1, 2. (a) Matelo athanddeliwe ogoneela mudhidhi mungasi? (b) Enwodheya dhavi?

MULUGU mwamugumanihedhiye mulobwana na muyana woroma vamateloni, kavaali-wene mutonyo wawila ogumanihiwa okule wali wovira. Yali yawi Adamu na Eva akale vamodha okalawo wawa wotene. (Wita 2:24) Matelo ana nthithimiho vamentoni va Mulugu ba ogumana wa mulobwana na muyana. Oraruwa wothabwa bahi wa muthu mmodha obe oheeli, ku okwene onkala sabwa ya omwalana vakalaga dila ya muthu otela obe oteliwa wili.—Mateu 5:32.

² Enowodheya athu eeli okalaga vamodha na osanzaya mwari mwa mudhidhi mwinjene? Indde enowodheya, nanda Bibilia onotonya dhilobo obe mifugulo mili dha makamaka dhinwodhiha ejene. Akala oheeli anolabihedha esene, anela ofugula musuwo wa osanzaya vina mareeliho menjene. Mifugulo esi txini?

3. Makalelo gani mararu a okwela onfanyeela okaaniwa na athu atelanile?

³ Mfugulo woroma ku okwela. Mohagalaliha, mBibiliani muhikala makalelo oothiyana-thiyana a okwela. Mukalelo mmodha ninaddiwana nzivelo ninkaana muthu na mukwaye, mukalelo wa okwela onkaanelana amarho a vamirimani. (Joau 11:3) Mukalelo mwina ku okwela onkaanelana amudhi. (Roma 12:10) Wanoraru ku okwela woddengutxa murima onkaana muthu  agamwañganaga oddule wa yano yothiyana. (Gano dh’olelana 5:15-20) Txibarene, makalelo aba otene anofanyeela okaaniwa na mamuni vina mwadhiye. Mbwenye ohikala mukalelo wanonai wa okwela, olitxi wa makamaka opitha esi dhiromoliwe.

4. Mukalelo wanonai wa okwela buvi?

⁴ Mu elogelo ya wale ya Malebo a Egrego a Okristu, nzu nilabihedhiwe mukalelo obu wa okwela thi a·gá·pe. Nzu nthi ninolabihedhiwa va 1 Joau 4:8, veneva vampangiwa iyo dhahi: “Mulugu ddi okwela.” Mohaganyedha, “ninomukwela Mulugu, vowi ddi iyene oromile onikwela.” (1 Joau 4:19) Mukristu onkaana okwela oku voroma na Yehova Mulugu agamala na athu akwaye. (Marko 12:29-31) Nzu nthi a·gá·pe ninolabihedhiwa  vina va Éfeso 5:2, vanloga dhahi: “Eddagani mukwelani, mumfwaraga Kristu onikwele, ovilevele iyo mwinyene.” Yezu walogile wila mukalelo obu wa okwela ogahazinddiyeliha anamafara aye a ebaribari: “Mugakwelanaga, [a·gá·pe] athu etene anoziwa wi muli anamasunza aga.” (Joau 13:35) Koona vina yawila olabihedhiwa wa nzu a·gá·pe va 1 Korinto 13:13: “Ovano dhikalawo dhilobo esi tharu: orumela, ororomela, okwela; enddimuwayávo, okwela [a·gá·pe].”

5, 6. (a) Okwela okaleli eni onddimuwa opitha nroromelo na njeedhelo? (b) Sabwa gani dhiina dhinkamihedha okwela matelo okala a mukalakala?

⁵ Txini enkosiha okwela oku a·gá·pe okaletxa onddimuwa opitha nroromelo vina njeedhelo? Sabwa yawila okwela oku onlamuliwa na magano—magano ooligana—anfanyeya mu Nzu na Mulugu. (Masalmo 119:105) Nthi nzuzumelo na murima, na wakosela athu ena ejile enfanyeela vina ekalile mmooneloni mwa Mulugu, peno akala oddule onkoseliwaya onofanyeela obe kanfanyeela. Okwela oku onowawodhiha abale atelanile ofaraga nlago na Bibilia: “Muvilelagane, mulevelelagane dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya.” (Kolosi 3:13) Atelani ankwelana ahikaana vina anofanyeela okaana ‘okwela [a·gá·pe] onddimuwa muthu na mukwaye, sabwani okwela onokuneela muthithi wa dhothega.’ (1 Pedro 4:8, NM) Koona yawila okwela onokuneela dhothega. Kungomiha dhothega, vowila kuli muthu wohakwana ohinviriganiha.—Masalmo 130:3, 4; Tiago 3:2.

⁶ Atelani agamukwelaga Mulugu vina mukalelani, matelo awa anokala a mukalakala vina oosanzaya, sabwani “okwela kunamale-wene.” (1 Korinto 13:8) Okwela thi ‘nifunddo n’owakwana.’ (Kolosi 3:14) Akala weyo ohitela obe ohiteliwa, owodhe dhavi na mukwawo okaana mukalelo obu wa okwela? Mwengesege vamodha Nzu na Mulugu bamugalogela. Musunze yotagiha ya  Yezu ya okwela vina mmutagihege, mubuwelege vina mukosege dhilobo ninga iyene. Mowenjedha, mudhowege omatugumanoni a Okristu, wenewo onsunzihiwa Nzu na Mulugu. Mulobelelege vina nikamihedho na Mulugu vina mukaane okwela oku onddimuwa, okwene oli musapo wa muya wokoddela wa Mulugu.—Gano dh’olelana 3:5, 6; Joau 17:3; Galásia 5:22; Ahebreu 10:24, 25.

7. Nriho txini nanda bani onfanyeela okaana nriho vamateloni?

⁷ Akala athu eeli atelanile anokwelana-wene, venevo anela orihana, nanda nriho bu mfugulo wanawili wa matelo oosanzaya. Nriho nintapuleliwa ninga “wahelamo athu ena, wathithimiha.” Nzu na Mulugu ninowalaga Akristu otene, vamodha na amamuni na ayana yawi: “Muzuzumelege othithimihana.” (Roma 12:10) Murumiwi Pedru ohileba dhahi: “Nyuwo vina amamuni, mwalemézege awadhinyu, vowi mukalelo wawa bofewa opitha wenyu.” (1 Pedro 3:7) Muyana onolagiwa wila “amurihege mamune.” (Éfeso 5:33) Akala onofuna omuthithimiha muthu, weyo onomukosela oderetu, bugariha ethomo yaye vina moonelo waye, vina bugafuna elobo ji elobo yofanyeela enukumbirhiye.

8-10. Bavi makalelo mena ankamiha nriho wimetxa vina osanzayiha matelo?

⁸ Abale anfuna osanzaya na matelo anomuriha muthu otelaniyena modheela okoodda ‘ozuzumela yayevi [dhawavi], mbwenye vina atabuwelege dha akwaye [athu atelananina].’ (Filipi 2:4) Kantamela elobo ekalile vamentoni vawa bahi, ejene egakalile omukumbela vaye. Mbwenye, anotamela vina ejile enimukalela mukwawa. Txibarene, awene anowika ejene vamburoni voroma.

⁹ Oriha onela wakosiha atelani ozinddiyela othiyana wawa wa moonelo. Kinfanyeela ojeedhela wila athu eeli akaane moonelo wakakene mwa dhilobo dhotene. Txino  enoona mamuni wila ja makamaka, txino kayo ya makamaka wa mwadhiye nanda ejile enziveliwa muyana txino kayo ejile enziveliwa mamuni. Mbwenye kadda muthu onofanyeela oriha moonelo vina dhosakula dha mukwaye akala dhili mwari mwa malamulo vina magano a Yehova. (1 Pedro 2:16; Filémoni 14.) Mowenjedha, kadda muthu onofanyeela oriha ethomo ya muthu mukwaye akooddaga omukosiha mukwaye otitihiwaga obe obeddiwaga, vari va athu obe moviteya.

¹⁰ Indde, omukwela Mulugu vina okwelana vamodha na orihana si mfugulo mili wila matelo eeddeleye deretu. Ki mifugulo esi dhithiddihedhiwe dhavi mabasa mu dhipaddini dhilitxi dha makamaka dha matelo?

11. Mowiwanana na Malebo, vamateloni musorhoya bani?

¹¹ Bibilia onnipanga wila mulobwana ohithanddiwa na mikalelo dhinimukamiha okala musorho waderetu wa murala. Dhaene ddi mulobwana onakula vamentoni va Yehova mpaddi wa omuyani vina wa omaningoni wa mwadhiye vina ana. Ddinfanyeela osakula dhilobo mowañgananiha, esene dhiniwanana na ofuna wa Yehova vina akale yotagiha ya mweddelo wa muthu onimulaba Mulugu. “Ateliwi àkurumuwelege amamunawa n’ekalelo enimukurumuwelani Nabuya. Mamuni ddi musorho wa mwadhye, n’ekalelo eli Kristu musorho wa Mutugumano.” (Éfeso 5:22, 23) Mwa dhaene, Bibilia onloga wila mamuni ohikaana vina musorho, Odduwene ona onddimuwa vadhulu vaye. Murumiwi Paulo olebile dhahi: “Ddinofuna munonelemo eji: Kristu ddi munddimuwa wa muthu-muthu, mulobwana ddi munddimuwa wa mwadhye, Mulugu ddi munddimuwa wa Kristu.” (1 Korinto 11:3) Mamuni wa zelu onosunza mukalelo wa osogorhela modheela otagiha musorho waye, Kristu Yezu.

12. Yotagiha gani yaderetu yimetxile Yezu ya wiwelela na osogorhela?

 ¹² Yezu vina ohikaana musorho, ddi Yehova nanda Onomwiwelela oddwene. Yezu ologile dhahi: “Miyo meka kaddinwodha wira elo. Ddinthonga ddimvuruwanaga Baba.” (Joau 5:30) Eji yotagiha yaderetu vaddiddi! Yezu ddi “muthaji wa dhopaddutxiwa dhotene.” (Kolosi 1:15) Ohidha okala Mesiya. Ddi oddwene agadhile okala Musorho wa mulogo wa Akristu athikitheliwe vina Mwene osakuliwe wa Omwene wa Mulugu, vadhulu va anju otene. (Filipi 2:9-11; Ahebreu 1:4) Masiki na mpaddo obu wothukuwa vina majeedhelo manddimuwa, mulobwana Yezu kaali mutabala, worutxa omulabawa obe woruma bure. Kaali namalamula, mudhidhi wotene bagawubutxedha anamasunzaye yawila anfanyeela omwiwelela. Yezu wankwela vina wali wa thagaraga makamaka na apwaziwi. Walogile dhahi: “Nyuwo motene mulemile, mukukumuwile mudhe vali miyo, ddinoulibihani. Mpwathele muthorho waga, sunzaní dhinira miyo, ddinna murima wofwasa, wokurumuwa. Dhahene munofwanya osanzaya. Kanga yaga kinwoma, muthorho waga kunlemela.” (Mateu 11:28-30) Okala na iyene wanziva.

13, 14. Mamuni wokwela onasogorhele dhavi momutagiha Kristu?

¹³ Mamuni onfuna okaana murala wosanzaya onofanyeela osekeserha merelo aderetu vaddiddi a Yezu. Mamuni waderetu kayo mutabala vina wolamuletxa, bagalabihedha onddimuwa waye ninga kupukupu wila amujerihena mwadhiye. Mbwenye, onomukwela vina onomuthithimiha. Akala Yezu wali wa “murima wofwasa,” mamuni onofanyeela-wene okaletxa dhaene, sabwani mothiyana na Yezu, mamuni onovonya. Agakosaga dhaene, onofuna ononelamo wa mwadhiye. Noona, mamuni woviyeviha agaviriganiha onorumeela masiki vanrutxani ologa wila “oddilevelele; walogile deretu ddi  weyo.” Muyana oniweleletxa musogorhelo wa mamuni woviyeviha ompitha oddule wovithukulela vina wonyindda. Sabwa ya ejene, muyana wa nriho agaviriganiha onokumbirha vina nlevelelo.

¹⁴ Mulugu omuthanddile muyana na mikalelo dhaderetu vaddiddi dhinwodhiye olabihedha wila akamihedhe okalavo matelo oosanzaya. Mamuni wa zelu onela ozinddiyela ejene nanda kanamunyigalege. Ayana enjene anokaana thagaraga vina ntanaalo, mikalelo dhinfuneya mwa otanaala murala vina owaraliha mandanelo a omuthu. Ninga mumpadduwelagani, muyana ddinziwetxa okoddeliha vatakulu bukala mburo woziva okalavowa. “Muyana wa murima” onlogiwa va Gano dh’olelana kapitulu 31 wahikaana mikalelo dhinjidhene dhotikiniha vina thotho dhowumiha milomo, nanda murala waye wampuramo esene. Sabwa yani? Sabwani murima wa mamunaye “onomukuluvelana dhetedhene.”—Gano dh’olelana 31:10, 11.

15. Mamuni awodhe dhavi omukwela vina omuriha mwadhiye ninga mwakoseli Kristu?

¹⁵ Mmeeddeloni mena, onddimuwa wa mamuni onowikiwa vadhulu bure mpaka onvuza elobo wooniwaga ninga otuwa nriho. Txino onimweeddiha mwadhiye ninga mudhari. Musogorhelo wabure ninga obu kunimwandaniha na mwadhiye vina na Mulugu. (Kaladdaniha na 1 Joau 4:20, 21.) Mpaddi mwina, amamuni ena anopwaza osogorhela, bagathiya awadhiwa okosaga mabasa otene a murala. Mamuni onimwiwelela Kristu mofanyeela kanimuthapatha mwadhiye obe kanimwakiha ethomo yaye. Mbwenye onotagiha okwela wovimana wa Yezu nanda onokosa ninga mulageli Paulo yawi: “Nyuwo amamuni mwakwelege awadhinyu, n’ekalelo ekwelile Kristu Mutugumano, ovileveliye mpaka opeliwa.” (Éfeso 5:25) Kristu Yezu wannakwela vaddiddi anamafaraye mpaka opeliwa abene. Mamuni waderetu onela otamela otagiha ekalelo eji yoviperheka, bagatamela  oderetu wa mwadhiye othiya okalaga omulamulelavi omukoselaga dhilobo. Mamuni agamwiwelelaga Kristu bagalagiha okwela vina nriho ninga na Kristu, mwadhiye onela otomowa yeka bagamwiwelela.—Éfeso 5:28, 29, 33.

16. Mikalelo gani dhinfanyeela muyana olagiha mu wandanani mwaye na mamune?

¹⁶ Mudhidhi dhahi mumaleli Adamu opaddutxiwa, “Nabuya Mulugu ologa dhahi: ‘Kinkala mulobwana okala yeka; ddinomvaha mukwaye woladdana na iyene [mukamihedhi].’” (Wita 2:18, NM) Mulugu ompaddutxile Eva ninga ‘mukamihedhi,’ othiya okala namavurhana. Kayafuneya wila matelo akale ninga paporo ona akazembe eeli ampambihana. Yafuneya wila mamuni asogorhelege na okwela, nanda muyana bagakwela, bagariha vina bagewelela na murima wotene.

17, 18. Makalelo gani mena anwodha muyana okala mukamihedhi watxibarene wa mamunaye?

¹⁷ Mwa dhaene, muyana waderetu kankalela wiwelelavi. Onotagiha okala mukamihedhi watxibarene, bagamukamiha mamunaye mwa esile dhinsakuliye okosa. Txibarene muyana agarumeelaga esile dhinsakula mulobwana, okosawa ejene kunrutxa. Masiki akala kanrumeela, nikamihedho naye na guru ninokamihedha ejile esakulile mamunaye weeddeleyetxa deretu.

¹⁸ Muyana onowodha omukamiha mamunaye okala musogorheli waderetu mmikaleloni dhiina. Onowodha otamaalela guru dha mulobwana dha osogorhela, othiya omusumulelaga obe omukosihaga wiwa wila txipo kanda akosaga mowakwanela esile dhinfuniye. Ageeddaga na mamunaye na mukalelo wofanyeela, muyana onofanyeela wubuwela yawila ekalelo ‘yofwasa, ya murenddele, ji ekalelo yathima vamentoni va Mulugu,’ kayo vamentonivi va mamunaye. (1 Pedro 3:3, 4; Kolosi 3:12)  Kito akala mamuniya kayo mwiweleli? Peno akala mwiweleli obe kayo, Malebo anowalibiha ateliwi “wakwela amamunawa na anawa, akale amalago, anziwa winanela, anzuzumela dha vatakulu, anpisa murima, anakurumuwela amamunawa. Dhahene kawo onabedde nzu na Mulugu.” (Tito 2:4, 5) Akala vanopadduwa mwaha onfanyeela olabihedha mubuwelo, mamuni mamunivi ohili mwiweleli onvuruwanetxa yimelelo ya mwadhiye akala ejene enologiwa na ‘mazu oofwaseya vina na erhemezo.’ Amamuni ena ahili eweleli ‘anokukusiwa s’ohilogiwana elo, modheela mweddelo wa awadhiwa, sabwa ya woona mweddelo wawa wotxena vamodha na nriho nddimuwa.’—1 Pedro 3:1, 2, 15; 1 Korinto 7:13-16.

19. Kito akala mulobwana onomukumbirha mwadhiye olupa nlamulo na Mulugu?

¹⁹ Kito akala mamuni onomukumbirha mwadhiye okosa elobo enkooddiha Mulugu? Akala ejene enopadduwa, muyana onofanyeela wubuwela yawila Mulamuleli waye woroma ddi Mulugu. Onotagiha ejile yakosile arumiwi mwapangeliwani na anamathonga wila alupe nlamulo na Mulugu. Merelo 5:29 onloga dhahi: “Peduru na arumiwi akwaye amwakula: ‘Enfuneya kumurumela Mulugu opitha athu.’”

20. Epaddi gani ya makamaka enfuna okwela vina nriho?

²⁰ Okwela na nriho sofuneya mu epaddi yina ya matelo—wiwanana. Mamuni onkwela onela ologa makani na mwadhiye mwaha wa mabasaye, makathamiho aye vina mukalelo onooniye dhilobo dhinjidhene. Muyana onofuna ejene. Mamuni ontamela mudhidhi baloga na mwadhiye nanda bavuruwana-wene esile dhinlogiye, onolagiha wila onomukwela vina onomuriha. (Tiago 1:19) Ayana ena anolila na mmirimani bagela amamunawa kanlogetxa na awene. Eji elobo yokubanyiha. Jebaribari yawila mmasakani aba odhaala dhokosa,  amamuni anolaba mudhidhi mwinjene otakulu wa murala nanda otuweya wa kobiri txino onomukosiha muyana ogumela vina ganyo. Mbwenye athu atelanile anofanyeela okoyelana mudhidhi. Ejene egahikosiwe, anakalegewo vawa-vawa. Venevo mmodha agatamela omarho otakulu wa matelo, panatoteyanivo makathamiho oothidda motho.

21. Ologa wofanyeela onkamihedha dhavi okalavo matelo oosanzaya?

²¹ Mukalelo oniwanana amamuni na awadhiwa bwa makamaka. “Mazu oziva . . . anothapiriha murima, anovaha guru dhiswa.” (Gano dh’olelana 16:24) Peno akala mmodha mwiweleli obe kayo, ninolabihedheyavi nlago na Bibilia: “Makani enyu azivege malabo otene, bagaddungihiwa na munyu,” kuloga wila na muzivelo waderetu. (Kolosi 4:6, Nipagano Nipsya) Akala mmodha onokaana siku norutxa, mazu mañgonovi a nzuzumelo a mukwaye anokosa oderetu vaddiddi. “Mazu anlogiwa vanfwanyelani, anokoddela ninga yobo ya parata yabalelihiwe visangu dha nddarhama.” (Gano dh’olelana 25:11) Lizu na mazuya vina musakulelo wa mazuya bwa makamaka vaddiddi. Motagiha, na mukalelo wosilidhiwa vina wa olamula, muthu podi ompanga mukwaye dhahi: “Kafuga musuwo obule!” Mbwenye na mazu ‘ooddungihiwa na munyu’ anlogiwa na mukalelo wokurumuwa vina na lizu nononeleyamo egakalile dhahi: “Ddinowukumbirhani wila mfuge musuwo obule.”

22. Makalelo gani anfuna atelani wila vakale wandana waderetu?

²² Wiwanana waderetu onkalavo vagakalaga mazu oofewa, wañganana wozivela mmentoni na merelo aderetu, oddiddi, ononelamo vina wovelela. Modheela olabaga na guru wila vakalege wiwanana waderetu, oheeli mamuni na muyana anela okala ootapuwa oziwihana esile dhinfunani nanda awene podi okala nipara na nipangarhazo vina nikamihedho mukalelani mmidhidhini  dhonyoonyeya vina segedho. Bibilia onokokomeza dhahi: “Mwapangarhaze akukumuwile.” (1 Tesalónika 5:14) Onokala midhidhi dhinkukumuwa mulobwana vina midhidhi dhinkukumuwa muyana. Awene podi ologa na ‘opangarhaza,’ modheela olibihana.—Roma 15:2.

23, 24. Okwela na nriho onkamiha dhavi vagakala magudulano? Kavaha yotagiha.

²³ Athu atelanile ankwelana vina anrihana kanoonege ovaanyihana wotene ninga nikathamiho. Anela owararela okoodda ‘oludduwelana na owali.’ (Kolosi 3:19) Oheeli anofanyeela wubuwelaga yawila “wakula wofewa onovugula owali.” (Gano dh’olelana 15:1) Okale pasope wila onanvevihege obe omukonege mukwawo oddwene onutapulela esile dhiniwiye mmirimani. Mbwenye, woonege mazu aba ninga mudhidhi wa ononelamo moonelo wa mukwawo. Vamodha, katamelani ologela magudulano enyu bamugomiha na murenddele.

²⁴ Kobuwela mudhidhi wamukumbirhile Sara mamunaye Abramu marhe a ogomihana muladdu dhahi wakoodda wiwanana na ofuna wa Abramu. Masiki dhahilene, Mulugu wahimpanga Abramu yawila: “Kakosa dhetene dhinuloba Sara.” (Wita 21:9-12) Abramu wahikosa-wene dhahilene venevo bareelihiwa. Mwakakene, akala muteliwi onologa mukalelo onooniye elobo mothiyana na ejile yatanaalela mamunaye, onofanyeela ngafuna onvuruwana. Mudhidhi wakakene, muyana kanfanyeela owadela makaniya, mbwenye onofanyeela vina ovuruwana esile dhinfuna ologa mamunaye. (Gano dh’olelana 25:24) Ogakalile vina otuwa okwela vina otuwa nriho kowiliwa mulobwana obe muyana onodidela dila dhotene wila esile dhinfuniye dhikosiwege.

25. Wandana waderetu onkamihedha dhavi okalavo osanzaya mu dhipaddi dha mba dha vamateloni?

²⁵ Wandana waderetu kofuneya vina va magonelo.  Owetela vawo vina otuwa muddidda podi ononga kakamwe wiwanana oku olitxi wa vawoka vamateloni. Vanofuneya makani anlogiwa motapuwa vamodha na ovilela. Kadda muthu agatamelaga oderetu wa mukwaye, ogonihana kunkala-wene nikathamiho. Mwa ejene, ninga vina mu dhilobo dhiina, ‘muthu-muthu azuzumele ya mukwaye.’—1 Korinto 7:3-5; 10:24.

26. Masiki matelo otene vanakaanani makwakwathuwo vina mareeliho, ovuruwana Nzu na Mulugu onakamiha dhavi atelani okaana osanzaya?

²⁶ Nzu na Mulugu ninovaha nlago naderetu vaddiddi! Txibarene, matelo otene anela okaana makwakwathuwo vina mareeliho. Mbwenye atelaniya agewelelaga mubuwelo wa Yehova ninga muvuhuleliwani mBibiliani, bagandana modheela okwela vina nriho na magano, anowodha okaana nikuluvelo nawila matelo awa anela okala a mukalakala vina oosanzaya. Dhaene kankalela othithimihanavi, mbwenye vina anela omuthithimiha Muthanddi wa matelo, Yehova Mulugu.