wa wagawela* attu ena, nagawelege; ole onsogorhela mmulogoni, akosege ejoyá na ntidi; vina ole oneddiwa ttagaraga, akosege ejo na murima woziveliwa.
9 Wakwela wenyu attu ena okale webaribari.* Mwiddege dhili dhabure, mbwenyi mukosege dhili dhapama.
10 Mukwelanege venjene muttu na mukwaye. Nyuwo mukalege oroma wattittimiha attu ena.
11 Mulabege na malago, kamukale awara, muya wokoddela* ouvaheni guru, mulabe ninga Adhari a Yehova.
12 Mwagalalege mwaha wa njedhelo nenyu, mvilelege mmakattamihoni. Mudidelege olobela.
13 Mugawelegena dhinenyuna na anamasunza,* bari enimujombela muttu ddi muttu, mukane elemelelo ya wawakela aleddo.
14 Mmulobelelege Mulugu wila àrurihege abale anufwara-fwarani, mmulobelelege Mulugu wila àrurihege attu vina muhalogelege dhilobo dhotakala.
15 Muttabe na abale anttaba, munle na abale anunla.
16 Mwawonege akwenyu dhahene ninga munvyonela nyuwo; kamuvittukulelege mbwenyi mukale oviyeviha. Muhubuwele wi muli aziwitxi wapitta ena.
17 Kammwirele muttu yabure yakakene yuwireliyeni. Zuzumelani dhili dhapama vamentoni* va attu otene.
18 Egakala yowodheya vamentoni venyu, mutamelege okaana murenddele na attu otene.
19 Abali okweleya, kamwire dha ntxiga, murabele osilidhiwa, vowi ehilebiwa: “‘Ntxiga mwinya ddi miyo; ddinele wiyiha,’ onloga ddi Yehova.”
20 “Mwiddani wawo agapiwa dala, kanvahe yoja; agapiwa nttona, kanvahe yomwa; ogera dhawene onowugela makara amotto vamusorhoni vaye.”*
21 Kamurumele opemberhiwa na obure, mbwenyi mpemberhe obure mwiraga dhapama.
Manota
^ Obe, “nsaka nttino.” Kang’ana Mazu Atapuleliwe.
^ Obe, “nimugaweli.”
^ Obe, “wakokomeza.”
^ Obe, “nakokomezege.”
^ Obe, “wavaha.”
^ Na egregu, “ohikale wogwaragwambi.”
^ Enkala ninga enaddiwana muya wa Mulugu.
^ Na egregu, “akoddeli.”
^ Obe, “vari.”
^ Kuloga, onommaliha muttuya vina onomuridhiha murima.
