KAPITULU TTARU
Efunelo ya Mulugu na Attu Jivi?
1. Efunelo ya Mulugu na attu jivi?
MULUGU okaana efunelo yamakamaka vaddiddi na attu. Iyene omuttandda mulobwana na muyana woroma, Adamu na Eva, wi akalege mmunddani mokoddela. Efunelo yaye yali wi awene akaane aima, akose elabo yotene okala paraizu, vina akoyege dhinama.—Wita 1:28; 2:8, 9, 15; koona Yowenjedha 6.
2. (a) Ninziwa dhavi yawila efunelo ya Mulugu enele osorhiheya? (b) Bibilia onloga eni mwaha wa okalawo na mukalakala?
2 Weyo onubuwela yawila ninela okalawo labo ninakale iyo mparaizu? Yehova ohiloga dhahi: “Elogilemi, ddinowiraga; yubuwelemi, ddinovirihamo.” (Izaiya 46:9-11; 55:11) Ndde, ejile efunile Mulugu, onele okosa-wene txibarene vina kayiwo elobo enamurutxihe. Yehova vina ohiloga wi ohikaana sabwa ettanddeliye elabo. Iyene “Kapaddutxele okala yovi.” (Izaiya 45:18) Iyene onfuna wi attu akalegevi velaboni yotene ya vati. Attuya bavi anafuna Mulugu wi akale velaboni, vina anakalewo mudhidhi mungasi? Bibilia onowakula: ‘Aligani [obe, abale aniwelela] anele okala, anya a elabo, akalegemo na mukalakala.’—Masalmo 37:29; Ovuhulela 21:3, 4.
3. Vowi attu anobulela vina anokwa, txini enivivuza weyo?
3 Ovanene attu anobulela vina anokwa. Mimburo dhinji, attu anowana vina anopana muttu na mukwaye. Eji jokubanyiha vaddiddi, vina kahiyo efunelo ya Mulugu. Txini epadduwile, vina sabwaya jani? Bibilia ddinwodha wakula.
MWIDDANI WA MULUGU
4, 5. (a) Mmunddani mwa Edeni, bani walogile na Eva modhela nowa? (b) Muttu waderetu onda dhavi okala mbava?
4 Bibilia ononaddela yawila mwiddani wa Mulugu ‘ddi Satana Ddiabo.’ Satana olabihedhile nowa wi aloge na Eva mmunddani mwa Edeni. (Ovuhulela 12:9; Wita 3:1) Iyene wile okosiha okala ninga nowa jaloga.—Koona Yowenjedha 7.
5 Kito, ddi Mulugu omuttanddile Satana Ddiabo? Nne! Mungelo mmodha wali odhulu mudhidhi wasasanyedha Mulugu elabo ya vati wi Adamu na Eva akalegemo, wile ovisaddula yeka bakala Ddiabo. (Job 38:4, 7) Ejoya epadduwile dhavi? Ndowe niladdanihe, muttu waderetu onda dhavi okala mbava? Iyene kambaaliwa bali mbava. Mbwenye onosilila, vina bafuna elobo ehili yaye. Agadidelavi wubuwela, venevo efunelo yaye yabure enowunuwavi. Omamalelowa akaana gari, onowiya. Dhawene onovikosiha okala mbava.—Kengesa Tiago 1:13-15; koona Yowenjedha 8.
6. Mungelo mmodha okalile dhavi mwiddani wa Mulugu?
6 Ji ejene epadduwile na mungelo oddu. Mumaleli Yehova omuttandda Adamu na Eva, iyene wahawaddela yawila agahifanyela okaana aima wi ‘enjivane mwilaboni.’ (Wita 1:27, 28) Txino mungelo oddu ohubuwela dhahi, ‘attu aba otene agahifanyela oddebedha miyo ottiya Yehova!’ Dhahene odidela wubuwela ejene, okaana efunelo enddimuwa mwa elobo yali ya Yehova. Mungelo oddu wafuna wi attu amwebedhege iyene. Dhahene iyene omuzivalela Eva vina omukosiha yabure. (Kengesa Wita 3:1-5.) Mwa okosa ejene, iyene ohikala Satana Ddiabo vina mwiddani wa Mulugu.
7. (a) Adamu na Eva akweli eni? (b) Iyo ninuluvalela eni vina ninkwelani?
7 Adamu na Eva, ahinvanya Mulugu nanda ahija mulima wakooddihiwe. (Wita 2:17; 3:6) Dhahene awene ahimuttegela Yehova, vina movira wa mudhidhi ahikwa, ninga mwalogeli Yehova. (Wita 3:17-19) Ana Adamu na Eva ahirava yottega, noona agakwa. (Kengesa Roma 5:12.) Wi ninonelemo sabwa enkwela ana a Adamu ndoweni nitanaalele nladdaniho ntti. Kobuwela forma yowubana boloki yopuwana. Bolokidha dhotene dhinubiwa mformanimwa dhimbudduwa dhopuwana. Mudhidhi onvanyile Adamu Mulugu, iyene wahittega. Sabwa ya iyo okala ana a Adamu, notene nihikaana “mukalelo” wakakene noona nigattega vina nigakwa. Vina sabwa ya iyo okala ottega, ninowuluvala vina ninokwa.—Roma 3:23, koona Yowenjedha 9.
8, 9. (a) Satana wafuna wila Adamu na Eva arumeele eni? (b) Sabwaya jani Yehova kaapile anamavanyaya momaguva?
8 Satana oromile okala wabure mudhidhi omunyengettiliye Adamu na Eva onvanya Mulugu. Iyene wafuna wi Adamu na Eva arumeele yawila Mulugu muttambi, mulamuleli wabure vina kanfuna oderetu wawa. Satana waloga wi attu kanfanyela weddihiwa na Mulugu vina Adamu na Eva anowodha osakula anyene yaderetu na yabure. Kito, txini egakosile Yehova? Iyene wahikaana ewodhelo ya wapa avanyi wi agomihe obure. Mbwenye ejoya egahilagiha yawila Satana muttambi? Txipo, kigalagihile.
9 Dhahene Yehova kaapile avanyi abale momaguva. Iyene ottiyile mudhidhi mung’onovi wi attu avittonge anyene. Eji egahilagiha yawila Satana muttambi vina ddi Yehova onziwa ejile eli yamakamaka mwa attu otene. Ninele ologa sabwa ya ejene va Kapitulu 11. Koddi onubuwela eni modhela yosakula ya Adamu na Eva? Mwa awene yali yaderetu omurumeela Satana nanda bamvanya Mulugu? Yehova wahinvaha Adamu na Eva dhilobo dhotedhene dhapama. Wahinvaha egumi yoligana, mburo wofanyelela okala, vina mabasa oziva okosawa. Satana txipo kaakosile elobo yaderetu. Kokala weyo, ogakosile dhavi?
10. Yosakula gani ena muttu-muttu wa iyo?
10 Ovanene, muttu-muttu wa iyo ohikaana yosakula, vina egumi yehu eniwanana na ejile ensakulihu. Nihikaana ewodhelo ya omwiwelela vina omusakula Yehova ninga Mulamuleli wehu, nimukamihedhaga olagiha yawila Satana muttambi. Vina Mulugu kannikoddiha omusakula Satana ninga mulamuleli wehu. (Masalmo 73:28; kengesa Gano 27:11.) Mwilaboni muli attu ang’onovi bahi animwebedha Mulugu. Ebaribariya jawila iyene kahiyo mulamuleli wa elabo ejino. Akala kahiyo Mulugu, kito bani?
BANI ONLAMULELA ELABO?
Akala onlamulela elabo kahiyo Satana iyene agahinvaha Yezu dhilobo dhotedhene?
11, 12. (a) Ninsunzavo eni mwa mvaho okosile Satana wa Yezu? (b) Malebo gani antonyihedha yawila Satana mulamuleli wa elabo ejino?
11 Yezu wahimuziwa mulamuleli wa elabo. Mudhidhi dhahi Satana omuttukula Yezu vina “omoniha vilabo dhotene dha vati na ofumawa oliwo.” Mmaleliye ohimwaddela dhahi: “mugakokora muddebedha, miyo ddinowuvahani dhetenedha.” (Mateu 4:8, 9; Luka 4:5, 6) Kavivuze, ‘akala onlamulela elabo kahiyo Satana, iyene agahinvaha dhilobo esi dhotedhene Yezu?’ Nne. Onlamulela elabo eji yotene ddi Satana.
12 Mohaganyedha weyo onovivuza: ‘Satana onwodha dhavi okala mulamuleli wa elabo ejino? Yehova kahiyo Mulugu wowodha-wodha ottanddile elabo yotene?’ (Ovuhulela 4:11) Ndde, ottanddile ddi iyene, mbwenye Yezu mohaganyedha wahimuloga Satana wi ddi “mwene wa elabo ejino.” (Joau 12:31; 14:30; 16:11) Vina murumiwi Paulo wahiloga wi Satana Ddiabo “mulugu wa vatapano.” (2 Korinto 4:3, 4) Murumiwi Joau ohileba dhahi ‘elabo yotene eli mmadani mwa Satana.’—1 Joau 5:19.
OLAMULELA WA SATANA ONATOLOTXIWE DHAVI?
13. Ninfunela eni elabo eswa?
13 Obure wa elabo ejino onodhowavi bugattabwa. Ninopattiwa koddo, opujiwa, otimbwini, vina nihirugunuwiwa avuti enjene. Masiki dhavi, kavo muttu onawodhe ogomiha makattamiho aba otene. Mbwenye koddo enfuna odhana Mulugu enkuweliwa Harmagedón, enele otolotxa elabo eji edhalile obure vina enele odhana elabo eswa yoligana.—Ovuhulela 16:14-16; koona Yowenjedha 10.
14. Mulugu omusakulile ani okala Mwene wa Olamulela waye? Txini Evuhuleli Bibilia sabwa ya Yezu?
14 Yehova omusakulile Yezu Kristu wi akale Mulamuleli wa Omwene Waye wa wirimu. Mwa vyaka dhinji dhivirile, Bibilia wahiloga wi Yezu ddi “Mwene wa Murenddele” vina olamulela waye txipo kunagome. (Izaiya 9:5, 6) Yezu wahasunziha anamafara aye olobelela olamulela oku mudhidhi walogile iyene dhahi: “Omwene wenyu odhele iyo. Ofuna wenyu okosiwege vati apano ninga odhulu.” (Mateu 6:10) Kapitulu 8, ninela osunza mukalelo onatxinje Omwene wa Mulugu elabo ejino. (Kengesa Daniyel 2:44.) Omamalelowa Omwene obu wa Mulugu onele okosa elabo yotene okala paraizu wokoddela vaddiddi.—Koona Yowenjedha 11.
ELABO ESWA ELI VAKUVI!
15. “Elabo eswa” entapulela eni?
15 Bibilia ohiloga wi: “enjyedha iyo bari mpikireli Nabuya ji erimu na elabo eswa,” vina “muneddege dhetedhene ninga mufuneliye.” (2 Pedro 3:13; Izaiya 65:17) Bibilia agalogaga “elabo,” onawaddana attu ankala velaboni ya vati. (Wita 11:1) Mwadhahene “elabo eswa” yoligana, enlogiwana attu animwiwelela Mulugu vina anakela mareliho aye.
16. Elobo gani yaderetu enavahe Mulugu abale anakale mwilaboni eswa, txini enfanyela iyo okosa wi nakele mvaho obu?
16 Yezu wahiloga wila elabo ejo eswa enda, abale arumeeliwe na Mulugu anele wakela “egumi yohimala.” (Marko 10:30) Txini enfanyela iyo okosa wi nakele mvaho obu? Onokumbirhiwa wi wengese Joau 3:16 vina 17:3 wi ofanye yowakulaya. Ovano ndowe niziwe mukalelo onakale Paraizu musogorho mundowela iyo mowiwanana na ejile enloga Bibilia.
17, 18. Ninziwa dhavi yawila onele okala murenddele vamodha na nibarelo elabo yotene?
17 Obure, koddo, opanga, na otimbwini dhinele ogoma. Kunakale muttu wabure velaboni ya vati. (Masalmo 37:10, 11) Mulugu onele ‘ogomiha koddo mwilaboni mwetemwene.’ (Masalmo 46:9; Izaiya 2:4) Attu otene agakala velaboni ya vati anakale attu animukwela vina animwiwelela Mulugu. Otene anele okaana murenddele wohigoma.—Masalmo 72:7.
18 Nlogo na Yehova ninele obareleya. Nsaka na wale, mudhidhi wewelela ana Izrayel, Mulugu wannabarela, amvuneya sabwani ankaana nikamihedho na Mulugu. (Onamakutha 25:18, 19) Mparaizu, kaninovege. Mudhidhi wotene ninela okaana nibarelo!—Kengesa Izaiya 32:18; Mikeya 4:4.
19. Ninkanela eni ebaribari wi mwilaboni eswa munele okala dhoja gwé?
19 Onele okala dhoja gwé. “Mmunddani munele odhala tirigu, thukuwa dhinele okuneleya na milima ninga eli Líbano.” (Masalmo 72:16) Yehova, ‘Mulugu wehu onele oruriha,’ vina ‘mattaka anele ovaha milima dhawa.’—Masalmo 67:6.
20. Ninkanela eni ebaribari yawila elabo yotene enele okala paraizu?
20 Elabo yotene enele okala paraizu. Attu anele okaana numba vina na mindda dha marhuwa dhokoddela vaddiddi. (Kengesa Izaiya 65:21-24; Ovuhulela 11:18.) Elabo yotene enele okala yokoddela ninga yali mundda wa Edeni. Mudhidhi wotene Yehova onele onivaha dhilobo dhinfunihu. Bibilia onologa wi Mulugu: ‘onele otapula nlada naye wi aavahe attu dhetene dhinfunani.’—Masalmo 145:16.
21. Ninkanela eni ebaribari yawila onele okala murenddele attu na dhinama?
21 Onele okala murenddele attu na dhinama. Dhinama kadhinatxutxege attu. Mwana mung’ono onele ovega na dhinama, masiki esile dhili dhowopiha masaka ovanene.—Kengesa Izaiya 11:6-9; 65:25.
22. Yezu onawirele eni aredda?
22 Kawo muttu onaloge ddili muredda. Yezu valiye velaboni ya vati, wahavulumutxa attu enjeene. (Mateu 9:35; Marko 1:40-42; Joau 5:5-9) Mbwenye ninga mwene wa Omwene wa Mulugu, Yezu onele wavulumutxa attu otene. Kawo muttu onaloge “ddili muredda.”—Izaiya 33:24; 35:5, 6.
23. Txini enakose Mulugu na abale akwile?
23 Abale akwile anele ovenyihiwa mukwani. Mulugu ohikuluveliha yawila onele wavenyiha attu matxikwi na matxikwi otene akwile. “Attu a pama na abure anere ovenya mukwani.”—Kengesa Joau 5:28, 29; Merelo 24:15.
24. Ononamo dhavi mwa okala mparaizu?
24 Notene iyo nihikaana ofuru wosakula. Nihikaana ewodhelo ya osakula osunza sabwa ya Yehova vina omulabela iyene, obe vina nihikaana ofuru wa okosa ejile enfuna iyene. Akala iyo ninosakula omulabela Yehova, ninele okaana mareliho aderetu musogorho. Mulobwana dhahi wamukumbirhile Yezu wi amubuwele agamala okwa, Yezu wahimukuluveliha dhahi: ‘ddinowaddela ddabuno, onele okala na miyo mparaizu.’ (Luka 23:43) Ninofanyela osunza vaddiddi mwaha wa Yezu vina mukalelo onakosihe iyene dholibela dha Mulugu okala ebaribari.
