MUYANA dhahi wa vyaka 25 ohileba: “Yaka ya 1981 mmani wa odila wahikwa na eredda ya câncer. Okwa waye wahiniribiha murima vaddiddi, miyo vamodha na murogori waga wa odila. Ddana vyaka 17 nanda murogori waga wana vyaka 11. Ddannukeliwa vaddiddi mma. Sabwa ya osunzihiwa wila iyene wali odhulu, wali deretu, ddanfuna ovipa wila ddakalege na iyene. Iyene wali mukwagaya-mukwagaya.”

Enkala ninga okwa kunfanyeela okaana ewodhelo dhaene ya onakiha muthu onimukwelihu. Nanda eji egapadduwa, yubuwelo ya okoodda owodha ologagana viina, oteyana obe omukumbatha oddule onimukweliwe podi orutxa vaddiddi wakwanihawa. Opa oku kunfudheya na opangiwa wila mmudhi wawo oli odhulu.

Txibarene, Bibilia onovaha njeedhelo nothiyana vaddiddi na nthene. Ninga mumalelihu woona, Malebo anlagiha wila musogorho mohigoneela enowodheya ogumana wili na amudhi akwile, kayo odhulu wokoodda oziweya mbwenye apano velaboni ya vati mutxiddo mwa mikalelo dha murenddele vina dholigana. Nanda nsakanene ntho athu anela okaana njeedhelo na ojavo egumi yowakwana, vina kanakwe viina. Athu ena anologa, ‘nga eji epali vaddiddi!’

Txini egothukuleli orumeela wila nthi njeedhelo nebaribari? Wila ororomele nlibelona, onofanyeela okaana ebaribari yawila oddule onroromeliha onofuna vina onowodha osoriha nlibelona. Ki bani onroromeliha wila abale akwile anela okalawo wili?

Omaromo wa nsaka noridha na yaka ya 31 E.C., Yezu ohiroromeliha na mukalelo woliba: “Baba onowavenyiha mukwani abale akwile, onowavaha egumi; Mwana vina onowavaha egumi abale anafuneyena. Kamutikine esidhá: ninofiya nsaka ninewe aliba mmasiye nzu naye [na Yezu], ninavenyani mukwani.” (Joau 5:21, 28, 29) Indde, Yezu Kristu ohiroromeliha wila athu matxikwi na matxikwi akwile anela okalawo wili velaboni apano ya vati na njeedhelo nokalagawovi na mukalakala mutxiddo mwa murenddele, vina mmikaleloni dha paraizu. (Luka 23:43; Joau 3:16; 17:3; Kaladdaniha Masalmo 37:29 na Mateu 5:5.) Sabwa yawila ddi Yezu  ororomelihile, ninofanyeela okuluvela wila iyene onofuna osoriha nlibelona. Ki iyene onowodha okosa ejene?

Dhihinakwana vyaka biili mumaleliye okosa nlibelo nthi, Yezu wahilagiha na mukalelo wa guru yawila iyene onofuna vina onowodha ovenyiha mu okwani.

Yali yowireya yowumiha milomo. Lázaro wali muredda vaddiddi. Arogori aye eeli, Maria na Marta, ahimurumihedha mpaganyo Yezu, oddwene wali kobela ejile ya Mwinje Jordano: “Nabuya, okuno mukwenyu, muredda.” (Joau 11:3) Awene anziwa wila Yezu wannimukwela Lázaro. Yezu kagaziveliwe omoona mukwaye oli muredda? Na mukalelo wohinoneleyamo, othiya Yezu waguvela o Betaniya, Yezu wahigilati okule waliye mpaka masiku meeli.​—Joau 11:5, 6.

Lázaro okwile mudhidhi muñgonovi murumeliwe mpaganyo wa oredda waye. Yezu wahiziwa mudhidhi wakwile Lázaro, nanda wafuna akosevo elobo. Na mudhidhi Yezu wahifiya o Betaniya, mukwaye wokweleya wali bakwile masiku manai. (Joau 11:17, 39) Yezu agahiwodha omwiyihedha okalawo muthu wakwile masiku manai mundduni?

Marta muyana wa guru, mwiwaliye wila Yezu wela odha, wahithamaga wila anfarele. (Kaladdaniha Luka 10:38-42.) Yezu mooneliye okubanya wa Marta wahimuroromeliha: “Murogorinyu onere ovenya mukwani.” Marta mulagiheliye nroromelo naye na ovenya mu okwani wa musogorho, Yezu ohimpanga na wiweya: “Miyo ddili onvenyiha mukwani, ddili egumi. Onddiroromela miyo, onokalawovi, masiki akwe.”​—Joau 11:20-25.

Mumaleliye ofiya omasiye, Yezu ohiruma wila mwarha obule wafuga mavoloweloya ovenyihiwewo. Dhaene mumaleliye olobela na nzu nowiweya, ohilamula: “Lázaro, kabudduwela otakulu!”​—Joau 11:38-43.

 Mento a athu otene alivo ali maka na masiye a Lázaro. Mumalelani, mwiddimanimwene muhibudduwa muthu. Wopothiwene mada na manyalo, kove jikuneliwe na guwo. Yezu oharuma alivo: “Kamutapuleni, mmuthiye adhowe.” Esile dhapothiwiyena dhihimothela vati. Indde oddu wali Lázaro, mulobwana wakwile masiku manai avirile!​—Joau 11:44.

Nipadduwo na ovenya wa Lázaro ninothwanyutxiwa Mmuthakani mwa Joau ninga nipadduwo natxibarene. Dhitaganodha sa guru vaddiddi mwawila kayo txirhapi. Opambiha wila eji ehipadduwa onkala opambiha matikiniho otene a Bibilia, vina ovenya mu okwani wa mwinyene Yezu. Nanda okoodda ovenya mu okwani wa Yezu ku okoodda nroromelo notene na Okristu.​—1 Korinto 15:13-15.

Txibarene, akala onorumeela okalawo wa Mulugu, kunfanyeela okathamiheya orumeela ovenya mu okwani. Wila niladdanihe: Muthu podi ogaravari mvidiuni efunelo yaye yogomihedha, nanda agamala okwa, amudhaye na akwaye podi omwiwa vina omoona atapulelagamo ejile enfanyeela okosiwana mazanga athiyileye. Vyaka zana mundduni, kavo wobuwela okosa elobo ninga ejene. Wa athu ena ankala ovanene epaddi yolapela vaddiddi ya elabo, thotho ya ogaravari mvidiuni kannonelamo, mpaka okalaga ninga ntikiniho. Akala athu anolabihedha magano a siensia eemetxile Mulugu wila emetxe yowireya eji yowooneya vina yowiweya, Mpaddutxi kankosa elobo empitha ejene? Ngani Oddule opaddutxile egumi kanwodha opaddutxa wili?

Ntikiniho na Lázaro wiyihedhiwa okalawo nalabeli wenjedha omuroromela Yezu vina ovenya mu okwani. (Joau 11:41, 42; 12:9-11, 17-19) Na mukalelo waderetu, eji enlagiha ofuna vina onukeliwa wa Yehova vamodha na Mwanaye ovenyiha mu okwani.

Ejile ekosile Yezu sabwa ya okwa wa Lázaro enlagiha nzuzumelo na Mwana Mulugu. Yiwelo yaye enddimuwa mudhidhene obu enlagiha kakamwe ntanaalo na efunelo yaye ya ovenyiha mu okwani. Ninowengesa: “Maria mfiyedhiye vali Yezu, amona, omugwela amunlelaga dhahi: ‘Eh Nabuya, nyuwo kokala vanihu, murogoraga kagakwile.’ Yezu mmoneliye Maria onlaga, vina wunla wa aliba othamagela adhile na iyene, oheddiwa thagaraga, ogulugudheya murima. Novenya Yezu ovuza: ‘Mmwekile uvi?’ Awene amwakula: ‘Nabuya, mudhe, mone.’ Venevo Yezu otomola kutho. Ayuda àlivo, ologa: ‘Mone mukwelelo wamukweliye.’”​—Joau 11:32-36.

Sisi ya ebaribari ya Yezu enolagihiwa na mazu mararu “oheddiwa thagaraga” “ogulugudheya murima” vina “otomola kutho.” Mazu aba mu elogeloni elebiwena Bibilia alabihedhiwena nipadduwo nthi nawumiha milomo anlagiha wila Yezu wahikubanyedha vaddiddi okwa wa mukwaye-mukwaye Lázaro vina kove ya murogori wa Lázaroya bagalila mpaka mento Aye odhaala mintori. *

Elitxi yowooneya vaddiddi jawila Yezu wahimala wawiyihedha okalawo athu eeli. Nanda iyene wafuna amukosele Lázaro yakakene. (Joau 11:11, 23, 25) Masiki dhaene, iyene “otomola kutho.” Wawiyihedha athu okalawo, kayo mweeddelo bahi. Sisi yaye vina mewelo a vati va murima ninga mulagihedhiwani mudhidhi obu txibarene anlagiha ntanaalo naye osasanyedha dhabure dhitotile okwa.

 Vowila Yezu ‘ddi nladdaniho nawakwana na Yehova Mulugu’, ninomujeedhela kakamwe Babi wehu wa odhulu. (Ahebreu 1:3) Mulobwana wororomeleya Job, ohiloga ofuna wa Yehova ovenyiha mu okwani: “Muthu okwile onowiyelela okalawo? . . . Venevo nyuwo munere oddithana, miyo ddinere owakulani; munere oddañgana n’okwela.” (Job 14:14, 15) Apano nzu na elogelo elebiwena Bibilia ejene entapulela “munere oddañgana n’okwela” ninlagiha ofuna vina njezi ya vati va murima wa Mulugu. (Wita 31:30; Masalmo 84:2) Txibarene, Yehova onofuna kakamwe ovenyiha mu okwani.

Txibarene iyo podi ororomela nlibelo na ovenya mu okwani? Indde, kavali waganyedha wila Yehova vamodha na Mwanaye anofuna vina anowodha osoriha nlibelo nthi. Eji entapulela eni wa weyo? Weyo ohikaana njeedhelo na ogumanihiwa na amudhi akwile veneva velaboni ya vati mbwenye mutxiddo mwa makalelo oothiyana vaddiddi na aba aliwo ovanene!

Yehova Mulugu, oddwene witile nlogo na athu mmunddani mokoddela vaddiddi, ohiroromeliha onvenyihedha Paraizu velaboni apano ya vati mutxiddo mwa olamulela wa Omwene Waye wa odhulu mmadani mwa Yezu Kristu wothithimiheya. (Wita 2:7-9; Mateu 6:10; Luka 23:42, 43) Vina mparaizu oddo muswa, murala wa athu onela okaana njeedhelo na ojavo egumi ehinagome, kamunakale maredda vina dhizuni. (Ovuhulela 21:1-4; kaladdaniha Job 33:25; Izaiya 35:5-7.) Vina kamunakale owogo, osakulana nlogo, otimbwini wa maziza vina makathamiho a kobiri. Yehova Mulugu modheela Yezu Kristu onela wavenyihedha abale akwile mwilaboni-mwene mpo.

Thi nthene nili njeedhelo na muyana oddule wa Mukristu ologiwe omaromo wa epaddi eji. Vyaka dhinjidhene mukweli mai waye, Anamoona a Yehova ahimukamiha ofwasedha nsunzo na Bibilia. Iyene onowubuwela: “Mumalelemi osunza njeedhelo na ovenya mu okwani, ddahilila. Ddahiziveliwa oziwa wila ddinela omoona mmani.”

Na mukalelo wakakene akala murima wawo onofuna wawoona wili amudhawo akwile, anamoona a Yehova na ohagalala anela wukamiha osunza mukalelo onwodhiwe okaana njeedhelo nthi. Onkooddela eni ogumana na awene o Numba ya Omwene eli waddamana na weyo, obe olebela enderesu eli va nikukuni 32.