Akadda Roma 15:1-33
15 Vano iyo nili ovadda, jofuneya ovilelaga dhawobana dha abale ahili ovadda, nihitamelaga oviziveliha nanya.
2 Muttu-muttu wa iyo atamelege omuziveliha mukwaye, amwirelaga dhapama wi amulibihe.
3 Vowi nne Kristu katamelile oviziveliha mwinya, mbwenyi dhahene ninga mulebeliwani: “Dhoruwana dha abale anuruwana dhinddigwela miyo.”
4 Sabwani dhotedhene dhilebiwe wale, dhilebeliwe wi dhinisunzihe, wila mwaha wa ovilela wehu na opangarhaziwa na Malebo, nikaane njedhelo.
5 Mulugu omvaha ovilela vina nipangarhazo auvaheni nyuwo yubuwelo yakakene yanna Kristu Yezu,
6 wila mowiwanana na lizu* nimodha, mmuttittimihe Mulugu oli Babi wa Nabuyehu Yezu Kristu.
7 Nona mwakelanege* muttu na mukwaye, dhahene ninga yuwakelileni Kristu wi Mulugu attittimihiwe.
8 Ddinouwaddelani ebaribari yawi Kristu ovikosiha mudhari wa attu otxetteliwa wila onihe ebaribari ya Mulugu vina atonyihedhe dhopikirhela dhakoseli Iyene azamani awa,
9 wi malogo amuttittimihe Mulugu, sabwa ya ttagaraga yaye. Jijene enlogela Malebo eraga: “Mwaha wa ejene, ddinele wuttittimihani vari va malogo vina mwaha wa nzina nenyu ddinele wiba jibo ya wuttittimihani.”
10 Iyene ohiloga vina: “Muhagalele nyuwo malogo vamodha na attu a nlogo na Mulugu.”
11 Odhowa alogagavi: “Mmuttittimihe Yehova, nyuwo attu a malogo otene vina nyuwo attu a dhilabo dhotene mmuttittimihe.”
12 Vina Izaiya wahiloga: “Onele woneya mutxitxi wa Jesé onalamulele attu a malogo menjene, vina attu abo anele omujedhela venjene wi akose dhilobo dhapama.”
13 Mulugu omvaha njedhelo audhaliheni ottaba na murenddele ondha mwa omuroromela iyene, wi njedhelo nenyu ninjive na owodha wa muya wokoddela.
14 Abali, miyo ddinokuluvela wi nyuwo mudhaleliwa merelo apama, mukaana ononelamo vina munowodha osunzihana* muttu na mukwaye.
15 Vano ddinoulebelani mohipipirhiha wila dduwubutxedheni dhakakene, ddinkosela ejene sabwa ya Mulugu oddilagiha mahala aye.
16 Iyene oddittoma wila ddikale mudhari wa Kristu Yezu wi ddalaleyele attu a malogo meena miselu dhapama dha Mulugu, miyo ddinottidda mabasa aba wila Mulugu àrumele attu a malogo meena, attu abo ali ninga mukutto okoddelihiwe na muya wokoddela.
17 Ovano miyo ddinottaba vowi ddili namafwara wa Kristu Yezu vina ddinttidda mabasa a Mulugu.
18 Kaddinloga elo enkosemi, mbwenyi enlogimi bahi mabasa addirumile Kristu wira, wila attu a malogo meena amwiwelelege Kristu. Iyene onokosa esodhá alabihedhaga mazu na merelo aga,
19 awene arumela sabwa ya matikiniho vina vizinddiyelo dhireyile na muya wokoddela wa Mulugu. Nona ddinolaleya miselu dhapama mwaha wa Kristu dhipaddi dhotedhene, ovenyana o Jeruzalemi mpaka o Iliriku.
20 Yogana yaga ja orabela walaleyela miselu dhapama mwaha wa Kristu abale ewale, sabwani kaddinfuna ottidda mabasa aromile muttu mwina;
21 dhahene ninga mulebeliwani: “Abale ahinattigi, olaleyeliwa anele omona vina abale ahinatti wiwa mwaha waye, anele ononelamo.”
22 Jijene yahaddiwodhiha odha ouwonaniwo masiki ddifunaga odhawa.
23 Mbwenyi ddihilaleya dhipaddi dhotene dha sidadi eji, vina dhinovira vyaka dhinjidhene dditamelaga odha ouwonaniwo.
24 Nona, ddinojedhela wi mudhidhi onadhowimi o Espanya, ddinele ouwonani, ddinojedhela vina wi ddinele okala vamodha na nyuwo vina munele oddivelela vang’onovi.
25 Mbwenyi ovano ddinroma ddidhowe o Jeruzalemi wi ddakamihedhe akoddeli ali wenewo.
26 Abali a o Masedónia na a o Akáia aperheka mivaho na murima wawa wotene wi àkamihedhena akoddeli oyelega ali o Jeruzalemi.
27 Awene ahavaha na murima wotene. Txibarene awene ahikana mangawu na Ayuda, eji epadduweli sabwa yawi Ayuda ahigawelana dhomuyani dhawa na abali abo, nona abali abo ahikana mangawu a ogawelana dhokana dhawa na Ayuda.
28 Ddindhowana o Jeruzalemi dhilobo dhivahedhiwemi wila ddaaperhekele abali a wenewo, ddigamala ddinele ouwonani ddigadhowaga o Espanya.
29 Ottiya ejo, ddinoziwa wi ddigadha ouwonaniwo ddinele odhana mareliho menjene andha wa Kristu.
30 Ddinoukokomezani abali, na nzina na Nabuya wehu Yezu Kristu vina na okwela wa muya wokoddela wi muddilobelelege wa Mulugu na ntidi dhahene ninga munkoselimi.
31 Mulobelege wila ddoboliwe mmadani mwa attu a o Judeya ahinimuroromela Yezu, wila akoddeli o Jeruzalemi arumeele mabasa aga.
32 Dhahene Mulugu agafuna ddinele odha ouwonaniwo na ottaba wi ddilibihiwe na nyuwo.
33 Mulugu omvaha murenddele akale na nyuwo motene. Amen.
