Tito 2:1-15
2 Vano weyo, odidele osunziha esile dhiniwanana na masunziho apama.
2 Alobwana owuluvala akale ovipimelela mwa dhotedhene, ororomeleya, anubuwela pama, anna nroromelo noliba, anna okwela, vina anvilela.
3 Yakakene, ayana owuluvala akaane mweddelo onimuttittimiha Mulugu, ahazivalelaga attu vina ahikosiwaga adhari a vinyu, asunzihege dhapama
4 wi àlage* ayana ali azombwe, wila ayanayá abo aziwe wakwela amamunawa vina wakwela anawa,
5 akale a malago, okoddela murima, azuzumelege ottidda mabasa a vatakulu, akale apama, anawiwelela amamunawa ahapambihaga, wila nzu na Mulugu nihilogiwe bure.
6 Yakakene, odidele wakokomeza azombwe a alobwana wi obuwelege pama
7 vina wakalele yotagiha mwa dhotedhene na merelo apama. Wasunzihe dhili dhapama, n’ororomeleya,
8 ologaga mazu apama ahinfwanyelela osumuleliwa wi abale ampambiha, atoteye manyazo, ahikane mwaha wa oniloga bure.
9 Adhari awiwelelege anabuyawa mwa dhotedhene ahapambihaga, atamelaga waziveliha vina ahawakulege na obure,
10 ahawiyelaga, mbwenyi onihaga wi anofwanyela okuluveliwa wila mwa dhotedhene akoddelihe masunziho a Mvuni wehu, Mulugu.
11 Sabwani Mulugu ohoniha mahala aye, adhagana ovuneya wa attu a ekalelo yotene.
12 Mahala abo anoniswagiha wila nirabele obure na dhifunelo dhotedhene dha mwilaboni wi nikalewo na dhubuwelo dhapama, n’oligana vina nimwebedhaga Mulugu mwilaboni mpuno,*
13 vina ninojedhela nipikirhelo nohagalaliha vina wonihiwa wa Mulugu wehu munddimuwa na wa Mvuni wehu, Kristu Yezu.
14 Iyene oviperheka mwaha wehu wila anivune mwa dhotedhene dhihiniwanana na nlamulo, vina anikoddelihe ninga nlogo naye nivisakuleliye, ninttidda mabasa apama na ntidi.
15 Odhowegevi ologaga esidhá, wakokomezaga* vina wasaddeyaga na owodha wotene. Kumuttiye muttu wupwaza.
Manota
^ Obe, “àkamihedhe okaana mweddelo wapama; àswagihe.”
^ Obe, “nsaka nttino.” Kang’ana Mazu Atapuleliwe.
^ Obe, “walibihaga.”
