Tito 3:1-15
3 Mwawubutxedhege wi awiwelelege aguverno na anddimuwa a mwilaboni vina akale omala-nawale wi akose mabasa otene apama,
2 ahalogege bure attu, ahikale anamatota kani mbwenyi akale ofewa murima, akurumuwelaga attu otene.
3 Sabwani iyo wale nàli attu otowa malago, avuruvuru, nahimala opupurutxiwa, nali adhari a dhifunelo vina nakosa esile dhanizivela bahi, nakala wiravi dhabure, nantxigana, nali attu otanyiwa vina nanniddana muttu na mukwaye.
4 Vano voneyile mahala na okwela wa Mvuni wehu, Mulugu, vari va nlogo na attu
5 iyene ohinivuna (kahiyo mwaha wa mabasa oligana erile iyo, mbwenyi mwaha wa ttagaraga yaye) na onihabiha onidhelena egumi vina mwa onikaliha attu aswa na muya waye wokoddela.
6 Iyene onivaha venjivene muya waye wokoddela mwa onirumela Yezu Kristu oli Mvuni wehu.
7 Iyene wireli wi nikale attu anna njedhelo na wakela egumi yohimala mowiwanana na nipikirhelo naye; ninele okaana egumi ejo mwaha wa mahala aye manddimuwa animukosiha iyene onona ninga attu oligana.
8 Mazu aba b’ebaribari vina ddinfuna wila odhowegevi osunzihaga esidhá wi abale animuroromela Mulugu obuwelege okosa mabasa apama, dhilobo esi s’apama vina dhinowapurihamo attu.
9 Mbwenyi orabele wakulana wotowa malago, ogilatela ologa mazina a azamani, owanawana vina opambihana mwaha wa Nlamulo, sabwani esidhá kadhimpurela elo.
10 Muttu onita nikuru omurabele ogamala omulaga dila modha, dila bili,
11 sabwani muttu oddo omala ottiya nroromelo, onottega avitotelaga muladdu mwinya.
12 Miyo ddigamuruma Artemaz obe Tíkiko odha wenewo, okose guru dhotedhene wi odhe oddone o Nikópoli, sabwani kuwenewo oganilemi okala nsaka n’oridha.
13 Osasanyedhe dhotedhene dhinfuneya wi Zenas, odduwene onziwa pama Nlamulo vamodha na Apolo, akosena oleddo wawa ahijombeliwe elo.
14 Wakokomeze vina abalihu wila awodhege ottidda mabasa apama na ntidi wi ahikane yojombeliwa agafuna okamihedha, dhawene kanobanele mabasa a Mulugu.
15 Otene ali vamodha na miyo anouperhekela malejelo. Waperhekele malejelo aga abalihu annikwela vina anroromela.
Mahala a Mulugu akale na nyuwo motene.
