Akadda Roma 3:1-31
3 Yopurelamo gani enkana muttu mwaha wokala Muyuda, obe otxetteliwa ondhana yopurelamo gani?
2 Okaana yopurelamo yinjene. Mulugu ohavaha Ayuda mazu aye okoddela.
3 Kito, txini empadduwa akala ena kanna nroromelo? Koddi ohiroromela wawa ononiha wi Mulugu kanroromeleya?
4 Nne! Masiki attu otene alogege ottambi attuyá abo anofwanyela oziwa wi mudhidhi wotene Mulugu onologa ebaribari, dhahene ninga munlogela malebo: “Dhahene attu anoziwa wi nyuwo munologa ebaribari* vina muli woligana masiki awene aumagedheni.”
5 Ohiligana wehu onowoniha mowakwana-mwene wila Mulugu ddoligana. Kito Mulugu ddwabure agonihaga owali waye? (Miyo ddinloga dhahene ninga munubuwelela attu.)
6 Nne, Mulugu kahiyo wabure! Akala jijuwene, Mulugu onattonge dhavi elabo?
7 Ottiya ejo, akala ottambi waga onokosiha ebaribari ya Mulugu oziweyavi vina onomudhelana nttittimiho, kito ddinttongeliwani ninga muttegi?
8 Enowodheya iyo ologa: “Ndhoweni nikoseni dhilobo dhabure ngamala dhilobo dhapama dhinele odha,” dhahene ninga munnizivalela attu ena wila iyo niloga dhilobo ninga esi? Mwebaribari attu abo anele ottongiwa.
9 Iyo oli Ayuda nili apamayá opitta ena? Nne-wene! Sabwani nihona wi masiki Ayuda vamodha na Agregu otene adhari a yottega,
10 dhahene ninga mulebeliwani: “Kawo muttu woligana nne mmodha;
11 kawo onna ononelamo, kawo onimutamela Mulugu.
12 Otene apupuruwa, otene atowa ttima, kawo ononiha opama nne ngafuna mmodha.”
13 “Mmelo wawa oli ninga ekutta yofuguwa, nlumi nawa ninologa dhozivala, mazu ambudduwa mwano mwawa anligana na veneno ya nowa.”
14 “Mulomo wawa odhala dholava na mazu owawa.”
15 “Anottamagela wapa attu.” *
16 “Awene mudhidhi wotene anowatabutxa attu vina anowatotela ngovi,
17 vina kanziwa dila ya murenddele.”
18 “Awene kanimuttittimiha Mulugu.” *
19 Iyo ninoziwa wi dhotedhene dhinloga Nlamulo, anlogiwana babale aniwelela Nlamuloná, wi attu otene ahiwodhe ologa elo, elabo yotene etxinutxiwe vamentoni va Mulugu.
20 Nona kawo muttu oniriwa muligani vamentoni va Mulugu sabwa ya ovirihamo dhinloga nlamulo, mbwenyi nlamulo ninonikamihedha ononelamo pama ottega wehu.
21 Ovano Mulugu ohoniha oligana waye ahifwaraga nlamulo, dhahene ninga mwalogeliwa Munlamuloni vina na Anamavuhulela.
22 Oligana wa Mulugu woneyile mwa omuroromela Yezu Kristu, mwa otene anlagiha nroromelo ntti. Sabwani kuli nlogo nilitxi nattima opitta nina. *
23 Attu otene attega vina kanwodha woniha nttittimiho na Mulugu.
24 Kristu Yezu ohawobolela apitxelaga dhoddawa dhawa vina abo ahikalihiwa aligani vamentoni va Mulugu, nona Mulugu ohavaha mahala aye mwaha wa opama waye onddimuwa.
25 Mulugu ohimperheka Yezu ninga mukutto wi niyelele wandana na Iyene mwaha wa ororomela nikami na Yezu. Mulugu okosele ejene wi onihe oligana waye, konihile bahi ovilela * waye mwa olevelela dhottega dhehu dhikosilehu wale.
26 Mbwenyi ohinoniha oligana waye iyo ninkalawo masaka abano, amwittanaga muligani muttu ole onimuroromela Yezu.
27 Kito mukaana mwaha wovittukulelana? Nne! Kuloga munovittukulela mwaha wa wiwelela nlamulo? Nne! Mbwenyi mwaha wa ofwara nlamulo na nroromelo.
28 Iyo ninoziwa wi muttu oniriwa muligani mwaha wa nroromelo, ehili mwaha wa otagiha okosa esile dhinlogiwa munlamuloni.
29 Ngani, Mulugu, Mulugu wa Ayuda bahi? Kahiyo vina Mulugu wa attu a malogo otene? Ndde, iyene Mulugu wa attu a malogo otene.
30 Vowi Mulugu oli mmodha bahi, iyene onowaromola aligani attu otxetteliwa na attu ohitxetteliwa mwaha wa nroromelo nawa.
31 Kito bili dhawene ninowobaniha nlamulo mwaha wa nroromelo nehu? Nne-wene! Ottiya ejo ninolibiha nlamulóna.
Manota
^ Obe, “nyuwo muli webaribari na mazu enyu.”
^ Na egregu, “okuttula nikami.”
^ Na egregu, “kanimova Mulugu.”
^ Na egregu, “kuli nsakulano.”
^ Obe, “opisa murima.”
