1. Efunelo ya Yehova yali evi mwaha wa musasanyedho wa murala?

YEHOVA vaatelanihiye Adamu na Eva, Adamu wahilagiha ohagalala waye modheela ologa mazu okwela oroma alebiwe na mazu a Ebraiko. (Wita 2:22, 23) Txibarene, Muthanddi wannubuwela dhilobo dhinjidhene opitha wahagalalihavi ana aye a omuthu. Iyene wafuna wila atelani vamodha na mirala akosege efunelo yaye. Iyene wahapanga atelani ooroma wila: “Kalanina guru dh’obala, enjivihanani, dhalani mwilaboni, muthongemo. Mweddihe oba dha mbara, balame dhodhulu, vinama dhotene dhinedda mwilaboni.” (Wita 1:28) Nthi nali nibasa nothithimiheya vaddiddi vina noliva! Awene vamodha na anawa agadhilewo agahisanzaya vaddiddi kowiliwa Adamu na Eva ahikosa efunelo ya Yehova na wiwelela wowakwanela!

2, 3. Mirala dhinfanya dhavi osanzaya onddimuwa ovanene?

² Ddabuno vina, mirala dhinosanzaya vaddiddi dhigalabaga vamodhavi wila dhikose efunelo ya Mulugu. Murumiwi Paulo ohileba: ‘Omukwela Mulugu onopuriha dhetedhene: ononifwanyiha dhintamelihu vatapano, vina egumi yohimala.’ (1 Timóteo 4:8) Murala onkalawo na omukwela Mulugu vina obwene onfara mweeddihedho wa Yehova ninga mulogeliwani Mbibiliani onela osanzaya ‘mwigumini ya ovanene.’ (Masalmo 1:1-3; 119:105; 2 Timóteo 3:16) Masiki akala onthiddihedha mabasa magano a Bibilia vamuralani ddi muthu mmodha bahi, dhilobodha dhinoweedda deretu vañgonovi opitha kohikalavo nne ngafuna mmodha onkosa.

 ³ Nivuru nthi nihimala osekeserha magano menjene a Bibilia abene ankamihedha osanzaya wa murala. Ninga munooneyelani, muhoona yawila menaya mwa abene ahiiyeleliwa wili-wili mu nivuruni mpu. Sabwa yani? Sabwani anloga mitoma dha guru dha ebaribari esene dhinlabela oderetu wa athu otene mmikaleloni dhothiyana-thiyana dha egumi ya murala. Murala onwararela othiddihedha mabasa magano aba a Bibilia onowoona wila omukwela Mulugu txibarene, ‘onothiddeela nlibelo na egumi ovanene.’ Ndoweni noone wili magano aba manai a makamaka.

4. Oviwañganela okaleli eni waderetu mmateloni?

⁴ Mwene Salomau ohiloga: “Ohinziwa ovipimelela [mmirimani] oli ninga muthethe ohinna ngome, ohinrutxa olupeliwa.” (Gano dh’olelana 25:28; 29:11) ‘Ovipimelela mmirimani,’ oviwañganela, kwaderetu wa abale anfuna okaana matelo osanzaya. Ovivahedhela mobuwelo annonga, ninga owali obe edhivi-dhivi ya oraruwa, onela ononga dhilobo esene dhinathukule vyaka dhinjidhene wila dhisasanyedhiwe—akala dhinela-wene osasanyedhiwa.

5. Muthu womaningoni wohakwana awodhe dhavi wunuwiha ovithiyiha nanda txini enapuriyemo?

⁵ Txibarene, kavo mudhuli wa Adamu onawodhe wañganela kakamwe dhohakwana dha maningo. (Roma 7:21, 22) Na dhaenevi, oviwañganela obu musapo wa muya. (Galásia 5:22, 23) Vina, muya wa Mulugu onela wunuwiha oviwañganela mwa iyo nigalobelela ekalelo eji, nigathiddihedha mabasa magano ofanyeelela abene anfanyeya Mmaleboni, vina nigatugumanaga na athu ena abene anlagiha mukalelo obu vina abene anarabela abale ahinkosa ejilene. (Masalmo 119:100, 101, 130; Gano dh’olelana 13:20; 1 Pedro 4:7) Dila eji enela onikamiha ‘Othawa ojeberuwa,’ masiki akala ninonyengethiwa. (1 Korinto 6:18) Ninela okoodda otimbwini  vina ninela orabela obe opemberha olezela. Vina ninela wakwaniha na ofwasa nigasorhiwaga vina wakwaniha makalelo oorutxo. Ndoweni notene—otaganyiheya na aima—nisunze wunuwiha musapo obu waderetu wa muya.—Masalmo 119:1, 2.

6. (a) Otadeya wa omusorho wimetxile Mulugu buvi? (b) Mulobwana onfanyeela wubuwela eni akala omusorho waye onela odhana osanzaya va muralani vaye?

⁶ Nigano nanawili na makamaka ku oziwa omusorho. Paulo ohiloga mukalelo wofanyeela wa dhilobodha valogileye dhahi: “Apa ddinofuna munonelemo eji: Kristu ddi munddimuwa wa muthu-muthu [mulobwana], mulobwana ddi munddimuwa wa mwadhiye, Mulugu ddi munddimuwa wa Kristu.” (1 Korinto 11:3) Eji entapulela wila mulobwana ddinsogorhela vamuralani, mwadhiye ddili mukamihedhi wororomeleya nanda ana anowawiwelela amambali awa. (Éfeso 5:22-25, 28-33; 6:1-4) Koonani vina yawila, omusorho obu onsogorhela wusanzayani bahi ogakosiwaga na mukalelo wofanyeela. Amamuni abene ankalawo na omukwela Mulugu anoziwa yawila omusorho kayo omunyigala muthu mwina. Awene anomutagiha Yezu, Musorho wawa. Masiki Yezu vafanyeeliye okala ‘musorho wa dhilobo dhotedhene,’ iyene “kadhele wimeleliwa, odhele okala mwimeleli.” (Éfeso 1:22; Mateu 20:28) Na mukalelo woladdana, mulobwana oli Mukristu onkosa omusorho, kayo mwa oderetu wayevi, mbwenye wila atanaale dhofuna dha mwadhiye vina dha ana.—1 Korinto 13:4, 5.

7. Magano gani a Malebo anamukamihe muteliwi osoriha nibasa naye ninvahile Mulugu vamuralani?

⁷ Muyana onfara omukwela Mulugu kankosa mapoka obe kantamela omulamulela mamunaye. Iyene onosanzaya okala mukamihedhi wa mamunayeya vina olaba na iyene. Mudhidhi mwina Bibilia onomuloga  muteliwi ninga ‘onthukuliwa’ na mamunaye, elagihaga yawila iyene ddi musorho waye txibarene. (Wita 20:3) Modheela matelo muyanaya onodha okala mutxiddo mwa “nigano n’otelana, [na] mamune.” (Roma 7:2) Mudhidhi wakakene, Bibilia onimutxemerha okala “mukwaye” vina “womwakwanela.” (Wita 2:20) Muyana onoperheka mikalelo vina thotho dhintuwa mamunaye vina onovaha nikamihedho ninfuneya. (Gano dh’olelana 31:10-31) Vina Bibilia onloga wila muteliwi ddi ‘mukwaye-mukwayeya,’ oddwene onlaba vamodha na mamunaye. (Malakiya 2:14) Magano aba a Malebo anomukamiha mamuni vamodha na muteliwi otamaalela nibasa na kadda muthu, orihana vina othithimihana muthu na mukwaye.

8, 9. Katapulelamo magano mena abene anakamihe athu otene a vamuralani wogola thotho dhawa dha opangana.

⁸ Mu nivuruni mpu ofuneya wa opangana onothukuleliwa vadhulu wili-wili. Sabwa yani? Sabwani dhilobo dhinlaba deretu athuya agalogaga vina agavuruwanaga txibarene muthu na mukwaye. Wili-wili ehikokomeziwa wila opangana kwa athu eeli. Namasunza Tiago ologile dhahi: “Muthu-muthu ethekele maru wiwa, kaguvele wakula.”—Tiago 1:19.

⁹ Vina jofuneya okalela txenjewa mukalelo onlogihu. Mazu a owali, owakulana, obe osumulela vaddiddi kankosiha opangana waderetu. (Gano dh’olelana 15:1; 21:9; 29:11, 20) Masiki akala enlogihuya ehikala, egalogiwaga na mukalelo wa otabala, wovithukula obe s’ohawubuwela athu ena podi wanyimula athu ena othiya wakamiha. Makani ehu anofanyeela okala aderetu, “ozivela zelu.” (Kolosi 4:6) Mazu ehu anofanyeela okala ninga “yobo ya parata yabalelihiwe visangu dha nddarhama.” (Gano dh’olelana 25:11) Mirala dhinsunza opangana deretu dhinowaddamela vaddiddi ofanya osanzaya.

10. Mukalelo gani wa okwela oli waderetu mmateloni?

¹⁰ Nzu nthi “okwela” ninothwanyuwa wili-wili mu nivuruni mpu. Munowubuwela mukalelo wa okwela onlogiwa txibarene? Ja ebaribari yawila okwelana wa mulobwana na muyana (Egrego, éros) onofuneya mmateloni, vina mmateloni oweeddeleya deretu, nzivelo nddimuwa vina omarho (Egrego, filía) onowunuwa vari va mamuni na mwadhiye. Mbwenye vina wa makamakaya ku okwela ontxemerhiwa na nzu na Egrego ninloga agápe. Oku ku okwela onkaanehu vamentoni va Yehova, va Yezu vina va amwaddamani ehu. (Mateu 22:37-39) Oku ku okwela onlagihedha Yehova nlogo na athu. (Joau 3:16) Jaderetu vaddiddi yawila iyo vina ninowodha olagiha mukalelo wakakene wa okwela na mukwehu wa mmateloni vina wakwela ana!—1 Joau 4:19.

11. Okwela onlabela dhavi oderetu wa matelo?

¹¹ Mmateloni, okwelana oku wa vadhulu vaddiddi txibarene ku “wiwanana wa athu.” (Kolosi 3:14) Onowamaga vamodhavi atelani nanda onowakosiha ofuna okoselana oderetu muthu na mukwaye vina wakosela ana awa. Mirala dhigagumanaga na makathamiho oorutxa, okwela onowakamiha otanaala dhilobodha mowiwanana. Venevo vanuluvala atelaniya, okwela onowakamiha olibihana vina otamaalelana muthu na mukwaye. ‘Okwela kunkumbela vaye, onororomela dhilobo dhotene, onowaroromela etene. Okwela kunamale-wene.’—1 Korinto 13:4-8.

12. Omukwela Mulugu onkaana atelani onlibiha dhavi matelo awa?

¹² Wiwanana wa mmateloni onlibetxa makamaka ogatxithiwa na omukwela Yehova othiya okwelanavi wa atelani bahi. (Kohelét 4:9-12) Sabwa yani? Murumiwi Joau ohileba: “Omukwela Mulugu, kuloga ovirihamo malamulo aye. Malamuloyá kanlémela.” (1 Joau 5:3) Dhaene, atelani anofanyeela wasunziha ana awa  omukwela Mulugu kayo sabwa ya awene wakwela ana awa bahi na murima wotene mbwenye sabwa yawila nthi nlamulo na Yehova. (Olibiha 6:6, 7) Awene anofanyeela okoodda ogonihana wonyakuwa kayo sabwa ya okwelana muthu na mukwaye bahi mbwenye sabwa yawila txibarene anomukwela Yehova, oddwene ‘onfuna wakona anira dhoraruwa na dhotakala dhina.’ (Ahebreu 13:4) Masiki akala mmodha onotota makathamiho manddimuwa vaddiddi mmateloni, omukwela Yehova onela omuthukulela oddo mwina osorihagavi magano a Bibilia. Txibarene mirala dhosanzaya si esile muli okwelana muthu na mukwaye okwene onfwasedha omukwela Yehova!

13. Wimela wila nikose efunelo ya Mulugu onakamihe dhavi athu ofwasedha dhilobo dha makamaka txibarene?

¹³ Egumi yotene ya Mukristu enfwaseyela okosa efunelo ya Mulugu. (Masalmo 143:10) Ji ejene entapulela txibarene omukwela Mulugu. Okosaga efunelo ya Mulugu onokamiha mirala ofwasihedha mento ejile eli yamakamaka txibarene. (Filipi 1:9, 10) Motagiha,  Yezu ohilaga: “Ddidhela omugudulaniha mwana na babe, mwana-muyana na maye, muwenya na nyezelaye. Dhahene amwiddani a muthu andha okala amudhaye-ene.” (Mateu 10:35, 36) Mowiwanana na nlago na Yezu enjene mwa anamafara aye anofarafariwaga na athu a murala wawa. Ja thagaraga vina enopa vaddiddi! Masiki dhaene, mafunddo a murala kanfanyeela okwaranya omukwela wehu Yehova Mulugu na Yezu Kristu. (Mateu 10:37-39) Akala muthu onvilela masiki na opambiha wa murala, anamapambihaya txino podi osadduwa agoonaga dhodhavo dhaderetu dha omukwela Mulugu. (1 Korinto 7:12-16; 1 Pedru 3:1, 2) Masiki akala kimpadduwa kawiwo oderetu wogoneela onkaaniwa nigathiya omwimelela Mulugu sabwa ya opambihiwa.

14. Ofuna okosa efunelo ya Mulugu onakamihe dhavi amambali okosavo elobo mwa oderetu wa ana awa?

¹⁴ Okosaga efunelo ya Mulugu onowakamiha amambali okosa dhosakula dhaderetu. Motagiha, mmiruddani dhiina amambali anoziveliwa wawoona ana ninga okoya yuma, nanda anowakuluvela ana awa wila anela watanaala agoluvala. Masiki eji vakalilani yaderetu vina yofanyeela ana owunuwelavo watanaalaga amambali awa owuluvala, moonelo obu kunfanyeela walibiha ana awa okaana egumi enziveliwa vaddiddi okaanetxa mazanga. Amambali kanakamiha anawa akala anowasunziha oziveliwa okaanetxa opitha dhilobo dha omuyani.—1 Timóteo 6:9.

15. Eunise mai wa Timóteo okalile dhavi yotagiha yaderetu ya mambali oddwene okosile efunelo ya Mulugu?

¹⁵ Yotagiha yaderetu mwaha wa eji ddi Eunise, mai wa muzombwe Timóteo marho wa Paulo. (2 Timóteo 1:5) Masiki vateliwiye na muthu wohikala Mukristu, Eunise vamodha na Lóide bibi wa Timóteo, na mukalelo woweeddeleya deretu ahimulela Timóteo owararela omukwela Mulugu. (2 Timóteo 3:14, 15) Timóteo bonuwile deretu, Eunise ohimuthiya Timóteo othiya  takulu wila athukule mabasa a olaleya Omwene ninga misionario marho wa Paulo. (Merelo 16:1-5) Txino wahiziveliwa vaddiddi omoona mwanaye okala misionario wa guru! Omukwela waye Mulugu ninga muthu wowunuwelavo walagiha osunzihiwa waderetu okwene waniyena oromana wuhimani. Txibarene, Eunise wanziveliwa vina wan’hagalala sabwa ya wiwa miselu dha ororomeleya wa orumiwi wa Timóteo, masiki txino vanukeliwiye okala na iyene vatakulu.—Filipi 2:19, 20.

16. Ninga mwana, ozuzuma gani wofanyeela walagihile Yezu, ki efunelo yaye yoroma yali evi?

¹⁶ Yezu waleliwe vamuralani wamukwela Mulugu, nanda ninga muthu wowunuwelavo, wahilagiha ozuzuma wofanyeela wa mwana na mai waye. (Luka 2:51, 52; Joau 19:26) Txibarene, efunelo yoroma ya Yezu yali osoriha efunelo ya Mulugu, wa iyene eji yantaganyiheya na wafugulela athu dila wila ajevo egumi ya mukalakala. Eji iyene wakosile mwaperhekeliye egumi yaye yowakwana ninga yobolo wa nlogo na athu.—Marko 10:45; Joau 5:28, 29.

17. Njeedhelo gani nothithimiheya na dila yororomeleya ya Yezu nifuguleliwe abale ankosa efunelo ya Mulugu?

¹⁷ Yezu bamalile okwa, Yehova ohinvenyihedha egumi ya odhulu nanda banvaha mpaddo munddimuwa, musogorhomwa bamuthoma okala Mwene mu Omweneni wa odhulu. (Mateu 28:18; Roma 14:9; Ovuhulela 11:15) Mukutho wa Yezu ohawodhiha athu ena osakuliwa wila alamulele na iyene mu Omweneni obo. Vina mukutho obu ohifugulela nlogo notene nowogowa murima, ohagalala na egumi yowakwana velaboni ya vati yowiyihedhiwa ekalelo ya paraizu. (Ovuhulela 5:9, 10; 14:1, 4; 21:3-5; 22:1-4) Modha mwa gari enddimuwa enna iyo ddabuno ku ologa na amwaddamani ehu bili eji yaderetu yothithimiheya.—Mateu 24:14.

18. Mubutxedho gani vina nlibiho gani ninvahiwa mirala vina athu otene?

 ¹⁸ Ninga mulagihedhi murumiwi Paulo, okalagawo na omukwela Mulugu onothiddeela nlibelo nawila athu anela wakela mareeliho a ‘egumi ejo enda.’ Txibarene, obu bu mukalelo waderetu vaddiddi wa ofanya osanzaya! Kobuwelani wila “elabo na dhowunlela dhaye dhetene, dhinovira; onira enimfunana Mulugu, onokalawovi.” (1 Joau 2:17) Vina, peno akala muli mwana, babi obe mai, muteli obe muteliwi, muziye wowunuwelavo ona ana obe ohinna ana, kalibelani okosa efunelo ya Mulugu. Masiki mugakala mutxiddo mwa makathamiho obe akala munogumana na makathamiho manddimuwa, txipo kamudduwale wila nyuwo muli mudhari wa Mulugu wokalawo. Dhaene, kathiyani wila merelo enyu amuhagalalihe Yehova. (Gano dh’olelana 27:11) Vina kathiyani wila mweeddelo wenyu wudheelanina osanzaya ovanene vina egumi ya mukalakala mwilaboni ejo eswa enda!