Akadda Roma 16:1-27
16 Ddinoukokomezani wi mmwakele murogorihu Febe, onkamihedha mabasa mulogo w’o Senkreya,
2 ddinoulobani mmwakele dhahene ninga munakeleliwa attu a Mulugu,* munvahe dhotedhene dhinimujombela, vowi iyene ohakamihedha attu enjene vamodha na miyoyá.
3 Mumperhekele malejelo aga Priska na Ákila, anlaba na miyo mabasa a Kristu Yezu.
4 Awene ahika egumi yawa vangovini sabwa yaga, nona miyo na milogo dhotene dha attu a malogo meena ninowatamalela.
5 Mperhekele malejelo vina mulogo ontugumana vatakulu vawa. Mumperhekele malejelo wokweleya waga Epénetu oli namafwara woroma wa Kristu wa elabo y’o Ázia.
6 Mumperhekele malejelo Maria, ohilemilena outtiddelani mabasa.
7 Mumperhekele malejelo Androniku na Júnia, amudhaga vina àli mukambura vamodha na miyo. Awene anoziwiwa pama na arumiwi vina aromile onfwara Kristu walene opitta miyo.
8 Mumperhekele vina malejelo aga Ampliyatu, wokweleya waga mwa Nabuya.
9 Mumperhekele malejelo Urbano, onlaba vamodha na iyo mabasa a Kristu, vina wokweleya waga Estaki.
10 Mumperhekele malejelo Apele, oli murumiwi wororomeleya wa Kristu. Mwaperhekele malejelo attu a ntakulu na Aristóbulo.
11 Mumperhekele malejelo Herodiau mmudhaga. Mwaperhekele malejelo attu a ntakulu na Narsizu ali anamafwara a Nabuya.
12 Mumperhekele malejelo Trifena na Trifoza, ayana anlaba na guru enddimuwa mmabasani a Nabuya. Mumperhekele malejelo wokweleya, murogora Pérsidi, vowi iyene onolaba na guru enddimuwa mmabasani a Nabuya.
13 Mumperhekele malejelo Rufu, osakuliwe mwa Nabuya, na mayi waye odduwene vina oli mayi waga.
14 Mumperekele malejelo Asínkritu, Filégonti, Hermes, Pátroba, Hermas vina abali ali vamodha na awene.
15 Mumperhekele malejelo Filólogo na Júlia, Nerewu na murogoraye vina Olímpas vamodha na akoddeli otene ali na awene.
16 Mulejelegena mvahagana beju.* Milogo dhotedhene dha Kristu dhinoulejelani.
17 Ovano ddinoukokomezani abali, mwakalele mento abale anita ogawana vina ampupurutxa nroromelo na attu ena, atamelaga osunziha dhinttiyana na esile dhisunzilenyu vina mwarabele attu ninga abo.
18 Attu ninga abo, kahiyo adhari a Nabuya wehu Kristu, mbwenyi adhari a esile dhinfunani. Awene anowakwekwetta attu otowa malago na mazu oziva vina na makani oveyiha.
19 Attu otene anoziwa wi nyuwo munowiwelela, nona miyo ddinowagalala mwaha wa ejuwene. Miyo ddinofuna wi nyuwo mukale attu a eziwelo, mukosaga eli yapama, muhittegaga vina murabelaga eli yabure.
20 Mohigonela, Mulugu omvaha murenddele onele omutataka Satana mutxiddo mwa manyalo enyu. Mahala a Nabuyehu Yezu Kristu akale na nyuwo.
21 Timóteo odduwene onlaba vamodha na miyo, onouperekelani malejelo, amudhaga Lúsio, Jazau na Sosípatro anouperekelani vina malejelo.
22 Miyo Tersio, olebile karta eji, ddinouperekelani malejelo na nzina na Nabuya.
23 Gayo oddakelile vatakulu vaye vamodha na mulogo wotene ontugumana vatakulu vaye, anouperhekelani malejelo. Vina Erasto odduwene onkoya kobiri dha musidadi vamodha na mbalaye Kwartu, anouperekelani malejelo.
24 * ——
25 Mulugu onowodha oulibihani na miselu dhapama dhinlaleyimi vina na miselu dhinlaleyiwa mwaha wa Yezu Kristu; miselu esi dhinoziwiha dhoviteya dha Mulugu dhavitiwe mwari mwa masaka menjene.
26 Mbwenyi ovano nihilagihiwa vina nihiziwa na Dholeba dha anamavuhulela. Mulugu wehu onkalawo masaka otene, ottiya ejiya wi eziwiwe na attu a malogo otene wila onihe wiwelela wawa na nroromelo.
27 Mulugu, odduwene bahi oli muziwitxi, ddinfwanyela ottittimihiwa malabo otene mwa Yezu Kristu. Amen.
Manota
^ Na egregu, “akoddeli.”
^ Akristu anlejelana avahagana beju mudhidhi wagumanani.
^ Versikulu eji enofwanyeya mmaBibiliani meena, mbwenyi mmapapini a wale okuluveleya kinfwanyeyamo.