Akadda Roma 4:1-25
4 Bili dhawene, ninaloge eni mwaha wa muzamani wehu Abrahamu?
2 Motagiha, kowiliwa Abrahamu wakuweliwe muligani mwaha wa dhiriliye agahikana mwaha wogayana, mbwenyi kahiyo vamentoni va Mulugu.
3 Txini enloga Malebo? “Abrahamu omuroromela Yehova, nona ohoniwa ninga muligani.”
4 Akala muttu onlaba onopitxeliwa elabeliye, kavahiwe ninga mahala, ovahiwe eninfwanyelela.*
5 Mbwenyi akala muttu onomuroromela Mulugu ahikuluvelaga merelo bahi, Mulugu onomwira muttu oddo muligani mwaha wa nroromelo naye, sabwani ddi Mulugu onimwira muligani ole oli muttegi.
6 N’ekalelo yakakene, Davidi onologa mwaha wa wagalala wa muttu ononiwa na Mulugu ninga muligani ahang’aniwaga merelo a muttuyá:
7 “Ohagalala babale aleveleliwe merelo awa abure vina dhottega dhawa dhidduwaliwa*
8 wohagalala dduddule dhottega dhaye, dhihintanaliwa na Yehova.”
9 Koddi anjavo ohagalala oku, babale atxetteliwe bahi, obe vina na abaleyá ahitxetteliwe? Vowi ninologa: “Nroromelo na Abrahamu nimukosiha woniwa ninga muligani.”
10 Iyene woniwe mudhidhi gani ninga muligani? Mmaleliye otxetteliwa obe ahinatti otxetteliwa? Ahinatti otxetteliwa.
11 Vasogorhova ohakela ezinddiyelo * ya otxetteliwa yoniha wi iyene wali muligani mwaha wa nroromelo nonihiliye ahinatti otxetteliwa, nona egalogiwaga wi iyene babi wa otene abale anna nroromelo, masiki ahitxetteliwevi, sabwani awene anowoniwa ninga attu oligana;
12 iyene okala babi wa ziza notxetteliwa, ottiya bahi wa abale atxetteliwe, mbwenyi vina abale amfwara ttarho dha nroromelo na babihu Abrahamu naniyena ahinatxetteliwa.
13 Sabwani kiyali mwaha wa nlamulo yakelile Abrahamu vamodha na ziza* naye nipikirhelo nawi agahivahiwa elabo yopikirhela, mbwenyi ewodheyile mwaha wa oligana ondha munroromeloni.
14 Akala abale amfwara nlamulo banakele dhopikirheliwa, nroromelo kanimpura elo vina nipikirhelo nikoseliwe Abrahamu kaninlabela elo.
15 Txibarene, olupa Nlamulo onototela otxinutxiwa, mbwenyi vahili nlamulo kavali ohiwelela nlamulo.
16 Abrahamu ohakela ejile yapikirheliwiye mwaha wa nroromelo naye, dhawene ziza* naye notene ninofwanya esile dhapikirheliwe, ottiya abale aneddana Nlamulo bahi mbwenyi abale amfwara nroromelo na Abrahamu, odduwene oli babi wa otene anna nroromelo.
17 (Dhahene ninga mulebeliwani: “Miyo ddihuwira babi wa attu a malogo menjene.”) Abrahamu ohoniha nroromelo ntti vamentoni va Mulugu, odduwene onavenyiha akwile vina onloga dhilobo dhihiliwo ninga dhiliwo.*
18 Masiki vahajedhela Abrahamu okaana aima, mbwenyi mwaha wa nipikirhelo iyene wanroromela wi agahikala babi wa malogo menjene mowiwanana na ejile yampikirhele Mulugu, alogaga: “Ziza* nawo ninakale dhahene.”
19 Iyene kobanile munroromeloni, wobuwela mwaha wa maningo aye sabwani nela waddamela nsaka naye n’okwa (vowi wanna vyaka 100), iyene vina wanziwa wi Sara kagawodhile vina obala sabwani nahivira nsaka naye n’okana mwana.
20 Mbwenyi mwaha wa nipikirhelo namukosele Mulugu, iyene kaganyedhile vina karimeliwe nroromelo, ottiya ejo olibavi na nroromelo, amuttittimihaga Mulugu.
21 Iyene wahikana nikuluvelo nawi Mulugu agahiwodha wakwaniha ejile yampikirheliye.
22 Nona mwaha wa nroromelo naye, “ohoniwa ninga muligani.”
23 Mbwenyi mazu aba “iyene ohiriwa,” olebeliwe kahiyo Abrahamu bahi,
24 olebeliwe ddi iyo vina, oniriwe aligani sabwa ya omuroromela Ole onvenyihile mukwani Nabuyehu Yezu.
25 Iyene operhekiwa sabwa ya dhovonya dhehu vina ohivenyihiwa mukwani wi niriwe aligani.
Manota
^ Obe, “ninga mangawu.”
^ Obe, “dhikuneliwe.”
^ Obe, “okuluvelihiwa.”
^ Na egregu, “beu.”
^ Na egregu, “beu.”
^ Obe txino, “onkalihawo dhihiliwo.”
^ Na egregu, “beu.”
