1. Bani onwodha onaddela dila yaderetu ya omwebedhana Mulugu?

MARELIJIAU menjene anologa wi anosunziha ebaribari mwaha wa Mulugu. Mbwenye ejo kahiyo ebaribari, sabwani marelijiauya anosunziha dhilobo dhottiyana sabwa ya ejile eli Mulugu vina mukalelo wa omwebedha. Ninaziwe dhavi dila yaderetu ya omwebedha Mulugu? Yehova bahi ddinwodha onaddela mukalelo wa omwebedhana.

2. Ninaziwe dhavi dila yaderetu ya omwebedhana Mulugu?

² Yehova ohinivaha Bibilia wi nisunze mukalelo waderetu wa omwebedha iyene. Mwa dhahene kamusunze Bibilia, Yehova onele wukamihedha opurelamo masunziho aye sabwani onowuzuzumela vaddiddi.—Izaiya 48:17.

3. Mulugu onfuna wi nikose eni?

³ Attu eena anologa wi Mulugu onorumeela relijiau dhetene, mbwenye Yezu kanisunzihile ejuwene. Iyene ohiloga: “Onvolowa mumweneni wa wirimu kaiye ole onddiromola: ‘Nabuya, Nabuya’ bahi; onvolowamo ddule onvirihamo ofuna wa Babaga oli wirimu.” Noona jamakamaka wa iyo osunza efunelo ya Mulugu vina okosa efuneloya. Ejo jamakamaka sabwani Yezu wahaladdaniha attu ankodda omwiwelela Mulugu ninga atimbwini, ‘anira dhovuta’.—Mateu 7:21-23.

4. Txini yalogile Yezu sabwa ya okosa efunelo ya Mulugu?

⁴ Yezu ohiloga wi nigafuna okosa efunelo ya Mulugu ninele ogumanana makattamiho. Iyene ohiloga:  “Volowaní va mulago woyeva! Mulago munddimuwa, vina dila yawi tabwalati dhinowavelela athu murimelani; enji banviramo. Mulago woyeva, dila yokathamiha sinfiyiha wigumini; anfanya, ali añgonovi!” (Mateu 7:13, 14) Mulago woyeva obe dila yokattamiha sinfiyiha wigumini yamukalakala. Mulago munddimuwa, vina dila enddimuwa dhinowavelela attu mu okwani. Mbwenye Yehova kanfuna wi attu akwe. Iyene onowavaha gari attu otene wi asunze dila dhaye.—2 Pedro 3:9.

5. Onawodhe dhavi wazinddiyela abale animwebedha Mulugu na Mukalelo waderetu?

⁵ Yezu ohiloga wi enowodheya wazinddiyela abale animwebedha Mulugu na mukalelo waderetu. Enowodheya modheela opepesa esile dhinrumeela awene vina esile dhinkosa awene. Iyene ohiloga: “Monowaziwa monaga merelo awa.” Vina wahenjedhedha: “Muri wapama onobala milima dhapama.” (Mateu 7:16, 17) Ejo kintapulela wi anamebedha ebaribari a Mulugu aligani. Mbwenye emeleli a Mulugu anovilibihedha okosa dhilobo dhaderetu. Ndoweni noone enanikamihedhe wazinddiyela abale animwebedha Mulugu na mukalelo waderetu.

6, 7. Webedha webaribari onfanyelelani odhela mBibiliani? Dhotagiha dha Yezu dhinnisunziha eni?

⁶ Webedha wehu odhelege mBibiliani. Bibilia onologa: “Dhetene dhilebiwe mBíbiliani, wobuweliha ddi Mulugu; dhilebeliwé osunziha ebaribari, wahélamo anvonya, wawógola anvirigana, walela athu wi eddena murima womyala. Dhahene muthu wa Mulugu onokala wowakwanene, onowaralela mabasa  etene apama.” (2 Timóteo 3:16, 17) Murumiwi Paulo wahalebela Akristu: “Valaleyilehu nzu na Mulugu vari venyu, nyuwo kamwakelile ninga mazu a muthu, mwakelilé muziwaga-wene wi nzu na Mulugu.” (1 Tesalónika 2:13) Webedha webaribari ondela bahi Mmazuni a Mulugu, Bibilia. Webedhawa oko kundela muyubuweloni dha omuttu, dhilemelelo obe mwa dhilobo dhiina.

⁷ Dhilobo dhetene dhisunzihile Yezu dhindela Mmazuni a Mulugu. (Kengesa Joau 17:17.) Iyene wanloga Malebo. (Mateu 4:4, 7, 10) Anamebedha ebaribari a Mulugu anosaza yotagiha ya Yezu vina dhetene dhinsunzihani dhindela mBibiliani.

8. Yezu onisunzihile eni sabwa ya omwebedha Yehova?

⁸ Nimwebedhe Yehova bahi. Masalmo 83:19 onloga: “Aziwe wi nzina nenyu muli Nabuya [Yehova] ddi nyuwo bahi. Nyuwo bahi muli Namadhulu-dhulu mwilaboni mwetemwene” [Malebo Okoddela]. Yezu wafuna wi attu amuziwe Mulugu webaribari, vina iyene wahasunziha attuya nzina na Mulugu. (Kengesa Joau 17:6.) Yezu ohiloga: ‘Ddi Yehova Mulugu wawo onfanyeliwe omwebedha, vina ddi iyene bahi onfanyeliwe omuttittimiha.’ (Mateu 4:10) Ninga anamebedha a Mulugu ninomutagiha Yezu. Iyo ninimwebedha Yehova bahi, ninolabihedha nzina naye vina ninowasunziha attu eena nzina na Mulugu na ejile enakosiye na attu.

9, 10. Ninawodhe dhavi olagiha okwelana muttu na mukwaye?

⁹ Nakwelege kakamwe attu. Yezu wahasunziha anamafara aye wi akwele attu eena. (Kengesa Joau 13:35.) Kaninang’ana ekalelo yehu, peno odhilihu, peno nili areli obe ayelegi. Okwela wehu muttu na mukwaye ononiwananiha ninga abali na arogora. (Kolosi 3:14) Noona kanindhowa okoddoni wi naape  attu eena. Bibilia onologa: “Enathiyaniha ana a Mulugu na ana a Satana jiji: Akala muthu kanvirihamo ofuna wa Mulugu, kanimukwela mbalaye, kabaliwe na Mulugu.” Vina wahenjedhedha: “Kaneddege n’ekalelo ya Kaini: Iyene wali mukudda Satana, nona ampa mbale.”—1 Joau 3:10-12; 4:20, 21.

¹⁰ Ninolabihedha mudhidhi wehu, guru, vamodha na dhokaana dhehu wi nakamihedhena vina nalibihe attu eena. (Ahebreu 10:24, 25) Wi “nawirele dhapama athu etene.”—Galásia 6:10.

11. Ninrumelela eni wi Yezu dila ennittukulela wa Mulugu?

¹¹ Nimwiwelele Yezu sabwani iyene dila ennifiha wa Mulugu. Bibilia onologa: “Nona kawo mwina onwodha ovulumutxa; mwilaboni kamuli nzina nina nivahiwe athu, ninavulumutxe.” (Merelo 4:12) Kapitulu 5 ya nivuru ntti, nihisunza wi Yehova ohimuruma Yezu operheka egumi yaye ninga yobolo ya attu owiwelela. (Mateu 20:28) Yehova ohimusakula Yezu wi alamulele ninga Mwene velaboni ya vati. Noona ji sabwa ya ejene ennaddela Bibilia wi akala ninofuna egumi yamukalakala ninofanyela omwiwelela Yezu.—Kengesa Joau 3:36.

12. Sabwaya jani kaninkosa epaddi ya politika?

¹² Nihikose epaddi ya politika. Yezu kakosile epaddi ya politika. Mudhidhi wattongiwa iyene na Pilato, mulamuleli wa Roma, iyene wahiloga: “Omwene waga kuli wa mwilaboni-mpuno.” (Kengesa Joau 18:36.) Dhahene ninga Yezu, ninowiwelela Omwene wa Mulugu, elabo-elabovi enkalihu kaninkosa epaddi ya politika. Bibilia, ononikokomeza wi ninofanyela wakurumuwela “abale athomeliwe othonga elabo,” obe anamattonga. (Roma 13:1) Iyo ninowiwelela malamulo a elabo enkalihu. Mbwenye akala malamuloya abo anotota magudulano na malamulo  a Mulugu, ninowasaza arumiwi, alogile: “Enfuneya kumurumela Mulugu opitha athu.”—Merelo 5:29; Marko 12:17.

13. Ninlaleyela eni odha wa Omwene wa Mulugu?

¹³ Ninorumela Omwene wa Mulugu bunwodha ogomiha makattamiho otene a elabo. Yezu wahiloga wi ‘muttaka wapama wa Omwene’ onele olaleyiwa elabo yotene. (Kengesa Mateu 24:14.) Alamuleli a attu kanwodha okosa ejile enakose Omwene wa Mulugu. (Masalmo 146:3) Yezu ohinisunziha olobelela Omwene wa Mulugu: “Omwene wenyu odhele iyo, ofuna wenyu okosiwege vati apano ninga odhulu.” (Mateu 6:10) Bibilia onloga wi Omwene wa Mulugu onele watolotxa alamuleli otene a attu vina “onere ogonela okala n’okala-wene.”—Daniyel 2:44.

14. Bani anawoona weyo wi anomwebedha Mulugu na mukalelo waderetu?

¹⁴ Mumaleli weyo osunza mitoma esi, kavivuze: ‘Bani animulabihedha Bibilia mmasunzihoni mwawa? Bani anawaddela eena nzina na Mulugu? Bani anlagiha okwelana muttu na mukwaye vina anrumeela wi Yezu odheli onivuna? Bani ankodda okosa epaddi ya politika? Bani anlaleya wi Omwene wa Mulugu bahi bunwodha ogomiha makattamiho ehu?’ Ba Anamoona a Yehova bahi.—Izaiya 43:10-12.

15. Nigafuna wi Mulugu arumeele webedha wehu, txini enfanyelihu okosa?

¹⁵ Kahiyo orumeelavi bahi wi Mulugu okalawo. Adomonyo vina anorumeela wi Mulugu okalawo mbwenye kanimwiwelela. (Tiago 2:19) Nigafuna wi Mulugu arumeele webedha wehu, kaninfanyela omurumelavi bahi mbwenye ovirihamo dhinlogiye.

16. Ninfanyelela eni okodda relijiau yonyengetta?

 ¹⁶ Wi Mulugu arumeele webedha wehu ninofanyela okoodda relijiau yonyengetta. Namavuhulela Izaiya ohileba: ‘Budduwani vari vaye, muvikoddelihe.’ (Izaiya 52:11; 2 Korinto 6:17) Noona ninofanyela okodda elobo-elobovi eniwanana na webedha wabure.

17, 18. “Babilónia Munddimuwa,” txini vina ninfanyelela eni ottawamo momaguva?

¹⁷ Relijiau yonyengetta txini? Ji relijiau ensunziha omwebedha Mulugu na mukalelo ohiniwanana na Nzu naye. Bibilia onologana marelijiau otene onyengetta ninga “Babilónia Munddimuwa.” (Ovuhulela 17:5) Sabwaya jani? Masunziho a marelijiau onyengetta aromile o Babilónia, mumaleli mpulo masaka a Nowé. Masunziho abo onyengetta ahimwadheya orugunuwa elabo yotene. Ninga motagiha, attu akala mBabilónia ebedha nikuru na amilugu araru. Masaka abano, marelijiau menjene anosunziha wi Mulugu amilugu araru, mbwenye Bibilia onosunziha mowoneya-mwene wi oliwo Mulugu mmodha bahi webaribari, Yehova vina wi Yezu ddi mwanaye. (Joau 17:3) Attu akala mBabilónia anrumeela wi ekala epaddi ya muttu embudduwa muttuya agakwa vina eloboya ejo podi otabuwa omottoni. Ejoya kahiyo ebaribari.—Koona Yowenjedha 14, 17, vina 18.

¹⁸ Mulugu ohiloga wi momaguva marelijiau otene onyengetta anele otolotxiwa. (Ovuhulela 18:8) Ovano, onononelamo ekalelani yamakamaka ottiya momaguva relijiau yonyengetta? Yehova Mulugu onfuna wi okose ejuwene momaguva.—Ovuhulela 18:4.

19. Weyo ogafuna omulabela Yehova, iyene onawukamihedhe dhavi?

¹⁹ Weyo ogagana ottiya relijiau yonyengetta wi  omwebedhe Yehova, amarho awo vamodha na amudhawo txino kanaziveliwe na yosakula yawo vina podi okattamiha egumi yawo. Mbwenye Yehova kanawunyanyale. Weyo onele okosa epaddi ya anamudhi matxikwi na matxikwi ali orugunuwa elabo yotene, ankwelana mwebaribari muttu na mukwaye vina onele okaana njedhelo na okala mwilaboni eswa ya Mulugu na mukalakala. (Marko 10:28-30) Txino musogorhomwa amarho awo vamodha na amudhawo ahinziveliwa na yosakula yawo ya omwebedha Yehova anele orumeela omusunza Bibilia.

20. Ekaleli nni yamakamaka omwebedha Mulugu na mukalelo waderetu?

²⁰ Momaguva, Mulugu onele otolotxa obure wotene vina Omwene waye onele olamulela elabo yotene. (2 Pedro 3:9, 13) Obo onakale mudhidhi wotikiniha! Attu otene anele omwebedha Yehova na mukalelo onfuniye. Noona jamakamaka mwa weyo osakula ovanene omwebedha Mulugu na mukalelo waderetu.