Akadda Roma 13:1-14
13 Nawiwelelege anddimuwa a mwilaboni,* abuwene annilamulela, sabwani kawo onna onddimuwa ahirumeliwe na Mulugu; anddimuwa aliwo attomeliwe na Mulugu mipaddo dhawa.
2 Nona, ole onapambiha anddimuwa onopambiha malamulo emetxile Mulugu, vina abale anapambiha anovitotela okoniwa anyene.
3 Abale anira dhapama kanawova alamuleli, anawova babale anira dhabure. Onofuna ohawovege anddimuwa a elabo? Wirege dhilobo dhapama, onele wakela nttittimiho nawa.
4 Anddimuwa abo arumiwi a Mulugu, awene ahikiwa vamburoni vawa wi auweddihege pamene, vano wakosa yabure onowawova vowi awene akaana owodha wa wukona* vina kanirela ebewene. Awene animulaba Mulugu wi amutxinutxe ole onira dhabure.
5 Vano enofuneya wawiwelelaga, kahiyo bahi sabwa ya ottawa otxinutxiwa, mbwenyi mwaha wa mubuwelo wenyu.
6 Nona mugapitxaga musoko, sabwani awene arumiwi a Mulugu anattiddela mabasa attu otene, anokosa mabasa abo mudhidhi wotene.
7 Mwavahe otene enafwanyelela: Ole onfuna musoko, mumpitxele musoko; ole onfuna kobiri ya guverno, mumvahe kobiri ya guverno; ole onfuna woviwa, mmovege; onfuna orihiwa, mmurihege.
8 Kamukane mangawu na muttu, ehili okwelana muttu na mukwaye; ole onimukwela mukwaye onowakwaniha nlamulo.
9 Sabwani nlamulo ntti nawi, “Kulupe matelo, kumpe muttu, kuwiye, kusilile yamwinya,” vina yoruma yorumavi eliwo engwaddiwa na mazu aba: “Omukwele muttu mukwawo ninga envikweliwe wamwinya.”
10 Onkwela, kanimwirela yabure muttu mukwaye; vowi okwela wakwanihedheya wa nlamulo.
11 Mukosege dhawene sabwani munoziwa nsaka nilihu, ntti nsaka novenya mutturoni, vowi ovuneya wehu ohaddamela opitta nsaka niromilehu ororomela.
12 Omattiyu onfuna omala, vahalile vang’onovi wi vati vaye, nona nittiye wira mabasa a mwiddimani, mbwenyi nittukule dhipano dha txeza.
13 Neddege na malago ninga eneddiwa na mutana, nitxelele mattanga otakala,* omwa wottabwihavo, ogonihana wonyakuwa,* mweddelo wohifwanyelela ontota manyazo,* owanawana na aje.
14 Mmutagihe Nabuya Yezu Kristu, vina muhitadelege odhowa wira* yottega.
Manota
^ Obe, “alamuleli a guverno.”
^ Obe, “olaga.”
^ Mattanga abo, muttu-muttu onkosa esile dhinfuniye.
^ Na egregu, porneya. Kang’ana Mazu Atapuleliwe.
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Na egregu, “efunelo ya maningo.”
