Akadda Roma 9:1-33
9 Ninga namafwara wa Kristu, ddinloga ebaribari, kaddinozivala, sabwani mubuwelo* waga oneddihiwa na muya wokoddela onovaha onamoona wa esidhá.
2 Ddinokubanya vaddiddi, mudhidhi wotene ddinowiwa opa mmurimani mwaga.
3 Kowodheya ddanfuna omwalanihiwa na Kristu ninga muttu ogwihedhiwe ntowa wi ddapurihe abali aga, amudhaga omaningoni,
4 akadda Izrayel. Awene asakuliwa wi akuweliwege ana a Mulugu; Mulugu ohawoniha nttittimiho àvahaga nipagano, Nlamulo, dhopikirhela vina nttittimiho na omulabela.
5 Awene adhile munlogoni mwa azamani ehu, Kristu obudduwile munlogoni-mwene-mpo; attittimihiwe Mulugu mwa masaka otene, iyene onolamulela dhotedhene, mwa dhilobo dhotene. Amen.
6 Mbwenyi kahiyo yawi dhilogile Mulugu kadhakwanihedheyile. Sabwani kahiyo attu otene a Izrayel ali-wene “Izrayel.”
7 Kahiyo otene ali ana ebaribari mwaha wokala a ziza* na Abrahamu. Mulugu omwaddelile dhahi Abrahamu: “Ole onakuweliwe ziza* nawo, onadhe mwa Izaki.”
8 Eji enoniha wi ana omaningoni a Abrahamu kahiyo ana ebaribari a Mulugu, ottiya ejo ana abaliwe na nipikirhelo na Mulugu banoniwa ninga ziza* n’ebaribari.
9 Mulugu wahipikirhela dhahi: “Yaka endhawo nsaka ninga ntti ddinele wiyela vina ddinele onfwanyana Sara mwana.”
10 Ejiya kipadduwile mudhidhene obule bahi, epadduwa vina mukaanile Rebeka aima* na mulobwana mmodha, muzamani wehu Izaki.
11 Aimayá ahinabaliwa vina ahinaziwa yapama na yabure, Mulugu ohoniha wi onsakula mowiwanana na yogana yaye vina ejiya kiniwanana na merelo a Muttuyá,
12 Mulugu omwaddela Rebeka: “Munddimuwayá onakale mudhari wa mimayá.”
13 Dhahene ninga munlogela malebo: “Miyo ddimukwela Jakob, mbwenyi ddimwidda Ezaú.”
14 Ninaloge eni? Niloge wi Mulugu kahiyo woligana? Kahiyo mwenemo!
15 Mulugu ohiloga dhahi na Mizé: “Ddinele omweddela ttagaraga ole onafune miyo omweddela ttagaraga; ddinele omukanela supaje ole onafune miyo omukanela supaje.”
16 Ejo kindha mwaha wa ofuna vina mwaha wa guru dha muttuyá, mbwenyi mwaha wa ttagaraga ya Mulugu.
17 Malebo anloga dhahi mwaha wa Faraó: “Miyo ddihuttiya okalawo mwaha wa eji; wi ddoonihe owodha waga mwaha wa weyo vina nzina naga nivuwihiwe mwilaboni mwetemwene.”
18 Dhahene, Mulugu onomweddela ttagaraga ole oninfuniye, mbwenyi onomuttiya ovittukulela ole onfuna ovittukulela.
19 Nyuwo munoddivuza: “Mulugu onafwanyelanani attu dhovonya? Bani onwodha oviriganiha ejile enfuniye?”
20 Weyo oli ani, ofiyedha ompambiha Mulugu? Koddi ejile yubiwe enowodha ologa na namobaya: “Oddubeleni dhahene?”
21 Kamunziwa wi namuba okaana owodha wottukula ologo bubana yobo yattima, ologo wakakene bubana yobo ehinna ttima?
22 Yakakene, jikosile Mulugu, iyene ogana woniha owali na owodha waye oku àjedhelaga na ovilela abale ali ninga yobo enkoyeliwa otolotxiwa.
23 Mulugu okosa ejuwene wi awonihe ovuwa na nttittimiho naye ninddimuwa abale anfuniye waweddela ttagaraga, iyene ohasasanyedha wi àvahe nttittimiho.
24 Iyo nili abale àkuweliye, kahiyo Ayuda bahi, mbwenyi vina attu a malogo meena.
25 Dhahene ninga mulogeliye va Ozeya: “Ddinele wakuwela nlogo naga abale ahali ‘nlogo naga,’ vina ole wahakweliwa ddinele omukuwela ‘wokweleya’;
26 vina mburo vanlogiwanina: ‘Nyuwo kamuli nlogo naga.’ Anele okuweliwavo: ‘Ana a Mulugu oliwo.’”
27 Ottiya ejo, Izaiya ohiloga dhahi mwaha wa Izrayel: “Masiki ana Izrayel enjivilevi ninga mutxesa wa mbara, ang’onovi bahi banavuneye.
28 Sabwani Yehova onele wattonga abale ankala mwilaboni, iyene onele omaguviha ottongawa oku.”
29 Izaiya wahiloga dhahi: “Yehova Mulugu wa anyakoddo kohinittiyedha ziza,* nigahikala ninga Sodoma vina nigahiligana na Gomora.”
30 Ninaloge eni? Attu aba a malogo meena, ahilagiha nroromelo vina ahoniwa ninga aligani, masiki aweneya ahikosaga merelo oligana,
31 vina masiki Izrayel vakaniliye nlamulo n’oligana, kawodhile weddana nlamulona ntti mwigumini mwawa.
32 Sabwaya jani? Sabwani awene atagiha ofwara na merelo, ottiya olagiha nroromelo. Nona awene akwakwattuwa na “nlugu nokwakwattutxa”;
33 jijuwene enloga malebo eraga: “Moone! Ddinowimetxa o Sioni nlugu ninakwakwattutxa attu vina mwarha onamottiha attu, mbwenyi ole onaroromele nlugu ntti kanatxinuwe.”
Manota
^ Kang’ana Mazu Atapuleliwe.
^ Na egregu, “beu.”
^ Na egregu, “beu.”
^ Na egregu, “beu.”
^ Obe, “anakono.”
^ Na egregu, “beu.”
