Tiago 1:1-27
1 Tiago, mwimeleli wa Mulugu, na wa Nabuya Yezu Kristu, ddinolebela mahimo 12 amwadheyeli mwilaboni:
Mwakele malejelo!
2 Abalaga, mukanege ottaba webaribari mugafwanyiwaga dhoweha dhottiyana-ttiyana,
3 vowi munoziwa wila nroromelo nenyu nigehiwa, ninouwodhihani ovilela.
4 Vano muttiye wi ovilela wakwanihe mabasa enyu, wi mukale owakwana vina ohittega mwa dhilobo dhotedhene, muhijombeliwaga elo.
5 Nona, akala muttu kanna ononelamo, adidele omuloba Mulugu, sabwani iyene onowavaha otene na murima wotene, ahimukoddihaga,* dhahene onele ovahiwa ononelamowá.
6 Vano adidelege okumbirha na nroromelo, ahaganyedhaga elo, vowi ole onaganyedha onladdana na manebe a mbara antukumeliwa oku-n’oku na pevo.
7 Txibarene, muttu oddo kajedhele wakela nne ngafuna elobo modha endha wa Yehova;
8 sabwani kanziwa enfuniye vina kanfwara dila modha.
9 Mbali woviyeviha ahagalale* mwaha wa ottittimihiwa waye,
10 mureli ahagalale mwaha wa okurumutxiwa waye, sabwani mureli onele onyala ninga folori dha mmunddani.
11 Sabwani nzuwa nigoba, miri dhinowuma venevo foloridhá dhinomotta, okoddela wawa onogoma; yakakene vina mureli onele orimela vamodha na mabasayeyá.
12 Wohagalala ddule onvilelavi muwehiwani, sabwani agavilela wehiwa oko, onele wakela nlivo* na egumi, enavahe Yehova abale animukwelavi.
13 Muttu agehiwaga kaloge: “Mulugu ddinddeha.” Sabwani na dhilobo dhabure Mulugu kanehiwa nne vina kanimweha muttu.
14 Vano muttu ddi muttu onehiwa na dhifunelo dhaye dhotakala, dhinimmaga, dhinimukwekwetta.
15 Dhifunelo eso dhotakala dhigonuwa, dhinowita yottega, yottegayá egakosiwa, enofwanyiha okwa.
16 Abalaga okweleya, kamunyengetteye.
17 Mivaho dhotedhene dhapama vina dhowakwana dhindha odhulu, omvaha ddi Baba osasanyile txeza dha odhulu, odduwene ohinsadduwa ninga murunti.
18 Na ofuna waye onittandda na nzu na ebaribari, wi nikale ninga oromayá mwa dhottanddiwa dhaye dhotedhene.
19 Abalaga okweleya, muziwe eji: Muttu-muttu amaguvelege wiwa, vano kamaguvelege ologa vina kamaguvelege osilidhiwa,
20 sabwani osilidhiwa wa muttu kundhana oligana wa Mulugu.
21 Nona, muttiye mikalelo dhotedhene dhosilidhiwa vina dhotakala dhotedhene,* vano na okurumuwa, murumele wi nzu na Mulugu ninwodha ouvunani nikale mwa nyuwo.
22 Mukale attu anvirihamo nzu, ottiya okalelaga wiwavi, muvinyengettaga na dhubuwelo dhottambi.
23 Sabwani ole oniwa nzu ahivirihagamo onoligana na muttu onona kove yaye mu supeyoni.
24 Iyene onovyang’ana mwinya odhowa, agamala onodduwala ekalelo eliye.
25 Vano ole ompepesa n’ofwaseya nlamulo nowakwana ninfwanyiha ofuru, onoweddanavi; kankalela wiwavi bahi agamala adduwala, mbwenyi onovirihamo enlogani, iyene onele ohagalala na ejile enkosiye.
26 Akala muttu onubuwela wi onomwebedha Mulugu vano kanang’anela* nlumi naye, onovinyengetta mwinya, omwebedha waye Mulugu kwebewene.
27 Ekalelo yomwebedha Mulugu* eli yokoddela vina ehinna yotakala vamentoni va Mulugu vina Babihu jiji: Wakoya anapawe na ayana a amamukwela mmakattamihoni mwawa, vina okodda otakalihiwa na elabo ejino.
Manota
^ Obe, “ahimuhimedhaga.”
^ Na egregu, “aloge agayaga.”
^ Na egregu, “kara.”
^ Obe txino, “winjiva wa obure.”
^ Obe, “kammaga.”
^ Obe, “Relijiau.”
