Tiago 4:1-17
4 Koddo na ohiwanana dhinoneya vari venyu, dhindha wuvi? Kadhindha na dhifunelo dhenyu dhomaningoni dhinwana mmaningoni mwenyu?
2 Nyuwo munofuna, mbwenyi kamunna. Munopavi vina munosililavi vano kamunwodha ofwanya dhinfunenyu. Munowanavi vina munorabavi koddo. Kamunna sabwani kamumkumbirha.
3 Mugakumbirha, kamunvahiwa sabwani mumkumbirhela na efunelo yabure wila mukosena dhifunelo dhenyu dhomaningoni.
4 Nyuwo attu ohiroromeleya,* kamunziwa wi wandana na elabo omwidda Mulugu? Nona, muttu onfuna wandana na elabo onokala mwiddani wa Mulugu.
5 Munona ninga malebo alogeli ebewene, dhahi: “Mmurimani mwehu muhidhala dhifunelo dhabure vina dha ntxiga”?
6 Vano, mahala amvaha Mulugu, mamddimuwa. Nona malebo agalogaga dhahi: “Mulugu onowawidda attu ovittukulela vano onowawoniha mahala aye attu oviyeviha.”
7 Nona, mmwiwelelege Mulugu muhimpambihaga; mbwenyi mmukodde Ddiabo, iyene onele outtawani.
8 Mmususele Mulugu, iyene vina onele oususelani. Nyuwo attegi, nawaní mada enyu, nyuwo attu a mirima minli, koddelihaní mirima dhenyu.
9 Karibiwani murima, mukubanye vina munle. Oteya wenyu okale wunla, ohagalala wenyu okale okubanya.
10 Mukale oviyeviha vamentoni va Yehova, iyene onele outtukuwihani.
11 Abali muttiye ologana bure muttu na mukwaye. Onimuloga bure mbalaye obe onimuttonga, onloga bure nlamulo vina onttonga nlamulo. Vano akala weyo onottonga nlamulo, kumvirihamo nlamulo mbwenyi oli namattonga.
12 Mulugu bahi ddinwodha Ogwiha Malamulo vina Ottonga, iyene ddinwodha onvuna muttu vina omutolotxa. Mbwenyi weyo, weyo oli ani ofiyedha omuttonga muttu mwina?
13 Ovano muddivuruwane nyuwo munloga: “Ddabuno obe mangwana ninele okosa oleddo nidhowe sidadi ejile, wenewo ninele omalawo yaka modha, nikose mpinddu vina niranjule kobiri,”
14 oku muhiziwaga mukalelo onakale egumi yenyu mangwana. Sabwani muli ninga kugu enoneya mudhidhi mung’onovi, ngamala orimela.
15 Ottiya ejo, mugahifwanyela ologa dhahi: “Yehova agafuna, ninele okalawo vina ninele okosa eji obe ejile.”
16 Mbwenyi empadduwa jawi nyuwo munogayana dhofuna eso dhenyu. Ovittukulela oku wetene kwabure.
17 Nona, akala muttu onoziwa okosa eli yapama masiki dhawene ahikosaga, onottega.
Manota
^ Obe, “ohiwananeyana.”
