Abali na Arogora Okweleya:

Omukwela Mulugu ononittukulela ‘odhowa . . . wasunziha attu a elabo yotene wi akale anamafwara vina abatiziwe.’ (Mt. 28:​19, 20; Mk. 12:​28-31) Okwela webaribari onihuna na attu ena, okana ewodhelo yoddiginya mirima dha abale “athomeliwe egumi yamukalakala.”—Mer. 13:48.

Masaka amundduni, nanziveliwa okoya muyubuweloni mazu oromana makani. Ovano ninofwanyela wunuwiha ewodhelo yehu yoromana makani na attu ena. Ninfuna nilagihe wi ninowakwela modhela ologa makani anddiginya mirima dhawa. Eji entapulela wi jofuneya ovisasanyedha wi niwodhe osaddula makani mowiwanana na efunelo ya muttuya. Brochura ntti ninawukamihedhe dhavi?

Brochura ntti nikana masunzo 12 anlagiha mikalelo dhinfwanyelihu wunuwiha wi nitonyihedhe okwela vina nakose anamafwara. Nsunzo tti nsunzo nindela mBibiliani dhinloga mikalelo dha Yezu obe dha mukristu a masaka oroma anlagiha mabasa awa olaleya. Efunelo yehu, kahiyo yokoya muyubuweloni mazu oromana makani, mbwenyi otamela walagiha attu okwela. Ebaribari wi mikalelo esi dhotene dhinofuneya olabihedhaga mmalaleyoni, ovano ndoweni noneni ekalelani yamakamaka olabihedha mikalelo dhina nigaromaga makani, omwiyelela muttuya, obe nigeddihaga nsunzo na Bibilia.

Ogasunzaga nsunzo tti nsunzo, katanalela onawodhe dhavi olagiha mukalelo obule ogaloga na attu a mmuruddani munkaliwe. Katamela wunuwiha omukwela wawo Yehova vina attu ena. Ottiya elobo yina, okwela oku bunawukamihedhe wakwanihedha yogana yawo ya wakosa anamafwara.

Mwa iyo gari enddimuwa olaba vamodha na nyuwo. (Sof. 3:9) Ninomulobelela Yehova wi arurihe guru dhenyu dhawakosa anamafwara vina watonyihedha okwela!