MULOBWANA dhahi wa o Nova York (E.U.A) onologa: “Mwanaga Jonathan wela wawoona amarho aye, wolapelana vañgono na vatakulu. Mwadhaga Valentina, kaziveliwa omoona iyene odhowaga wenewale. Dila dhotene iyene wankubanyedha diladha dhorutxa weeddamowa. Mbwenye Jonathan wanziveliwa vaddiddi eletronika, nanda amarho aye ahikaana ofisina mwenemo mugawodhiliye omarihedha. Miyo ddali vatakulu mpaddi wa omaddowelo wa nzuwa wa Manhattan, Nova York. Mwadhaga wela wawoona amudhi aye o Porto Rico. Ddobuwela wila ‘Jonathan onela wiyela ovanene.’ Mumalelani kampanya ya vamusuwo oruma. ‘Oddo ddi iyene wene.’ Kaali iyene. Wali mpulutxa na mukamihedhi wa adotoro. Mpulutxa oddule baddivuza dhahi: ‘Weyo onomuziwa muliba jangarha nthi na weeddihana karo?’ Miyo wakula ‘Indde, tha mwanaga Jonathan.’ ‘Nihikaana mpaganyo wokubanyiha onfunihu wupangani. Wahikala ngovi, nanda . . . mwanawo, . . . mwanawo ohikwa.’ Yoromaya ekosilimi ku ologa wila, ‘Kimpadduwa!’ Mfineza obule wowumiha milomo ohitota elodda mmirimani mwehu ejene ehinathivi ovola masiki na ovira wa vyaka dhinjidhene.”

 Babi dhahi o Barcelona (Espanha) ohileba dhahi: “Mwilaboni ya Espanha mu vyaka dha 1960 iyo naali murala wohagalala. Nali mwadhaga María, na anihu araru, Davidi, Paquito na Isabel, a vyaka 13, 11 na 9.

“Siku nimodha mweri wa Março 1963, Paquito wahiyela oskola alogaga wila onopiwa vaddiddi musorho. Nahizuzumela oziwa sabwaya—nanda mohigoneela baniziwa ereddaya. Mawora mararu musogorhomwa bakwa. Hemorragia cerebral yahimala ompa na rurumutxa.

“Okwa wa Paquito opadduwile okwaranya vyaka 30 mundduni. Masiki dhaenevi, mpaka ovanene nihikaanavi opa vaddiddi wa omuyeleela. Kuli mukalelo wa amambali omuyeleela mwana nanda bakoodda wiwa wila ahirimeeliwa elobo​—peno ovire mudhidhi gani obe akaane ana angasi.”

 Dhowireya esi biili, esene dha amambali ayeleeli anawa, dhinolagiha mukalelo onunuwa vina ongoneela elodda enkaaniwa mwana agakwa. Mazu a dotoro dhahi ba txibarene vaddiddi oddwene olebile dhahi: “Okwa wa mwana onokubanyiha vina onolatetxa murima vaddiddi opitha okwa wa muthu munddimuwa, sabwani onjeedhiwa wila akwe kayo mwana. . . . Okwa wa mwana mwanavi ontapulela oyeleela esile dhafuniye okosa musogorho, wandana wa [mwana, muwenya, vina adhuli], dhigakosiliye . . . esene dhihinathi ojiwavo.” Mwiwelo obu wa oyeleela vaddiddi elobo, podi wiwiwa na muyana muyanavi oddwene okweliwe mwanaye sabwa ya orayiya yari.

Muyana okweliwe onotapulela dhahi: “Mamunaga Russell walaba ninga mukamihedhi wa dotoro mpaddi wa o Pacífico nsaka na Koddo ya Nawili ya Elabo Yotene. Iyene wahoona vina wahiviluwa mu koddoni dhowopiya vaddiddi. Wahiyelela elabo ya Estados Unidos vina wahiyelela okaana egumi yofwaseya opitha ejile yakaaniliye. Musogorhomwa iyene wahilaba ninga murumiwi wa Nzu na Mulugu. Bana vyaka 60-65 wahiroma wiwa opa murima. Wahitamela oviwaralihedha. Venevo siku dhahi na mweri wa Julho 1988, murima waye wahimaala olaba kakamwe nanda bakwa. Omuyeleela iyene yali elobo yakala ninga endditolotxa. Txipo kaddinobuwelege ompaganya. Iyene kaali mamunaga bahi. Iyene ddalitxi marho waga. Nahikalawo vamodha vyaka 40. Venevale yakala ninga ddafuna ddakwanihe okala meka wothabwa.”

Esi dhotagiha dhiñgonovi bahi mwari mwa matxikwi a ngovi esene dhimpakela mirala masiku otene ozugunuwa elabo yotene. Ninga mugopangeli athu enjiya ankubanya, ogakweliwa mwanawo, mamunawo, mwadhiyo, babi obe mayo, marho wawo, ejile elogile murumiwi wa Okristu Paulo ja txibarene wila ddi “mwiddani womariha.” Dila dhinjidhene yoroma enkosetxa athu agewa mpaganyo wowopiha txino ku opambiha bagaloga “Kimpadduwa! Kaddinrumeela.” Venevo vanofarela makoselo mena, ninga munfunelihu woona.​—1 Korinto 15:25, 26.

Mwa dhaene, nihinathi osekeserha esile dhiniwa muthu agakubanyaga, ndoweni nakule mavuzo a makamaka. Okwa wa muthu ku ogoma wa muthuya oddo? Ohikala njeedhelo na wawoona wili amudhi ehu?

Namaleba Bibilia Paulo ohiperheka njeedhelo na ofuruleya mwa “mwiddani [oddule] womariha,” okwa. Iyene olebile dhahi: ‘Mwiddani womariha onfuna ofudhiwa ddi okwa.’ (1 Korinto 15:26, The New English Bible) Paulo wawodha dhavi okaanela ebaribari ejene? Sabwani iyene wasunzihiwe na oddule wavenyile mu okwani, Yezu Kristu. (Merelo 9:3-19) Ji sabwa ya ejene vina yawodheli Paulo oleba dhahi: Vowila “okwa ototeyile na muthu mmodha; ovenya mukwani odhilé na muthu mmodha. Athu etene n’okala ana Adamu, anokwa; n’ovolowelana na Kristu, etene anovenya mukwani.”—1 Korinto 15:21, 22.

Yezu wahikubanya vaddiddi mwagumaneliye na mamukwela wa o Naim bamoona mwanaye wakwile. Muselu wa Bibilia onnipanga dhahi: “[Yezu] afunaga ofiya mmuruddanimwá, oawona athu amuthukulele omasiye muthu wokwa, wali nammodha wa muyana wakweliwe mamune. Mwanayá wanveleliwa na athu enjene a murudda obo. Yezu mmoneliye mamukwelayá, oheddiwa thagaraga, omwaddela: ‘Muhunle.’ Apo osusela muthego, oddiginya: aliba othukula ahimela. Venevo Yezu ologa: ‘Muzombwe we, miyo ddinoulamula, kavenya!’ Mudhidhi wakene marafulayá ovenya, ogilati, oroma ologa. Yezu omperhekela  maye. Athu otene athiddiwa wova, amuthithimiha Mulugu, eraga: ‘Namavuhulela munddimuwa othwanyuwa mwilaboni mwehu. Mulugu oheddelela nlogo naye.’” Koona mukalelo weeddiwe thagaraga Yezu, mpaka onvenyiha mwana wa mamukwela!​—Luka 7:12-16.

Venevale, vamentoni va anamoona a mento, Yezu wahivenyiha mu okwani okulene ohindduwaleya. Oku wali onamoona wa ovenya mu okwani okulene wamaliliye othaga ologa mudhidhi muñgonovi ahinathi okosa ejilene, wiyiha egumi velaboni ya vati mutxiddo mwa “erimu eswa.” Mudhidhi obule Yezu wahiloga dhahi: “Kamutikine esidhá: ninofiya nsaka ninewe aliba mmasiye nzu naye, ninavenyani mukwani.”—Ovuhulela 21:1, 3, 4; Joau 5:28, 29; 2 Pedru 3:13.

Mwa anamoona a mento oonile ovenya okule mu okwani vahikala Pedru vamodha na ena mwari mwa 12 anfaretxa Yezu mu oleddoni mwaye. Mwa txibarene awene aahimwiwa Yezu wavenyihiwe mu okwani bagaloga nikome na Mwinje w’o Galilea. Museluya onnipanga dhahi: “Venevo Yezu ologa: ‘Dhaunoni, muje’. Apo kàlivo namasunza mmodha womihedhe murima omvuza: ‘Nyuwo mul’ani?’ Etene anziwa wi ddi Nabuya. Yezu oasusela, othukula mukathe, oagawela; na oba ohirana yokokene. Eji, dila yaneraru yawoneyele Yezu anamasunza aye, mmaleliye ovenya mukwani.’”—Joau 21:12-14.

Noona, Pedru wahiwodha oleba na nikuluvelo vaddiddi: “Athithimihiwe Mulugu, Babi wa Nabuyehu Yezu Kristu! Iyene n’oneddela waye thagaraga enddimuwa, onibala wili; n’omvenyiha Yezu Kristu múkwani, onivaha egumi eswa.”—1 Pedru 1:3.

Murumiwi Paulo ologile njeedhelo naye na nikuluvelo mwalogeliye dhahi: “Miyo ddinorumela dhetene dhilebiwe mMalamuloni a Mizé, vina mmanivuruni a anamavuhulela. Ddinomuroromela Mulugu ninga munimuroromelela awene, wi athu apama na abure anere ovenya mukwani.”​—Merelo 24:14, 15.

Noona matxikwi a athu podi okaana njeedhelo noliba na wawoona amudhi awa okalawo wili velaboni ya vati, mbwenye bali mutxiddo mwa mikalelo dhothiyana vaddiddi. Mikalelo eso dhinfuna okala eni? Dhitagano dhiina mwaha wa njeedhelo ninda Mbibiliani na amudhihu akwile, dhinela osekeserhiwa mu epaddi yomariha ya brochura nthi, ejene enloga “Njeedhelo Natxibarene Na Abale Akwile.”

Mbwenye voroma ndoweni nisekeserheni mavuzo txino aniwena akala onokubanya sabwa ya okweliwa mmudhi: Jofanyeela okubanya dhaene? Ddiwodhe dhavi wakwaniha okubanya waga? Athu ena awodhe okosa eni wila addikamihe wakwaniha okubanya oku? Ddiwodhe dhavi wakamiha athu ena abene ankubanya? Nanda ya makamakaya, Bibilia onloga eni mwaha wa njeedhelo natxibarene na abale akwile? Ddinodha wawoona wili amudhi aga akwile? Ddawoone wuvi?