Akadda Roma 5:1-21
5 Vowi, ovano ninowiriwa aligani mwaha wa nroromelo nehu, ndhoweni nijevo murenddele* na Mulugu mwa Nabuyehu Yezu Kristu,
2 omuroromela wehu Yezu ononittukulela onfiyedha Mulugu vina ojavo murenddele waye. Iyo ninowodha ohagalala* sabwani ninojeedha wakela nttittimiho nindha wa Mulugu.
3 Kahiyo ejenevi bahi, mbwenyi ninohagalala* vina mmasosoni, sabwani ninoziwa wi masoso anodhana ovilela;
4 ovilela ononittukulela orumeliwa na Mulugu; orumeliwa na Mulugu ononivaha njedhelo,
5 vina njedhelo kaninnitotela otxinuwa, sabwani Mulugu olabihedha muya waye wokoddela onivahiliye wila onihe onikwela waye.
6 Vahanihu nikamihedho,* Kristu odha vansakaniva ohakwela attegi.
7 Enorutxa muttu omukwela muligani; txino enodha opadduwa muttu omukwela ole oli wapama.
8 Vano Mulugu ohilagiha onikwela waye, sabwa ya Kristu onikwela iyo oku banilivi attegi.
9 Ovano, vowi ninowiriwa aligani sabwa ya nikami na Yezu, ninowodha okaana ebaribari wi ninele orabelihiwa owali wa Mulugu.
10 Sabwani valihu amwiddani a Mulugu nihandanihiwa na iyene sabwa ya okwa wa Mwanaye, nona ninokana ebaribari wi ninele ovuniwa na egumi yaye vowi nimala wandanihiwa na Mulugu.
11 Ekosile Mulugu mwaha wa Nabuyehu Yezu Kristu, ehiniwodhiha ohagalala vowi sabwa yaye ddabuno iyo nimala wandanihiwa na Mulugu.
12 Nona, sabwa ya mulobwana mmodha bahi, ottega ovolowa mwilaboni, vina ottegawa ototelamo okwa, dhahene okwa onowafwanya attu otene sabwani otene attega—.
13 Ottega wahikalawovi mwilaboni nihinatti okalawo Nlamulo, vowi attu kammagedhiwana muladdu wa ottega nihiliwo nlamulo.
14 Dhahene okwa wahikalawovi oromana Adamu ofiyedha Mizé, masiki na abaleyá ahattegile dhahene ninga mwattegile Adamu. Adamu wali ezinddiyelo ya ole wafuna odha.
15 Mbwenyi mvaho wa Mulugu kunligana na yottega ya Adamu, attu enjene ahikwa sabwa ya ottega wa muttu mmodha; vano Mulugu na opama waye vina na mvaho waye wa mahala a muttu mmodha oli Yezu Kristu, iyo ninoleveleliwa; Mulugu ohirumela mvaho obu mwa wavaha attu enjene mareliho menji.
16 Ottiyana wa mvaho wa Mulugu na yottega ya muttu mmodha kuku, ottongiwa odhile mwaha wa yottega ya muttu mmodha ku okoniwa, mbwenyi mvaho wa Mulugu onowawodhiha attegi enjene wiriwa aligani.
17 Akala mwaha wa yottega ya mulobwana mmodha okwa ohilamulela, nikaana-wene ebaribari wi abale anakela mahala menji a Mulugu vina anvahiwa mvaho wa wiriwa aligani, anele olamulela ninga amwene sabwa ya muttu mmodha, Yezu Kristu!
18 Vano vowi ovonya wa muttu mmodha ohittukulela okoniwa wa attu otene, dhahene vina merelo oligana a muttu mmodha ahattukulela attu otene wiriwa aligani wi àkele egumi.
19 Sabwani ohiwelela wa muttu mmodha ohakosiha enjene okala attegi, mbwenyi wiwelela wa muttu mmodha ohakosiha enjene okala aligani.
20 Nlamulo nivahedheliwe wi attu anonelemo winjiva wa ottega wawa, vano mmalele attu ononelamo winjiva wa ottega wawa, mahala a Mulugu ahenjeedheya.
21 Mwahaya bwani? Mwahaya bwawi dhahene ninga mulamuleli ottega na okwa, mahala vina a Mulugu alamulele na oligana wi àttukulele attu wigumini yohimala mwa Yezu Kristu Nabuyehu.
Manota
^ Obe txino, “iyo nikaana murenddele.”
^ Obe txino, “ottaba.”
^ Obe txino, “ninottaba.”
^ Na egregu, “vàlihu awobana.”