Tiago 2:1-26
2 Abalaga, koddi munomuroromelavi Nabuya wehu Yezu Kristu ottittimihiwe oku mwattiyanihaga attu?
2 Sabwani akala vamatugumanoni venyu vanodha muttu omwabalile aneli wa woru mwibunoni vina wabalile guwo dha muttengo munddimuwa, adhá vina muttu woyelega wabalile guwo dhotakala,
3 koddi nyuwo munomwang’ana na nriho ole wabalile guwo dha muttengo munddimuwa, bammulogana dhahi: “Kagilati apa vamburoni vottittimiheya,” mugamala bamuloga na muyelegi dhahi: “Kakala wowimelene” obe “Kagilati apo mutxiddo mwa manyalo aga”?
4 Akala munokosa esuwene, kahiyo ebaribari wi munowattiyaniha attu vina munowattonga n’ekalelo yabure?
5 Kaddivuruwaneni, abalaga okweleya. Kahiyo ebaribari wi Mulugu wasakulile abale anoniwa mwilaboni mpuno ninga ayelegi wi akale areli munroromeloni vina anya a Omwene, obuwene wapikirheliye abale animukwela?
6 Vano nyuwo munowapwaza ayelegi. Kahiyo areli anutabutxani vina anuttukulelani mmatribunali?
7 Kahiyo abuwene anveyiha nzina n’ottittimiheya ninnenyu?
8 Akala nyuwo munovirihamo nlamulo ninddimuwa ninga munlogela malebo, “Omukwele muttu mukwawo ninga envikweliwe wamwinya,” munokosa yapama.
9 Mbwenyi akala munowattiyanihavi attu, munowiravi yottega vina munokoniwa na nlamulo ninga attegi.
10 Sabwani, akala muttu onowiwelela Nlamulo vano avonya elobo modha, onottegela nlamulo notene.
11 Vowi ole ologile, “Kulupe matelo,” ohiloga vina, “Kumpe muttu.” Nona, akala weyo kumlupa matelo mbwenyi onompa muttu, onottegela nlamulo.
12 Mulogege vina mukosege dhilobo dhotedhene ninga attu anattongiwe na nlamulo na nlogo n’ofuru.*
13 Sabwani ohinaweddela ttagaraga attu ena, onele ottongiwa aheddeliwaga ttagaraga; ttagaraga enddimuwa opitta ottonga.
14 Abalaga, muttu onloga wi ddikaana nroromelo ahinna merelo ompurana nni? Koddi nroromelo ntto ninowodha onvuna?
15 Akala mbali-mbalivi obe murogora-murogoravi onohikana yowabala* obe yoja enakwanela siku-nene-ntto,
16 nanda mmodha wa nyuwo ologa, “Kadhowa na murenddele, wafwanye yowabala na yoja ya siku” mbwenyi ahinvahile yowabala na yojaya, venevo okosilevo eni?
17 Dhahene vina, nroromelo bahi nihinna merelo, nihikwa.
18 Txino muttu onodha ologa, “Weyo okaana nroromelo, miyo ddikaana merelo; kaddilagihe nroromelo nawo nihinna merelo, miyo ddinele wulagiha nroromelo naga na merelo aga.”
19 Onorumela wi oli Mulugu mmodha bahi? Onokosa yapama. Vano adomonyo anorumela vina anogurumela.
20 Weyo muttu wotowa zelu, kunziwa wi nroromelo nihinna merelo kanimpurela elo?
21 Abrahamu, babihu keriwe muligani mwaha wa merelo mmaleliye omperheka mwanaye Izaki vebuwani?
22 Wone wi nroromelo naye, neddile vamodha na merelo aye; nroromelona nakwanihedheyile na merelo,
23 vina ahakwanihedheya mazu a malebo anloga: “Abrahamu omuroromela Yehova, nona ohoniwa ninga muligani” vina okuweliwa marho wa Yehova.
24 Moone wi muttu oneriwe muligani mwaha wa merelo, kahiyo na nroromelo bahi.
25 Yakakene Rahab jeberuwa, keriwe muligani sabwa ya merelo aye, mmaleliye wawakela pama anamarheza vina akamihedha ottawa aviraga dila yina?
26 Txibarene, dhahene ninga maningo ahinna egumi* ahikwa, yakakene vina nroromelo nihinna merelo nikwa.
