1, 2. Txini enfuna Yehova na murala?

YEHOVA MULUGU ddimetxile matelo oroma. Bibilia ononaddela wi ohimukosa muyana woroma nanda “mumaleliye omperekela mulobwanaya.” Adamu wahagalala vaddiddi, nanda ohiloga: “Oddu txibarene nigogoddo na magogoddo aga, nama ya namaga!” (Wita 2:22, 23) Eji entapulela wi Yehova onfuna wi atelani akale ohagalala.

² Mbwenye attu enjene, txipo kanakanaga murala wohagalala. Bibilia ononitonyihedha magano menjene anwodha wakamihedha attu otene ohagalaliha murala wawa vina ojavo murenddele vamodha.—Luka 11:28.

3, 4. (a) Mamuni onamutanaale dhavi mwadhiye? (b) Jamakamaka olevelelana mamuni na mwadhiye?

³ Bibilia onloga wi mamuni waderetu ddi oddule onimbarela mwadhiye, onimukwela vina onimuriha. Onokumbirhiwa wi wengese Éfeso 5:25-29. Mamuni onele omutanalela mwadhiye vina omukwela. Iyene onele ombarela, omukosela yaderetu vina kankosa elobo enimunyimula.

⁴ Txini enfanyela okosa mamuni mwadhiye agavonya? Amamuni anowaddeliwa: “Mwakwele awadhinyu; kamweddege n’ekalelo yowanyonya.” (Kolosi 3:19) Amamuni, mubuwele wi nyuwo vina munovonyaga. Akala nyuwo munofuna wi Mulugu awuleveleleni, nyuwo vina munofanyela walevelela awadhinyu.  (Mateu 6:12, 14, 15) Akala mamuni na mwadhiye anolevelelana, ejo enele wakamihedha okaana matelo ohagalala.

5. Mamuni onfanyelela eni omuriha mwadhiye?

⁵ Yehova onfuna wi mamuni amurihege mwadhiye. Mamuni onofanyela omutanaalela deretu mwadhiye mwa dhofuna dhaye. Ntti nikokomezo namakamaka. Akala mamuni kanimutanaala deretu mwadhiye, Yehova kanvuruwana malobelo aye. (1 Pedro 3:7) Attu animukwela Yehova, ba ttima vamentoni vaye. Iyene kanimusakula muttu, akala mulobwana obe muyana.

6. Ologa wi mamuni na mwadhiye ali “muthu mmodha bahi” entapulela eni?

⁶ Yezu ohiloga wi mamuni na mwadhiye “kankala eli, ali muthu mmodha bahi.” (Mateu 19:6) Awene anowiwelelana muttu na mukwaye vina txipo kanfanyela waganyedhana muttu na mukwaye. (Gano 5:15-21; Ahebreu 13:4) Atelani anofanyela ozuzumelana na okwela dhifunelo dhawa dha ogonihana. (1 Korinto 7:3-5) Amamuni anofanyela wubuwela wi ‘kawo muttu ompwaza maningo aye, mbwenye onosapela vina onokoya.’ Noona iyene onofanyela omukwela vina omukoya mwadhiye. Opitta dhilobo dhetene, muteliwi onfunetxa wi mamunaye amweddihe na oderetu vina amukwelege.—Éfeso 5:29.

7. Murala onfanyelela eni okaana musogorheli?

⁷ Murala wotene onofanyela okaana muttu onsogorhela wi awene awodhe olaba vamodha. Bibilia onologa va 1 Korinto 11:3: “Kristu ddi munddimuwa wa muthu-muthu, mulobwana ddi munddimuwa wa mwadhiye, Mulugu ddi munddimuwa wa Kristu.”

8. Muteliwi onwodha dhavi onvaha mamunaye nriho ninddimuwa?

 ⁸ Joziweya wi amamuni anovonyaga. Akala muteliwi onomukamihedha mamunaye vina onorumeela na dhogana dhaye, anamudhi etene anopurelamo. (1 Pedro 3:1-6) Bibilia onologa: “Muteliwi amurihege mamune.” (Éfeso 5:33) Kito akala mamuniya kankosa mebedho akakene na mwadhiye? Masiki dhawene muteliwi onofanyela omuttittimiha. Bibilia onloga: “Nyuwo vina ateliwi mwakurumuwelege amamuninyu. Dhahene agakalawo alobwana ena anvanya nzu, meddelo enyu apama anowodha wakukusela ororomela, muhilogilena elo. Enowakwana, awene wona ekalelo yenyu yovikoya, yoriheya.” (1 Pedro 3:1, 2) Dhotagiha dhaderetu dha muteliwi dhinowodha omukamihedha mamunaye oriha nroromelo naye.

9. (a) Txini enfanyela okosa muteliwi akala kanrumeela na dhogana dha mamunaye? (b) Malago gani enfanyeya va Tito 2:4, 5 anlabihedheya na ateliwi?

⁹ Kito akala muteliwi kanrumeela na dhogana dha  mamunaye? Muteliwi onofanyela ologa yubuwelo yaye na nriho ninddimuwa. Ninga motagiha, Sara wahiloga elobo yakodda omuzivela Abramu, mbwenye Yehova wahimwaddela: “kakosa dhetene dhinuloba Sara.” (Wita 21:9-12) Txibarene jorutxa yogana yomariha ya mamuni wa Mukristu okodda wiwanana na ejile enloga Bibilia. (Merelo 5:29; Éfeso 5:24) Muteliwi waderetu onozuzumela murala waye. (Kengesa Tito 2:4, 5.) Mamunaye vamodha na anaye agoona mukalelo onlabiye na guru, aweneya anele omukwela vina omuriha vaddiddi.—Gano 31:10, 28.

10. Txini enloga Bibilia sabwa ya ottiyana obe omwalana?

¹⁰ Mudhidhi mwina atelani anomaguvela wubuwela ottiyana obe omwalana. Mbwenye Bibilia onloga wi “muyana ahimwalane na mamune” vina yakakene “mamuni vina ahimmwale mwadhiye.” (1 Korinto 7:10, 11) Dhihikalawo dhilobo dhiina txino dhinfanyela wakosiha atelani ottiyana, mbwenye ejoya yosakula enddimuwa. Kito ninaloge dhavi sabwa ya omwalana? Bibilia onloga wi atelani podi omwalana akala mamuni obe muteliwi onokosa mararuwo na muttu mwina.—Mateu 19:9.

11. Opitta elobo-elobovi, aima anfunetxa eni?

¹¹ Amambali, anofanyela okala mudhidhi mwinjene na anawa. Anawo anowufuna vaddiddi, opitta elobo yina, anowufuna wi wasunzihe dhilobo dha Yehova.—Olibiha 6:4-9.

12. Txini enfanyela ababi okosa wi abarele anawa?

¹² Elabo ya Satana enodhowavi bigopiha vina ahikalawo attu agafunile watabutxa anihu, ninga okosana mararuwo. Ababi eena enowarutxa vaddiddi ologa ejuwene na anawa. Mbwenye ababi anofanyela  wawaddela anawa sabwa ya attu ninga abuwene vina wasunziha mukalelo wa warabela. Ababi, nyuwo munofanyela wabarela aninyu. *—1 Pedro 5:8.

13. Amambali anawodhe dhavi wasunziha anawa?

¹³ Ababi ahikaana ettomo ya wasunziha anawa mukalelo wa wedda. Weyo onawodhe dhavi wasunziha anawoya? Anawo anofanyela malago, mbwenye malagoya kanfanyela okala otabala vina osilidha. (Jeremiya 30:11) Mwa dhawene txipo kunfanyela  washagiha anawo buli wonyonyeya. Kukaane mazu antabutxa vina “ansuva ninga supadda”. (Gano 12:18) Wasunzihe anawo ononelamo ekalelani yamakamaka wiwelela.—Éfeso 6:4; Ahebreu 12:9-11; koona Yowenjedha 30.

14, 15. Sabwaya jani aima anofanyela wawiwelela ababi awa?

¹⁴ Yezu wanimwiwelela Babi waye masiki egali yorutxa. (Luka 22:42; Joau 8:28, 29) Yehova vina onfuna wi aima awiwelelege ababi awa.—Éfeso 6:1-3.

¹⁵ Aima, masiki akala munowoona wi jorutxa wawiwelela ababi enyu, kobuwelani wi akala nyuyo munowiwelela, Yehova vamodha na ababi enyu anele ohagalala. *—Gano 1:8; 6:20; 23:22-25.

16. (a) Satana onwodha dhavi wattukulela azombwe wi akose eli yabure? (b) Ekaleli eni yamakamaka wasakula amarho animukwela Yehova?

¹⁶ Ddiabo poddi walabihedha amarho awo vamodha na azombwe eena wi awukwekwettele okosa elobo yabure. Iyene onoziwa wi enele okala yorutxa weyo okwaranya yowehaya ejo. Ninga motagiha, Dina mwana wa Jakobi wahikaana amarho ahamwebedha Yehova. Ejo yahimutotela makattamiho menjene vamodha na amudhaye. (Wita 34:1, 2) Akala amarho awo kanimwebedha Yehova awene anele wuttukulela okosa elobo enimusilidha Yehova vina egawutoteli makattamiho, vamuralani vawo vina na Mulugu. (Gano 17:21, 25) Noona jamakamaka weyo watamela amarho animukwela Yehova.—1 Korinto 15:33.

17. Mabasa gani ana muttu-muttu a vamuralani?

¹⁷ Akala attu otene a vamuralani anowiwelela malamulo a Mulugu, ejo enowakamihedha orabela makattamiho menjene. Noona akala weyo wa mamuni, onofanyela omukwela mwadhiyo vina omuriha. Akala weyo wa muteliwi onofanyela omuttittimiha vina omwiwelela mamunawo vina omutagihe muyana olebiwe va Gano 31:10-31. Akala weyo wa mambali onofanyela wasunziha anawo omukwela Mulugu. (Gano 22:6) Akala weyo wa babi onofanyela weddiha murala wawo ‘na mukalelo waderetu.’ (1 Timóteo 3:4, 5; 5:8) Aima, mwawiwelelege ababi enyu. (Kolosi 3:20) Kobuwela wi kadda muttu wa vamuralani onovonya, mwa dhahene onofanyela oviyeviha vina okumbirha nlevelelo muttu na mukwaye. Indde Bibilia ohikaana malago a Yehova, wa kadda muttu vamuralani.