Akadda Roma 2:1-29
2 Nona, kintanala eliwe, akala onowattonga ena sabwa ya dhawira dhakakene dhiniriwe kunawodhe ovibarela, vowi ogattongaga onivikona wamwinya, sabwani dhinattogeliwe attu ena sakakene dhiniriwe.
2 Ninoziwa wi ottonga wa Mulugu oli mowiwanana na ebaribari, vina onogudulana na abale ankosa esidhá.
3 Weyo onubuwela wi kunafwanyiwe ottonga wa Mulugu mwa wattonga attu ankosa dhakakene dhinkosiwe?
4 Obe kunwodha ononelamo wi Mulugu onuwoniha ttagaraga yaye enddimuwa, ovilela waye na ofwaseya waye vina ohinonelagamo wi na okoddela waye murima onfuna auttukulele wutxinuwani?
5 Vano sabwa yawi oli muttu wa ntidi vina murima wawo kunfuna otxinuwa, Mulugu onele wutxinutxa siku na owali waye vina na woniha ottonga waye woligana.
6 Mulugu onele ompitxela muttu-muttu mowiwanana na mabasa aye.
7 Iyene onele wavaha egumi yohimala abale andidelavi okosa eli yapama, attu antamela nriho, nttittimiho vina egumi yamukalakala;
8 vano abale antatamula owana-wana vina ahiniwelela ebaribari, mbwenyi aniwelela dhohiligana, onele wawoniha otikina na owali waye.
9 Onele okala goyi na otabuwa wa attu otene ankosa dhabure, voroma Muyuda, ngamala Mugregu;
10 mbwenyi nttittimiho, nriho na murenddele anavahiwe babale otene ankosa dhapama, voroma Muyuda, ngamala Mugregu.
11 Sabwani Mulugu kanna nsakulano.
12 Wotene ole onttega ahiziwaga nlamulo onokwa ahiziwaga nlamulo, vano ole onttega aziwaga nlamuloná onele ottongiwa nifwariwaga nlamuloná.
13 Sabwani kahiyo abale aniwa nlamulo aniriwa aligani vamentoni va Mulugu, mbwenyi aniriwa aligani vamentoni va Mulugu babale anvirihamo nlamuloná.
14 Nona akala attu a malogo meena ahinna nlamulo anokosa dhilobo dhinrumiwa munlamuloni, attu aba masiki aheddihiwaga na nlamulo, anowoniha wi akaana nlamulona, mmurimani mwawa.
15 Merelo awa anowoniha wi mmurimani mwawa mulebiwa nlamulo vina murima wawa onowoniha akala merelo awa bapama obe babure; ottiya ejo mubuwelo* wawa onowattukulela wona akala akaana muladdu obe kanna muladdu.
16 Ejo enapadduwe siku ninfuna Mulugu omuruma Kristu Yezu wi attonge dhilobo dhotene dhinkosa attu moviteyani, mowiwanana na miselu dhapama dhinlaleyimi.
17 Ena mwa nyuwo anogaya mwaha wokala Ayuda, anokuluvela nlamulo vina anogaya mwaha wa wandana wawa na Mulugu,
18 nyuwo munoziwa dhilobo dhinruma Mulugu vina munorumela dhilobo dhapama sabwani musunzihiwa Nlamulo,
19 munokuluvela wi munowodha waweddiha abale ahinona vina wamoneya ali mwiddimani.
20 Nyuwo munubuwela wi munowodha omogola muttu wovirigana, wasunziha aima vowi mukaana ononelamo ong’onovi vina munoziwa ebaribari enfwanyeya Munlamuloni—
21 nyuwo munasunziha attu ena, munkoddelani ovisunziha mwanya? Nyuwo munalaleyela attu ena wi “Kamwiye,” muniyelani?
22 Nyuwo munawaddela attu ena wi “Kamulupe matelo,” munlupelani matelo? Nyuwo munidda dhingamuttu muniyelani mumparhani?
23 Weyo onvittittimiha mwaha wa oziwa nlamulo na Mulugu, kito oninveyihelani Mulugu mwaha wolupa Nlamuloná?
24 Nona “nzina na Mulugu, ninologiwa bure * na attu a malogo meena mwaha wenyu,” dhahene ninga munlogela malebo.
25 Otxetteliwa onkaana ttima akala munoweddana nlamulo, mbwenyi akala kamuneddana nlamulo, otxetteliwa wenyu kunna ttima.
26 Nona, akala muttu wohitxetteliwa onoweddana dhoruma dholigana dha Nlamulo, masiki ohitxetteliwevi muttu oddo ononiwa ninga wotxetteliwa.
27 Nyuwo musunzihiwa Nlamulo vina muhitxetteliwa mbwenyi kamuneddana, vano akala muttu ohitxetteliwe onoweddana nlamulo oddo onele outtongani.
28 Sabwani muttu kankala Muyuda sabwa ya woneya otakuluvi bahi vina otxetteliwa webaribari kahiyo wa maningovi.
29 Mbwenyi Muyuda webaribari ononeya na murima, oddo ontxetteliwa mmurimani na muya wa Mulugu ottiya na nlamulo; muttu ninga oddo onttittimihiwa na Mulugu ottiya na attu.
