Malebo Okoddela alebiwe na elogelo ya Ebrayiko, Eramayiko vina Egregu, vano anamalebayá avudheleliwe na Mulugu. Maleboyá atapuleliwa na vilogelo dhinjidhene wila “attu a malogo otene” apurelemo Mazu a Mulugu. (Mateu 24:14) Manivuru 27, oromana Mateu ofiyedha Ovuhulela ankuweliwa “Malebo a Egregu a Okristu,” sabwani vamaromo-vene àlebiwe na Egregu, vina alebiwe na Akristu àvudheleliwe na muya wokoddela wa Mulugu, akalilewo vyaka zana dhoroma N.K.

Otapuleliwa wa Bibilia wa Elabo Eswa wa Malebo a Egregu a Okristu, oromile oburutxiwa na elogelo ya Engelezi yaka ya 1950. Dhalabihedhiwe dholebiwa dha Egregu dhoziweyetxa dha Westcott na Hort, dhiniwanana na dholeba dhawale dha Egregu esuwene dhalebiwe na mada. Otapuleliwa wa Bibilia wa Elabo Eswa ohitapulela dholeba dha egregu n’ororomeleya. Bibilia oddu wa Etxuwabo otapuleliwe afwariwaga Bibilia wa Engelezi wa 2013, vina vahikosiwa guru wila atapuleliwe n’ekalelo y’ororomeleya. Efunelo yehu kahiyo ya omutapulela bahi Bibilia oniwanana na malebo oroma, mbwenyi vina ja omutapulela Bibilia onnoneleyamo vina ohinrutxa omwengesawa. Mitoma esi dha Apendisi “Gano dha Omutapulelana Bibilia,” “Ekalelo ya Bibilia Oddu” vina “Bibilia Owodhile Dhavi Okalawo Mpaka Nsaka Nttino” dhinotapulela gano dhina dha otapulelana dhifwariwe vina ekalelo enna Bibilia oddu.

Nzina na Mulugu, Yehova, nttuwene nihinligana na nzina nina, ninofwanyeya dila dhowakwana 241 mmaleboni a Otapuleliwa wa Bibilia wa Elabo Eswa wa Malebo a Egregu a Okristu. Onihaga ttima ya okoddelihiwa wa nzina na Mulugu vina ofuneya wa attu otene oromola nzina ntti wila avuneye, Bibilia oddu ohiyihedha nzina ntti Yehova mmiburoni dhotene mwafwanyeyani Mmaleboni Okoddela. (Mateu 6:9; Roma 10:13) Mutoma wa Apendisi “Nzina na Mulugu Mmaleboni a Egregu a Okristu” onotapulela mwaha dhing’onovi dhinittukuleli wika nzina Yehova mmaleboni.

Nzina ntti Otapuleliwa wa Bibilia wa Elabo Eswa, nindha mwa nipikirhelo na Mulugu na elabo eswa yoligana munfuna okala attu otene. (2 Pedro 3:13) Anamatapulela a Bibilia oddu, abuwene animukwela venjene Mwinya wa Bibilia, anoziwa wila akaana muttoro munddimuwa wa waziwiha pama attu dhubuwelo na mazu Aye, n’ekalelo y’ororomeleya mpaka vanwodhelani. Nona ninolobela wila Bibilia oddu àkamihedhe venjene abale antamela omusunza na murima wotene vina antamela okaana “eziwelo yowakwana ya ebaribari.”—1 Timóteo 2:4.