Tiago 5:1-20
5 Ovano nyuwo murelile, muvuruwane, konlani, kakubanyani mwaha wa dhilobo dhabure dhinaufwanyeni.
2 Dhorela dhenyu dhimala ovudda, guwo dhenyu dhihijiwa oyetxe.
3 Woru yenyu na parata dhenyu dhimala ojiwa na mukwiti; mukwitiyá wawa onakale ezinddiyelo vamentoni venyu vina onele oja maningo enyu. Esile dhihugelenyu dhinakale ninga motto masiku omariha.
4 Moone! Kobiri yowapitxela anamalaba asinangile mindda dhenyu ekoddilenyu wavaha, enokuwa; okuwawa wa anamasinanga ankumbirha nikamihedho ofiya omaruni wa Yehova onasogorhela anyakoddo a wirimu.
5 Mwilaboni, nyuwo mwahikana egumi yottugareya, mukosaga esile dhauzivelani. Muhikuma dhahene ninga enama enjedhela siku n’opiwa.
6 Muhafugeliha, muhapa aligani. Mulugu kanziveliwa na nyuwo.
7 Nona abali, kalaní ovilela ofiyedha nsaka ninonihiwe Nabuya. Moone! Namalima onojedha milima dhapama dha mmunddani, ajedhelaga n’ovilela orubwa muzogwe woroma na muzogwe womariha.
8 Nyuwo vina kalaní ovilela; kalibihani murima sabwani nsaka ninadhe Nabuya ninowaddamela.
9 Abali, kamwabegena muttu na mukwaye* wila munattongiwe. Moone! Namattonga oli vamusuwo.
10 Abali, mwaha wa ovilela makattamiho vina okala opisa murima, kafwarani yotagiha ya anamavuhulela alogile na nzina na Yehova.
11 Moone! Iyo ninowawira ohagalala, abale anvilela. Muhiwa ologiwa mwaha wa ovilela wa Job vina muhona emuttuveli Yehova; muhona wila Yehova ddodhala nttebwa vina ddwa ttagaraga.
12 Ottiya dhotedhene esi, abalaga muhiddubelege muromolaga elobo eli wirimu, eli vati peno elobo yina, mbwenyi mazu enyu awi “Ndde” akale ndde, mazu awi “Nne” akale nne, wila munadhe ottongiwa.
13 Vari venyu okalavo muttu ontabuwa? Oddoyá adidelege olobela. Okalavo muttu oziveliwe? Oddoyá ebege jibo dha masalmo.
14 Okalavo muttu oli muredda vari venyu? Oddoyá akuwele anddimuwa a mmulogoni wila awene amulobelele, amuttikittelaga makura na nzina na Yehova.
15 Nlobelo ntto ninkosiwa na nroromelo, ninele omukosiha mureddayá* okala pama vina Yehova onele onvulumutxa. Ottiya ejo, akala wahikosa yottega onele oleveleliwa.
16 Nona kamuvubelagane dhottega dhenyu vina mulobelelagane muttu na mukwaye wila mvulumutxiwe. Nlobelo na ntidi ninkosa muttu woligana murima, nikaana ewodhelo enddimuwa.*
17 Eliya wali muttu ninga iyo, vano mulobeleliye na ntidi wila muzogwe ahirubwe, karubwile muzogwe mwilaboni mpule mwari mwa vyaka ttaru na myeri mitanu na mmodha.
18 Venevo, iyene olobela wili, muzogwe orubwa, mattaka abala milima dhawa.
19 Abalaga, akala mmodha wa nyuwo onokwekwetteliwa ottiya weddana ebaribari nanda mwina amukamihedha wiyela,
20 muziwe wi ole onimukamihedha muttegi wiyela dila yabure yafwariye, onele onvuna* mukwani vina onele okunela dhottega dhinjidhene.
Manota
^ Obe, “muhisumulelege.” Na egregu, “wunlana mmirimani.”
^ Obe txino, “wobanile.”
^ Na egregu, “nihikana guru enddimuwa nigalabaga mabasa.”
^ Obe, “ovuna egumi yaye.”
