Tito 1:1-16
1 Miyo Paulo, mwimeleli wa Mulugu vina murumiwi wa Yezu Kristu, mowiwanana na nroromelo ninna attu asakuliwe na Mulugu, vina na eziwelo yowakwana ya ebaribari eli mumodhani na omwebedha Mulugu na ororomeleya,
2 vina endhana njedhelo na egumi yohimala epikirheliwe wale na Mulugu ohinzivala;
3 mbwenyi mfiyedhe nsakana, nzu naye nihiziweya mwaha wa mabasa olaleya akuluvelihiwemi, mowiwanana na nikokomezo na Mvuni wehu, Mulugu.
4 Ddinoulebela weyo Tito mwanaga webaribari mowiwanana na nroromelo ninehu mumodhani:
Okaane mahala na murenddele ondha wa Mulugu Baba vina wa Kristu Yezu, Mvuni wehu.
5 Miyo ddihuttiya o Kreta wila osisigule esile dhafwanyela wogoleliwa vina wattome anddimuwa a mulogo sidadi ji sidadi, ofwaraga malago auvahilemi:
6 Munddimuwa wa mulogo onofuniwana ahikane yosumuleliwana, akale mulobwana onna muyana mmodha, anaye amuroromelege Mulugu, ahiziweyena mweddelo wabure vina wohiwelela.
7 Sabwani ninga mwimeleli ottomiwe na Mulugu, munddimuwa onsogorhela onofuniwana ohikana yosumuleliwana vina ahikale muliba ntidi nne ahikale muttu onsilidhiwa nomaguva, ahikale mulezeli, ahikale muwali,* nne vina ahikale muttu onziveliwa waranjula akwaye,
8 mbwenyi akale muttu onziwa wawakela aleddo, onkwela dhapama, wa malago, w’oligana, w’ororomeleya vina onziwa ovyang’anela.
9 Afwarege pama mazu ororomeleya a Mulugu agasunzihaga wi awodhe walibiha na masunziho apama* vina awodhe wasaddeya abale animpambiha.
10 Sabwani akalawo attu enji ahiniwelela, anloga dhotowa malago vina dhonyengetta, ttabwa-ttabwa abale anfwaravi yeddelo yotxetteliwa.
11 Jofuneya wafuga milomo, sabwani attu abo anodidela otolotxa mirala, asunzihaga dhilobo dhohifwanyelela wi àranjule attu.
12 Mmodha wa anamavuhulela awa, ohiloga dhahi: “Akadda Kreta attu anloga dhottambi mudhidhi wotene, anligana na dhinama dhowopiha dhamutakwani, awara vina amujani.”
13 Onamoona oko kwa ebaribari. Nona, wakokomezege na ntidi wila eddege pama munroromeloni,
14 vina ahigilatelege ovuruwana gahala dha Ayuda na magano a attu anttiya ebaribari.
15 Dhotedhene s’okoddela mwa abale ali okoddela, mbwenyi mwa abale ahili okoddela vina ahinna nroromelo, kayiwo elo eli yokoddela, vowi dhubuwelo na mubuweloyá * wawa dhihimala otakala.
16 Awene anologa vamentoni va muttitti wa attu wi anomuziwa Mulugu, mbwenyi merelo awa anowoniha wi aweneya anomukodda sabwani botakala vina kaniwelela nne kanrumelihiwa wira merelo apama.
