Akadda Roma 7:1-25
7 Abali, ddinloga na nyuwo munziwa Nlamulo: Kamunziwa wi Nlamulo ninkaana guru ya omuttonga muttu iyeneyá baliwo?
2 Motagiha, muyana oteliwe onomageleleya na nlamulo okalavi na mamunaye iyeneyá baliwo, mbwenyii mamuneyá agakwa onofuruleya mwa nlamulo na mamune.
3 Nona akala muyana onoteliwa na mulobwana mwinagu mamunaye baliwo, onolupa matelo, mbwenyi akala mamunayeyá onokwa iyene onofuruleya na nlamulo, venevo agateliwa na mulobwana mwina, kanlupa matelo.
4 Nona abali, maningo a Kristu ahufurulani Munlamuloni na Mizé; eji epadduweli wi mukale a muttu mwina, ole ovenyihiwe mukwani, ovano ninowodha omulabela Mulugu.
5 Vowi vakalawo iyo nifwaraga dhifunelo dha maningo, dhifunelo dha yottega dhitoteyile na Nlamulo dhankalavi mmaningoni* mwehu wi dhinittukulele wira merelo annittukulela okwana.
6 Ovano nifuruliwa Munlamuloni sabwani nimala okwa na merelo awale animaga wi nikale adhari a Mulugu n’ekalelo eswa, neddihiwaga na muya wokoddela ottiya na nlamulo nalebiwe wale.
7 Txini enalogihu? Nlamulo yottega? Nne-wene! Txibarene kohikalawo Nlamulo miyo kaddigaziwile yottega. Motagiha, kowiliwa Nlamulo kanalogile: “Kusilile yamwinya,” miyo kaddigasililile yamwinya.
8 Mbwenyi yottega, epura gari ya dhoruma, edditotelaga wira dhotedhene dhinfuna maningo; vahili nlamulo yottega kinavo owodha. *
9 Nlamulo nihinatti witiwa, miyo ddahikalawo vano vetiwe dhoruma, yottega ehiroma okalawo mbwenyi miyo ddihikwa.
10 Dhoruma dhobuwelimi wi dhinoddifiyiha wigumini, dhaddittukulela wukwani.
11 Mbwenyi yottega epura dhoruma wi eddikwekwette vina eddipe.
12 Nlamulo ttokoddela, dhoruma s’okoddela, sapama vina s’omyala.
13 Kuloga yapama jidditotele okwa? Nne-wene. Yottega jidditotele okwa, nlamulo ttapama vina nihiddoniha wi yottega yela odditotela okwa, vano dhoruma dhihiddoniha wopiha onna yottega.
14 Iyo ninoziwa wi Nlamulo tta Mulugu, mbwenyi miyo ddili womaningoni, ogulihiwe ninga mudhari wa yottega.
15 Miyo kaddinziwa dhinkosimi, kaddinkosa esile dhinfunemi, mbwenyi ddinkosa esile dhiniddemi.
16 Ddinorumela wi Nlamulo ttapama masiki ddihikosaga esile dhinfunemi,
17 mbwenyi kahiyo miyo onira, onira ji yottega eli na miyo.
18 Ddinoziwa wi mwa miyo, kuloga mmaningoni mwaga kamuli yapama; vowi miyo ddinofuna wira dhapama mbwenyi kaddinna ewodhelo yawiranawa.
19 Miyo kaddinwodha okosa dhapama dhinfunemi wira, ottiya ejo ddinkosa dhabure dhihinfunemi wira.
20 Akala ddinowira dhihinfunemi, kahiyo miyo onira, enira ji yottega eli mmaningoni mwaga.
21 Ddinowona nlamulo ntti mwa miyo: Ddigafunaga wira eli yapama enoddaddamela eli yabure.
22 Miyo txibarene mmurimani mwaga ddinoziveliwana nlamulo na Mulugu,
23 mbwenyi ddinowona nlamulo nina mmaningoni* mwaga ninviriganiha nlamulo nili muyubuweloni mwaga, nlamulo ntti ninoddittukulela okala mudhari wa yottega eli mmaningoni* mwaga.
24 Ntowa gani ninna miyo! Bani onobole maningo aga anddittukulela mukwani?
25 Ddinomutamalela Mulugu, sabwani ohiddobola amurumaga Yezu Kristu Nabuya wehu! Nona na yubuwelo yaga ddili mudhari wa nlamulo na Mulugu, mbwenyi na maningo aga ddili mudhari wa nlamulo na yottega.
Manota
^ Na egregu, “nvyanoni.”
^ Na egregu, “ehikwa.”
^ Na egregu, “nvyanoni.”
^ Na egregu, “nvyanoni.”