Akadda Roma 6:1-23
6 Kito ninaloge eni? Ninele odidelavi wira yottega wi mahala a Mulugu enjivevi?
2 Nne-wene. Iyo kanineddihiwa na yottega,* kito enwodheya dhavi odidela okalagavi muttegani?
3 Obe kamunziwa wi notene iyo obatiziwe mwa Kristu Yezu nibatiziwe mukwani mwaye?
4 Iyo nihinteriwa vamodha na iyene sabwani nibatizeliwe wila nikale na iyene mukwani mwaye, wi dhahene ninga Kristu ovenyihiwe mukwani na guru yottittimiheya ya Babe, iyo vina nikalewo na egumi eswa.
5 Nigakala mumodhani na iyene, nikwa dhahene ninga mukweliye, ninele okala mumodhani na iyene nivenyihiwaga dhahene ninga muvenyihedhiwiye mukwani.
6 Vowi ninoziwa wi omuttu wehu wawale okomeliwa vapingirhizini vamodha na iyene wila guru ya ottega eli mmaningoni mwehu egomihiwe wi nihikale vina adhari a yottega.
7 Ole okwile oleveleliwa* dhottega dhaye.
8 Ottiya ejo, akala nihikwa na Kristu ninororomela wi ninele okaana egumi na iyene.
9 Ovano iyo nihiziwa wi Kristu ovenyihiwa mukwani vina kanakwe; okwa kunimuwodha vina.
10 Iyene okwa dila modha bahi wi agomihe yottega, mbwenyi egumi enna iyene ovanene, onkalelawo wi akose ofuna wa Mulugu bahi.
11 Dhahene nyuwo vina muvyonege ninga attu okwa ahinkosa yottega, vina muvyonege ninga attu ankalelawo okosa ofuna wa Mulugu, anfwaraga Kristu Yezu.
12 Nona muhittiye yottega weddiha egumi yenyu, muhiwelelege esile dhinfuna maningo enyu, esuwene dhinuttukulelani wukwani.
13 Muhiperhekele egumi* yenyu yottega wila mukosege dhilobo dhotakala, ottiya ejo, muperheke egumi* yenyu mmadani mwa Mulugu ninga attu avenyihiwe mukwani; muperheke maningo enyu mmadani mwa Mulugu wila mukosege dhapama.
14 Nona yottega kiyupemberheni, sabwani ddabuno kamuneddihiwa na nlamulo mbwenyi muneddihiwa na mahala a Mulugu.
15 Ninaloge eni? Ninelege ottegavi sabwani kanineddihiwa na nlamulo mbwenyi nihakela mahala a Mulugu? Nne-wene!
16 Nyuwo kamunziwa wi mugaviperheka wa muttu ninga adhari wi mmwiwelelege, ddi nyuwo onkala adhari a ole oviperhekelenyu, akala yottega enttukulela okwa, obe wiwelela onttukulela oligana?
17 Mbwenyi nimutamalele Mulugu, sabwani masiki wale valinyu adhari a yottega, ddabuno nyuwo munowiwelela na murima wotene mweddelo na masunziho àkelilenyu.
18 Ndde, ovano mumala ofuruliwa muttegani wi mukale adhari a Mulugu mukosege dholigana.
19 Ddinloga n’ekalelo y’omuttu sabwa ya maningo enyu awobana, dhahene ninga mperhekelinyu maningo enyu okala adhari a yottega na esile dhingudulana na nlamulo, mukwekwetteleyaga wira dhotakala, nona muperhekele maningo enyu okala adhari a dholigana wi muttukuleleye wira dhokoddela.
20 Sabwani vàlinyu adhari a yottega, kamwamageleliwa wira dhapama.
21 Dhawira dhenyu dha nsaka nttile mupurilena nni? Mupurilena dhilobo dhinutotelani manyazo ovanene vina dhinuttukulelani wukwani.
22 Ovano ninga mufuruliwa muttegani, munokosa eli yokoddela ninga adhari a Mulugu, yopurelamoya enakale egumi yohimala.
23 Vano ottega ompitxiwa na okwa, mbwenyi ennivaha Mulugu ji egumi yohimala mwa Kristu Yezu Nabuya wehu.
Manota
^ Na egregu, “nikwa mwaha wa yottega.”
^ Obe, “ohoboleliwa.”
^ Obe txino, “vyano.”
^ Obe txino, “vyano.”