Akadda Roma 14:1-23
14 Mmwakele muttu onna nroromelo nawobana, mbwenyi kamwattonge abale anna dhubuwelo dhottiyana na dha attu ena.
2 Muttu onna nroromelo noliba onoja dhotene, mbwenyi ole onna nroromelo nawobana onja mikwani bahi.
3 Ole onja, kampwaze ole ohinja, vina ohinja kamuttonge ole onja, sabwani Mulugu omwakela.
4 Weyo oli ani onimuttonga mudhari wa muttu mwina? Ddi mwinya wa mudhariyá onona akala iyene ddwapama obe ddwabure, mbwenyi na nikamihedho na Yehova iyene onowodha wimela.
5 Ena anowona siku nimodha ninga nattima opitta masiku meena, oku ena onaga masiku otene ninga oligana; muttu-muttu akaane ebaribari na enubuweliye.
6 Abale anona siku nimodha ninga nattima anomuttittimiha Yehova, abale anja dhotedhene anomuttittimiha vina Yehova, vowi awene anomutamalela Mulugu mwaha wa oja; abale ahinja anomuttittimiha vina Yehova vowi awene anomutamalela vina Mulugu.
7 Txibarene, kawo nne mmodha wa iyo onivikalelawo mwinya, nne kawo mmodha wa iyo onkwa avikwelaga mwinya.
8 Sabwani akala ninokalawo ninimukalelawo Yehova, akala ninokwa ninimukwelela Yehova, vowi masiki nikalewo masiki nikwe nili a Yehova.
9 Sabwani jijene ekwele Kristu wi akale Nabuya wa abale akwile na abale aliwo.
10 Kito onimuttongela nni mbalawo? Obe onimpwazela nni mbalawo? Oziwe wi iyo notene ninele wimela vamentoni va Mulugu vina iyene onele onittonga notene.
11 Vowi Malebo anologa: “‘Dhahene ninga munkalelawo miyo’, onloga ddi Yehova, ‘attu otene anele oddikokorela vina attu otene anele oziwa wi miyo ddili Mulugu.’”
12 Vowi muttu-muttu onele wakula vamentoni va Mulugu.
13 Nona kanittongena muttu na mukwaye, ottiya ejo, nigane ohikosa elobo-txilobo enobaniha nroromelo na mbalihu obe enimutotela okwakwattuwa.
14 Ddinoziwa vina ddikaana ebaribari mwa Nabuya Yezu Kristu wi kayiwo elo enja iyo enkwaruliha, mbwenyi akala muttu onowubuwela wi yoja enoniye jokwaruliha mwa iyene, jokwaruliha-wene.
15 Akala mbalawo ononyonyeya sabwa ya yoja enjiwe, weyo kunedda na okwela. Kristu omukwela muttu oddo, nona kutolotxe nroromelo naye sabwa ya oja wawo.
16 Kammuttiye muttu ologa bure sabwa ya opama onirenyu.
17 Omwene wa Mulugu, kahiyo ejile enjihu nne kahiyo ejile emwihu, mbwenyi yattimayá, oligana, murenddele vina wagalala na muya wokoddela.
18 Ole onlaba dhahene ninga mudhari wa Kristu onomuziveliha Mulugu vina onorumeliwa vamentoni va attu.
19 Nona, nizuzumelege dhilobo dhindhana murenddele vina dhilobo dhinnikamihedha olibihana muttu na mukwaye.
20 Nittiye otolotxa mabasa a Mulugu sabwa ya oja. Txibarene dhoja dhotene dhinorumelihiwa oja, mbwenyi akala dhinomukwakwattutxa mwina, japama ohija.
21 Japama ohija nama, ohimwa vinyu nne ohikosa elobo-wene enimuttukulela mbalawo okwakwattuwa.
22 Enrumeliwe mwaha wa makani aba eli naweyo vina na Mulugu bahi. Onele ohagalala ogaziwa wi kunna muladdu wa wira ejile enziwiwe wi japama.
23 Sabwani muttu agaganyedha yoja nanda aja, okaana muladdu vowi eniriye kindha munroromeloni. Yotene ehindha munroromeloni, yottega.
