OGENGESA jornale, ogoona televizau, oganvuruwana radio, onowoona vina onowiwa miselu dha otimbwini, koddo na opanga. Txino vina weyo ohikaana dhilobo dhinuzuzumiha ninga obulela na okweliwa mmudhi obe marho wa vamurimani vawo.

Onovivuza dhahi:

• Ji ejene yaddifunana Mulugu vina yafuniyena amudhaga?

• Ddifanye wuvi nikamihedho na owanana makattamiho aga?

• Onodha okale murenddele?

Bibilia bahi ddinwodha wakula mavuzoya aba.

• Kunakale viredda, wuluvala, obe okwa.—Ovuhulela 21:4

• ‘Muragali onere olupa ninga nahe.’—Izaiya 35:6

• “Mento a aliba ohona anere ofuguwa.”—Izaiya 35:5

•  Akwile anere ovenyihiwa.—Joau 5:28, 29

• ‘Kavo onaloge ddili muredda.’—Izaiya 33:24

• Attu otene anele okaana oja gwé.—Masalmo 72:16

Txino weyo onubuwela wila esile dhisunziliwe va makukuni oroma dhilobo dhoroha. Mulugu ohilibela wila onela okosa masadduwo aba velaboni ya vati ovanene, vina Bibilia onolagiha mukalelo onakose Mulugu esidha.

Bibilia onologa dhinji opitta esene. Ononisunziha enfanyelihu okosa wi nijevo egumi na osanzaya ovanene. Karoma otanalela dhilobo dhinutxutxa. Dhilobo ninga, makattamiho a vamuralani, kobiri, obulela, obe okweliwa mmudhi. Bibilia onowukamihedha owanana makattamihoya aba vina podi wulibiha mwa wakula mavuzo ninga aba:

• Iyo nintabuwela eni?

• Niwodhe dhavi owanana makattamiho ehu?

• Niwodhe dhavi ohagalaliha murala wehu?

• Txini ennipadduwela nigakwa?

• Ninele wawona wili amudhi ehu akwile?

• Niwodhe dhavi okaana ebaribari wila Mulugu onele osorhiha dhororomeliha dhaye dha musogorho?

 Sabwa ya weyo wengesaga nivuru ntti enlagiha yawila weyo ogahiziveliwa oziwa esile dhinsunziha Bibilia. Nivuru ntti ninele wukamiha. Koona yawila ddimadha dhihikaana mavuzo ali mutxiddo mwa nikuku. Attu matxikwi na matxikwi ahipuramo sabwa ya olabihedha marhe a ovuza na wakula agamusunzaga Bibilia na Anamoona a Yehova. Ninojeedhela wi weyo vina onele opuramo. Ninfuna wila okaane mareliho a Mulugu oku bugasunza esile dhinosunzihe Bibilia!