1, 2. Satana olabihedhi dhavi ntowa vina oredda wila atamelagana ononga nroromelo na Job?

MULOBWANA Job onofanyeela-wene wikiwa mwari mwa abale akaanile egumi yosanzaya vamuralani. Bibilia onimutxemerha munddimuwa “mwa athu otene akala epadde yomadhelo wa nzuwa.” Wahikaana ana alobwana atanu na eeli na anayana araru, otene bakala kumi. Wahikaana vina mazanga a okalihana deretu murala waye. Ya makamakaya jawila wansogorhela mabasa a mpaddi womuyani vina wanzuzumela yimelelo ya anaye vamentoni va Yehova. Dhotene esi dhahigumaniha muralaya bukala wosanzaya.—Job 1:1-5.

² Ofuma wa Job wahooniwa na Satana, muwogo munddimuwa wa Yehova Mulugu. Satana, oddwene ontamela mudhidhi wotene marhe a otolotxa nroromelo na adhari a Mulugu, wahinvoreya Job modheela ononga murala waye wosanzaya. Mumaleliye “omugwihedha Job eredda enddimuwa yamutotela vilodda, oromana omyeddo mpaka omusorho.” Dhaene Satana wafuna alabihedhe ngovi vina oredda wila anongena nroromelo na Job.—Job 2:6, 7.

3. Eredda ya Job yana mpelo gani?

³ Bibilia kanromola nzina na eredda ya Job. Mbwenye onoromola mpeloya. Maningo aye ahidhaala mitipa nanda thebeya bikaana makaka vina yammomorowa. Mwano mwannuka nanda maningoya ahikaana efiri. Wanniwa opa vaddiddi.  (Job 7:5; 19:17; 30:17, 30) Mu goyini Job wagilati vamunddurani bagavivala na nikalipathi. (Job 2:8) Yali elobo yoweeddiha thagaraga vaddiddi!

4. Mudhidhi na mudhidhi mirala dhotene dhimpadduweliwaga eni?

⁴ Ogakosile dhavi kofanyiwa eredda ninga ejene? Nsaka na ovanene Satana kanagwihedha adhari a Mulugu eredda ninga mwakoseliye na Job. Masiki dhaene, sabwa ya ohakwana wa omuthu, dhozuzumiha dha egumi ya siku na siku, vina onongeya wa mburo onkalihu, jojeedhela yawila mudhidhi na mudhidhi anamudhi anela obulela. Masiki na obazedha orabela maredda okuwene onkosihu, notene ninobulela masiki añgonovi bahi vantabuwani mpaka apale vali Job. Eredda egafiya vatakulu vehu, eji enorutxa-wene. Ndoweni noone mukalelo onnikamiha Bibilia omwakwaniha mwiddani oddu onkala na nlogo na athu.—Kohelét 9:11; 2 Timóteo 3:16.

5. Anamudhi ankosa dhavi vagakala eredda yovira?

⁵ Peno sabwaya ekale eni, osadduwa wa mweeddelo wa ntakulu, dila dhinjidhene onorutxa thabwa-thabwa akala osadduwawa ototeyi na oredda wogoneela. Masiki eredda yovira enofuna masadduwo, wiwanana vina guru. Txino agumi vamuralani anofanyeela omaala wila oddule oli muredda avume. Txino anofanyeela onyanyala dhokosa dhiina. Mowenjedha, mmiralani dhinjidha aima añgono anomweeddela thagaraga mbalawa obe mambaliwa ombulela, masiki dila dhiina vanfanyeelani wubutxedhiwa okaanaga ntanaalo. (Kolosi 3:12) Egakala eredda yovira, murala bovisasanyedhene wila operheke ejile enfuneya. Nanda kadda muthu  wa vamuralani onjeedhela otanaaliwa mwakakene agakala muredda.—Mateu 7:12.

6. Dila dhiina merelo gani anooneya akala muthu mmodha wa vamuralani onogweliwa eredda enddimuwa engoneela?

⁶ Kito akala ereddaya enddimuwa vaddiddi nanda osadduwawa onddimuwa vina wogoneela? Motagiha, Ki akala muthu ohikwa vyano na derrame, wokathamiheya na eredda ya Alzheimer obe bobana na eredda yina? Obe ki akala muthu onogweliwa eredda enviriganiha ogogo ninga esquizofrenia? Voroma anamuralaya anoweeddiwa thagaraga, okubanya wawila mukweliwi wawa onotabuwa venjivene. Mbwenye thagaraga enofareliwa na merelo mena. Venevo vanoona anamudhi yawila anosegedheya vaddiddi nanda ofuru wawa onovuguwa sabwa ya eredda ya muthu mmodha, txino anoroma onyoonyeya. Txino anotikina bagaloga dhahi: “Ejene empadduwela eni na iyo?”

7. Mwadhi Job wakosile eni na eredda ya mamunaye, nanda ninga munooneyelani wadduwalile eni?

⁷ Enkala ninga elobo yakakene yahidha mmusorhoni mwa mwadhi Job. Kobuwela yawila wahimala okweliwa anaye. Na ngovi esilene dhampadduweli morurumutxa, mohaganyedha wela ozuzumavi. Omagomelowa vamooniliye mamunaye waligi wa  guru bana eredda yopa vaddiddi vina yonyakuwa, wakala ninga wahidduwala etagano ya makamaka yatotiha ngovi esile dhotene—wandana wana iyene vina mamunaye na Mulugu. Bibilia onloga dhahi: “Venevo mwadhiye ologane: ‘Apo ogamuroromelavi Mulugu? Kamuroromelevi [kamuulumele], okwe vyawo!’”—Job 2:9.

8. Mmudhi agakala muredda vaddiddi, nlebo gani ninakamiha anamudhiya ena okaana moonelo wofanyeela?

⁸ Athu enjene anonyonyeya mpaka oludduwa egumi yawa egasadduliwa vaddiddi na eredda ya muthu mwina. Masiki dhaene, Mukristu oddwene ontanaalela mwahaya omagomelowa onofanyeela ozinddiyela yawila ejene enonvaha mudhidhi wa olagiha okwela waye watxibarene. Okwela wa txibarene ‘onovilela, onoakoddelela murima athu . . . [vina] kunkumbela vaye . . . Onoziwa ovunela dhetene, onororomela dhetene, onovilela dhetene, onokuluvelavi dhosogorho.’ (1 Korinto 13:4-7) Othiya orumeela dhubuwelo dhihikalile olamulelaga, jofuneya nikose mpaka apale vanwodhihu wila nañganelege esene.—Gano dh’olelana 3:21.

9. Nikuluvelo gani ninwodha okamiha murala mpaddi wa omuyani vina womaningoni akala muthuya mmodha muredda vaddiddi?

⁹ Vakosiwe eni wila mpaddi wa omuyani vina womaningoni wa murala owaralevi, muthuya mmodha agakala muredda vaddiddi? Ja txibarene yawi kadda eredda ehikaana mutanaaliwoya vina musasanyedhiwoya noona kigakalile deretu mu nivuruni mpu okokomeza masasanyelo a osipitale obe matanaalo a vatakulu. Mbwenye mpaddi wa omuyani, Yehova “onowalibiha ondeyile guru.” (Masalmo 145:14) Mwene Davidi olebile dhahi: “Wagari ddule onimutanala musegedheyi; agadha  okameya, Nabuya onomvuna. . . . Nsaka n’obulela, Nabuya onomukaliha vakuguluni vaye.” (Masalmo 41:1-3) Yehova onowavuna adhari aye omuyani, masiki akala anowehiwa mpaddi wa omaningoni mpaka olupa guru dhawa. (2 Korinto 4:7) Athu enjene a vamuralani abene ambulela vaddiddi vatakulu vawa anoromolaga mazu a munasalmo: “Nabuya, ddisegedheya venjene; ddivenyihedhení murima waga bari mazu enyu.”—Masalmo 119:107.

10, 11. (a) Eli yofuneya txini akala murala onofuna wakwaniha eredda? (b) Muyana dhahi wakwanihile dhavi oredda wa mamunaye?

¹⁰ Gano dhahi ya Bibilia enloga: “Muredda agalibiha murima, onovulumuwa; agavithabwiha, onimvenyiha bani?” (Gano dh’olelana 18:14) Segedho podi opuranya ekalelo ya murala ninga ‘ekalelo ya muthu.’ Mbwenye “murima wofwasa onkala egumi ya muthu.” (Gano dh’olelana 14:30) Akala murala onowakwaniha deretu eredda enddimuwa obe kunakwaniha, ejene eli na ekalelo ya anamudhiya.—Koona Gano dh’olelana 17:22.

¹¹ Muyana dhahi wa Mukristu wahivilelana omoona mamunaye bobanile na derrame muvireli vyaka tanu na modha batelanile. Onowubuwela dhahi: “Nlumi na mamunaga nahimageya nanda ologa na iyene wanrutxa. Ddankosa guru vaddiddi mmusorhoni wila dditamele ononelamo dhalogiye na goi.” Katanaalela vina otabuwa na onyonyeya wa mamunayeya. Atelani aba akosile eni? Masiki vakalani wolapela na mulogo wa Okristu, murogori oddule wahikosa mpaka vawodhiye wila akale owaralene mpaddi wa omuyani modheela wengesa mipaganyo dhiswa dha nikuru na Yehova vamodha  na oja wa omuyani onda mmarevistani A Sentinela na Despertai! Ejene yahinvaha guru ya omuyani wila amutanaalege mamunaye oddwene wamukweliye, mpaka okwa waye vyaka nai musogorhomwa.

12. Ninga mooneyelani mwaha wa Job, dila dhiina nikamihedho gani ninvaha oddule ombulela?

¹² Mwaha wa Job, wali wolibene ddi iyene watabuwa. Wahinvuza mwadhiye dhahi: ‘Iyo ninowakelaga dhapama dhinnivaha Mulugu; ki nihakele dhabure?’ (Job 2:10) Mohaganyedha namasunza Tiago wahimuromola Job ninga mulobwana wa yotagiha vina ovilela wokala vaddiddi vamodha na ovimana! Va Tiago 5:11 ninowengesavo dhahi: “Nyuwo muhiwa ologiwaga ovilela onddimuwa wa Jobi, muhiwa edhile omuthuva Nabuya omamalelowá. Ndde, Nabuya ddodhala thagaraga na nthebwa.” Na mukalelo wakakene nsaka na ovanene, mwa dhopadduwa dhinjidhene, ekalelo yoliba murima ya mmudhi ombulela ehakamiha athu ena vatakuluva okaanavi etanaalelo yofanyeela.

13. Oladdaniha gani ohinfanyeela okosa murala ona muthu ombulela?

¹³ Athu enjene aakwanihile oredda vamuralani anorumeela yawila omaromo anorutxiwa wakwaniha ebaribari ejuwene elivo. Anoromola vina yawila mukalelo onoona kadda muthu mwahaya, bofuneya vaddiddi. Masadduwo vina dhowogola mmweddeloni wa murala txino dhinorutxa omaromowa. Mbwenye akala muthu onokosa-wene guru, onowodha olemeela nipadduwo nthi niswa. Mwa okosa ejene, jofuneya wi nihiladdanihege mikalelo dhehu na dha athu ena abene ahina muredda vatakulu, nubuwelaga wila egumi yawa kinrutxa nanda ‘iyo ninopuzeya!’ Mwatxibarene, kavo onziwa-wene mithorho dhimpwathela athu ena. Akristu otene  anopangarhazeya na mazu a Yezu: “Nyuwo motene mulemile, mukukumuwile mudhe vali miyo, ddinoulibihani.”—Mateu 11:28.

14. Esile dhinfanyeela oromiwa dhinlamuliwa dhavi?

¹⁴ Akala vanopadduwa eredda enddimuwa, murala onofanyeela wubuwela mazu aba obuwelihiwe: “Osogorha wa mabasa oli na ovuza zelu.” (Gano dh’olelana 15:22) Egahikala deretu anamudhi ogumana balogela esile dhintoteya sabwa ya oredda? Egahifanyeela-wene okosa ejene na nlobelo vina otamela musogorhelo wa Nzu na Mulugu. (Masalmo 25:4) Txini egalogeliwe veneva? Mukalelo onfuna opitxiwa kobiri dha osipitale vina esile dhinfuna ogana murala okosa. Bani onfuna omutanaaletxa mureddaya? Murala wiwananege dhavi wila omukamihe oddule ontanaaletxa? Masasanyedho aba akosiwe anfuna ompatha dhavi kadda mmudhi? Dhofuneya dha omuyani na dhiina dha muthu oddu onimutanaaletxa muredda dhinfuna otanaaliwa dhavi?

15. Nikamihedho gani ninvaha Yehova mirala dhina muthu ona ereda enddimuwa?

¹⁵ Omulobelela Yehova na murima wotene bamugamukumbirha zelu, otanaalela Nzu naye vina weeddaga na oliba murima mu dila entonyihedha Bibilia dila dhinjidhene onoreeliha opitha mpule munjeedhelihu. Txino eredda ya mmudhi kinvola. Mbwenye osunzaga dha Yehova dila dhinjidhene onokamiha mmakathamihoni otene. (Masalmo 55:22) Munasalmo olebile dhahi: “Vanthabwa miyo odhugudheya, opangaraza wenyu oddiridhiha murima.”—Masalmo 94:18, 19; koona vina Masalmo 63:6-8.

16, 17. Dhitagano gani dhinwodheya oromoliwa aima agapangiwaga obulela wa mbalawa?

¹⁶ Eredda enddimuwa enowodha watotela makathamiho ana vamuralani. Jofuneya amambali wakamiha anawa ononelamo dhofuneya dhitoteyilevo vina ejile enfanyeela okosa anaya wila akamihe. Akala mureddaya mwana, abalaye akamihiwe ononelamo yawila sabwa ya muredda otanaaliwetxa kuntapulela yawila awene kankweliwetxa. Othiya ototeyavo ya mmirimani, amambali podi wakamiha ana ena okala mumodhani bagakaana nzivelo natxibarene venevo vankamihedhani otanaala mazuzumiho ampaddutxa eredda eji.

¹⁷ Amambali agafiyedha murima, othiya watapulela dhilobo gwe dhorutxa mwaha wa masasanyedho a sipitale, aima añgono anela wakulela mohirutxa vina na omaguva. Venevo agahifanyeela otapuleliwamo vañgono ejile enimpadduwela mmudhi oli muredda. Akala anowoona yawila eredda enomukathamiha mureddaya okosa dhilobo dhinjidhene dhinkosa mugumi, panakaanetxani ‘thagaraga’ vina ‘otabuwelagana.’—1 Pedro 3:8.

18. Aima anddimuwaya akamihiwe dhavi ononelamo makathamiho antoteya na eredda nanda apuremo dhavi ejene?

¹⁸ Aima anddimuwaya akamihiwe oziwa yawila vahikala nzuzumiho, nthi ninofuna wila otene vamuralani avibarabajule. Sabwa ya kobiri dhinfanyeela opitxiwa osipitale, txino amambali kanawodhe wasapela ana ena ninga munfunelani. Aima aba ena anofanyeela okaana ya mmirimani bagoona yawi anowimaniwa? Obe anononelamo wila vahikala nzuzumiho, bagafuna ovibarabajula ninga munfuneyelani? Eji eli na mukalelo  ologeliwe mwahaya vina ekalelo elitxi vatakuluva. Ja txibarene wila mmiralani dhinjidhene eredda ya mmudhi ehakamiha ana osunza ofaraga nlago na Paulo: “Muhire elo-ene na murima wa mavurhano, wovithithimiha; muthu-muthu na ovyeviha onddimuwa awonegena akwaye thima enpitha yaye. Ahizuzumelege yayeví, atabuwelege vina dha akwaye.”—Filipi 2:3, 4.

19, 20. (a) Asogorheli a mirala ana mabasa gani mmudhi agabulela? (b) Masiki Bibilia vahiliye nivuru ninsunziha dhosipitale, makalelo gani anvahiye meeddihedho a otanaalana eredda?

¹⁹ Akristu ana mpimo kankoodda masasanyedhiwo a osipitale agahigudulanege na nlamulo na Mulugu. Mmudhi wawa agabulela, anorumarumela otamela nikamihedho wila avumihe goi ya namabulela. Masiki dhaene, dila dhiina vanokala masasanyedhiwo a osipitale antota makani. Abene anofanyeela wañgananihiwa. Mowenjedha, mu vyaka dha ovanenevi maredda maswa na dhoviriganiha musorho dhinopadduwa na rurumutxa. Dhinjidha kadhina murobwe onziweya. Masiki analizi onthidda deretu ereddaya onorutxa ofanyawa. Kito Mukristu onfanyeela okosa eni?

²⁰ Masiki namaleba mmodha wa Bibilia vaaliye ñganga vina murumiwi Paulo vanvahiliye mukwaye Timóteo nlago naderetu na ovulumutxana eredda, Malebo ansogorhela mpaddi wa omuyani vina wa omaningoni, kayo nivuru ninsunziha dhosipitale. (Kolosi 4:14; 1 Timóteo 5:23) Noona mwaha dha osipitale, asogorheli a mirala dha Okristu anofanyeela othapa onuka, agamala basakula deretu yokosaya. Txino anowoona yawila enofuneya wavuza  adotoro ena wila aziwe ejile enziwani. (Koona Gano dh’olelana 18:17.) Anela onfunana-wene mmudhawa ombulela nikamihedho nikaliletxe niliwo, nanda enjene antameletxa na adotoro anziwiwa. Athu ena anfunetxa osasanyiwa ohili na dotoro. Eji elobo yosakula wa muthu. Masiki dhaenevi, Akristu agalabaga na dhilobo dha oredda, anofunavi wila ‘Nzu na Mulugu nikale warya mu dila mwawa.’ (Masalmo 119:105) Anofaravi meeddihedho emetxiwe mBibiliani. (Izaiya 55:8, 9) Dhaene anorabela makalelo a wombeziwa maredda abene anlabihedhiwa meera, vina anorabela masasanyedhiwo anlupa magano a Bibilia.—Masalmo 36:9; Merelo 15:28, 29; Ovuhulela 21:8.

21, 22. Muyana dhahi wa elabo ya Ásia watanaaleli dhavi nigano na Bibilia, vina ejile yasakuliye okosa yafanyeeleli eni ejile yampadduwela?

 ²¹ Koona ejile yampadduweli muyana dhahi wa elabo ya Ásia. Muvireli mudhidhi muñgonovi baromile omusunza Bibilia na Namoona wa Yehova, wahimbaala mwana wa muyana mudhidhiya ohinathi, walemela kilu modha na 470 gramas. Muyana oddule wahiparhuwa murima dotoro mwampangeliye wila nyenyeya kagakaanile zelu nanda kageeddile-wene. Dotoro bampanga wila amperheke nyenyeya vego vankoyiwa aima. Mamunaye kaziwa yokosana ejilene yapadduwa. Agamutameli ani?

²² Muyana oddule ohiloga dhahi: “Ddihubuwela yawila ddahisunza mBibiliani yawila ‘ana nruriho na Yehova; musapo wa mbani nlivo.’” (Masalmo 127:3) Venevo ohigana othukulela vatakulu “nruriho” nthile wila onuwihe. Omaromowa dhanrutxa, mbwenye na nikamihedho na amarho a Okristu mmulogoni wa vamuruddani wa Anamoona a Yehova, muyana oddule wahiwodha, bamutanaala mwanaye na dhilobo dha vawoka dhafuneya. Vyaka kumi na biili musogorhomwa mwanaya wela odhowa omatugumanoni o Numba ya Omwene vina othabaga na aima akwaye wenewale. Mambali oddule onologa dhahi: “Ddinotamaalela vaddiddi yawila magano a Bibilia ahiddikamiha okosa ejile ekalile. Bibilia ohiddikamiha okaana mubuwelo waderetu vamentoni va Yehova Mulugu vina okoodda ovitotela okubanya okwene ogagoneeli okalawo waga wotene.”

23. Bibilia onvaha nipangarhazo gani na oredda vina abale anatanaala aredda?

²³ Oredda kunakale na iyo na mukalakala. Namavuhulela Izaiya ohitonya mudhidhi oniliwani  “kanakalemo onaloge: ‘Miyo ddili muredda.’” (Izaiya 33:24) Nroromeliho nthi ninela osoriheya ovanenevi mwilaboni eswa ejene enaddamela. Noona mpaka wenewo ninelege okalawo na oredda vina okwa. Mohagalaliha, Nzu na Mulugu ninonisogorhela vina ninonikamiha. Magano a makamaka a mweeddelo antonyihedha Bibilia ba mukalakala nanda anopitha dhubuwelo dhinkala osadduwavi dha athu ohakwana. Dhaene muthu wa zelu onorumeela na munasalmo olebile dhahi: “Magano a Nabuya banakwana, anovenyihedha murima; malamulo a Nabuya bebaribari, anomvaha malago muthu wokurumuwa. . . . Dhothonga dha Nabuya kadhinvonya, dhaye dhetene somyala. Onvirihamo, onopúrana vopitha.”—Masalmo 19:7, 9, 11.