Akadda Roma 8:1-39
-
Muya wokoddela ononivaha egumi na ofuru (1-11)
-
Muya wa Mulugu ononikuluveliha wi nili ana a Mulugu (12-17)
-
Dhopaddutxiwa dhinojedha ofwanya ofuru wa ana Mulugu (18-25)
-
‘Muya wokoddela ononilogela’ (26, 27)
-
Okuweliwa na Mulugu ohinatti ofiya mudhidhiya (28-30)
-
Ahipemberha mwaha wa okwela wa Mulugu (31-39)
8 Nona, wotene ole oli mumodhani na Kristu Yezu kanvahiwa muladdu.
2 Sabwani nlamulo na muya ninvaha egumi mowiwanana na Yezu Kristu nihufurula munlamuloni n’ottega ninttukulela mukwani.
3 Nlamulo na Mizé kananna guru ya ouwobolani sabwani attu bawobana vina attegi, mbwenyi Mulugu omuruma Mwanaye onligana na attu wi agomihe yottega, dhahene attongaga yottega eli mmaningoni,
4 wi dhofuna dholigana dha Nlamulo dhakwanihedheye mwa iyo, ohiniwelela dhofuna dha maningo, mbwenyi oniwelela muya wokoddela.
5 Abale aniwelela dha maningo anubuwela dha maningo, mbwenyi abale aniwelela muya wokoddela anubuwela esile dhinakamihedha muyayá wira.
6 Wubuweletxa dha maningo onottukulela wukwani, mbwenyi wubuweletxa dha muya enofwanyiha egumi na murenddele.
7 Nigattiya maningo ehu oddawa wang’anela yubuwelo yehu ninokala amwiddani a Mulugu, sabwani maningo oddawa kanwodha wiwelela nlamulo na Mulugu, txibarene kanwodha-wene wiwelela.
8 Nona abale ankalawo mowiwanana na maningo, kanwodha omuziveliha Mulugu.
9 Ovano, nyuwo kamunkalawo mowiwanana na maningo, munkalawo mowiwanana na muya, akala txibarene muya wa Mulugu oli-wene na nyuwo. Mbwenyi akala muttu kanna muya wa Kristu, oddo kahiyo waye.
10 Mbwenyi akala muli mumodhani na Kristu muya onoukalihani agumi mwaha wa oligana, mbwenyi maningo ali okwene mwaha wa yottega.
11 Nona, akala muya wa Mulugu, odduwene onvenyihile Yezu mukwani olivi na nyuwo, wakakene ole onvenyihile Kristu Yezu mukwani onele ovaha vina egumi maningo enyu okwa mwaha wa muya waye onkala mwa nyuwo.
12 Nona abali, iyo kanimmageleliwa wiwelela maningo ottega;
13 akala munowiwelela maningo txibarene munokwa, mbwenyi mugapa merelo a maningo na muya wokoddela, munokalawo.
14 Mwebaribari, otene aneddihiwa na muya wokoddela wa Mulugu ana a Mulugu.
15 Nyuwo kamwakelile muya onukosani adhari, vina onukalihaniwo na wova, ottiya ejo nyuwo mwakelile muya onuwodhihani ottukuliwa wi mukale ana a Mulugu,* muya obo onoulogihani na lizu nawiweya: “Aba,* Babani!”
16 Muya wa Mulugu ononikuluveliha wi iyo nili ana a Mulugu.
17 Akala nili ana a Mulugu, ninele wakela dhilobo dhinanivahe Mulugu, ottiya ejo onele onivaha dhilobo dhinanvahiye Kristu, mbwenyi voroma jofuneya otabuwa na iyene wila nakele nttittimiho vamodha na iyene.
18 Ddinona wi matabuwo otene annifwanya ovanene kahiyo elo nigaladdaniha na nlivo ninddimuwa ninanivahe Mulugu musogorho.
19 Dhottanddiwa dhotedhene dhinomujedha Mulugu venjene wila awonihe anaye.
20 Dhottanddiwadhá kadhile ofuna wi dhihikane njedhelo na musogorho mbwenyi ddi Mulugu orumelihile, vano Mulugu muttongeliye, onivaha njedhelo,
21 mbwenyi dhottanddiwa kadhinakale vina mudharini mwa oddawa na okwa vano dhinele ofwanya ofuru wowakwana wa ana a Mulugu.
22 Pumwenemo ninoziwa wi ofiyedha ddabuno dhottanddiwa dhotedhene dhinobulela vina dhinowiwa opa.
23 Ottiya ejo iyo nihakela epaddi yoroma ya nlivo nehu oli muya wokoddela, masiki dhawene ninobulela mmurimani mwehu, oku nijedhaga nsaka ninfuna Mulugu onittukula wi nikale anaye; iyene owodhihile ejo mwaha wa Kristu onipitxela muttengo wa wobolelana maningo ehu.
24 Mvuneliwe iyo nihakela njedhelo nehu, mbwenyi njedhelo ninoneya kahiyo njedhelo n’ebaribari, ngani, muttu onjedhela dhavi elobo enoniye?
25 Mbwenyi akala ninjedhela ejile ehinonihu, nididelevi ojedhela n’ovilela.
26 N’ekalelo yakakene, muya wokoddela onowodha onikamihedha nigobana, iyo ninoziwa wi ninofuna olobela mbwenyi masaka meena kaninziwa enfunehu ologa munlobelonimwa, venevo muya wokoddela ononilobelela mudhidhi onobanihu nihiwodhaga ologa mazu ofwanyelela.
27 Mulugu ompepesa mirima, onoziwa vina esile dhinfuna muya sabwani muya obo onolobela mowiwanana na esile dhinafunana Mulugu abale ali ororomeleya.*
28 Iyo ninoziwa wi Mulugu onokosiha dhotene olaba mumodhani mwa opama wa abale animukwela, aboyá Mulugu ohakuwela ninga munfuneliye;
29 iyene oroma watanala abo, vina mudhidhiyá ohinatti olagiha wi awene anele okala dhahene ninga Mwanaye, ottiya eji vina mwanaye ddigakalile woroma vari va abali enjene
30 Iyene ohakuwela abale àsakuliliye, oharomola aligani abale àkuweliliye, omagomelowa iyene ohattittimiha abale àromoliliye aligani.
31 Niloge eni mwaha wa esidha? Akala Mulugu oli na iyo kito bani onaniwodhe?
32 Iyene koveleli oniperhekela mwanaye wi anikwele iyo notene, kito ottiya onivahavi Mwanaye kananivahe vina dhilobo dhina na murima wotene?
33 Bani onavaha muladdu abale asakuliwe na Mulugu? Mulugu ddinawira attu abo aligani.
34 Bani onattonge aboyá? Kawo! Kristu Yezu ddudduwene wakwelile, vina ovenyihiwe mukwani, ovano iyene oli omononi woja wa Mulugu, anilobelelaga.
35 Ekalawo enanimwalanihe na okwela wa Kristu? Makattamiho, masoso, ofwara-fwariwa, dala obe orameyeliwa guwo, dhowopiha, ottimbwini obe supadda, sinanimwalanihe na okwela wa Kristu?
36 Malebo anloga: “Mwaha wenyu ninoperhekeliwa okwa masiku otene, attu annoona ninga mabila anttukuleliwa omapeliwo.”
37 Mbwenyi mwa dhotedhene eso iyo ninopemberha mwaha wa ole onikwelile.
38 Miyo ddinokuluvela wi kavali elo enawodhe onimwalaniha na okwela wa Mulugu, nne okwa, nne egumi, nne anju, nne aguvernu, nne dhilobo dhovano, nne dhilobo dhamusogorho, nne owodha,
39 nne dhodhulu, nne dhavati, nne dhottanddiwa dhina, txibarene kuli elo enawodhe onimwalaniha na okwela wa Mulugu woneyile mwa Kristu Yezu Nabuya wehu.
Manota
^ Mazu a egregu, anaddiwana muttu onimuttukula mwana ohimbaliliye bamulebeliha wi akale waye.
^ Mazu Ebrayiko obe Eramayiko, antapulela “Eh Babani.”
^ Na egregu, “ali akoddeli.”
