1, 2. Nlobelo nikalile dhavi gari enddimuwa vaddiddi vina ninfanyelelani oziwa ejile ensuziha Bibilia mwaha wa nlobelo?

NIGALADDANIHA erimu na elabo, elabo eyeva vaddiddi. Yehova agang’anaga elabo, onoona malogo otene ninga nttotto na manje nimotteli mmukatteni. (Masalmo 115:15; Izaiya 40:15) Masiki nubuwelaga wi nili oyeva vaddiddi nigaviladdaniha na erimu, Masalmo 145:18, 19 onloga dhahi: ‘Yehova onoawaddamela otene animwittana, animunlela na murima webaribari. Onowira dhinunlela abale animuriha, onovuruwana kutto dhawa, onoavuna.’ Eji gari enddimuwa vaddiddi! Yehova Muttanddi munddimuwa, onfuna anisusele vina onofuna ovuruwana malobelo ehu. Ndde, Yehova ononvaha muttu-muttu wa iyo gari ya olobela.

² Mbwenye Yehova ananivuruwane bahi nigamulobelelaga na mukalelo onrumeela iyene. Ejoya ninakose dhavi? Ndoweni noone enloga Bibilia mwaha wa nlobelo.

3. Onfanyelelani olobela wa Yehova?

³ Yehova onfuna wi weyo olobelege obe ologege na iyene. Ninziwa dhavi ejoya? Kengesa Filipi 4:6, 7. Koobuwela mwaha wa niwobo ntti. Mwene wa erimu okaana efunelo enddimuwa wi omwaddele mwaha wa dhubuwelo na makattamiho awo.

4. Olobela wa Yehova mudhidhi wotene onunuwiha dhavi omarho wawo na iyene?

⁴ Nlobelo ninonikamihedha okaana omarho wa  makamaka na Yehova. Amarho agalogaga makani muttu na mukwaye mwaha wa dhinubuwelani, makattamiho vina etanaalelo yawa, omarho wawa onodhowavi bugonuwa. Ejo enoladdanihiwa na olobela wa Yehova. Modhela Bibilia, iyene onowuwaddela dhubuwelo dhaye, etanaalelo yaye vina onowuwaddela esile dhinfuniye okosa musogorho. Weyo vina podi omwaddela dhubuwelo dhawo modhela ologa na iyene mudhidhi wotene. Ogakosaga dhawene, omarho wawo na Yehova onele odhowavi bugonuwa.—Tiago 4:8.

5. Ninziwa dhavi wi Yehova kanvuruwana malobelo otene?

⁵ Yehova onovuruwana malobelo otene? Nne. Masaka a namavuhulela Izaiya, Yehova wahawaddela ana Izrayel dhahi: “Mugaddoddobelelaga malobelo enyu gwè, miyo kaddinvuruwana. Mada enyu amala otakala na nikame.” (Izaiya 1:15) Nigahikale txenjewa,  ninele okosa dhilobo dhinanittawanihe wa Yehova, dhahene enitotelaga ohivuruwaniwa nigalobelaga.

6. Nroromelo nikalelini namakamaka? Onatonyihedhe dhavi wi ohikaana nroromelo?

⁶ Akala ninofuna wi Yehova avuruwane malobelo ehu, ninofanyela omuroromela. (Marko 11:24) Murumiwi Paulo otapulela: “Muthu ohina nroromelo, kanwodha omuziveliha Mulugu. Ole onimususela Mulugu enofuneya orumela wi Mulugu okalawo vina onoathuva abale animutamela.” (Ahebreu 11:6) Kahiyo ologavi wi nihikaana nroromelo. Ninofanyela otonyihedha mowoneya-mwene nroromelo nehu modhela omwiwelela Yehova Malabo otene.—Kengesa Tiago 2:26.

7. (a) Nigalobelaga wa Yehova ninfanyelela nni oviyeviha vina otonyihedha nriho? (b) Nigalobelaga wa Yehova ninatonyihedhe dhavi wi nili attu a ebaribari?

⁷ Nigalobelaga wa Yehova ninofanyela oviyeviha vina okaana nriho. Sabwaya jani? Nigafunaga ologa na mwene obe prezidenti, ninologa na nriho. Kito nigalogaga na Yehova Mulugu wa owodha-wodha, kaninfanyela otonyihedha nriho ninddimuwa? (Wita 17:1; Masalmo 138:6) Nigalobelaga wa Yehova ninofanyela okala attu ebaribari, nilogege na murima wehu wotene ottiya wiyelela mazu akene dila dhinji.—Mateu 6:7, 8.

8. Nigalobelaga mwaha wa elobo-elobovi, ninfanyela okosa eni?

⁸ Nigalobelaga mwaha wa elobo-elobovi, ninofanyela okosa yotene enwodhihu mowiwanana na ejile elobilehu. Ninga motagiha, nigalobela wi Yehova anivahe dhofuna dhehu dha kadda labo, kanijeedhe wila iyene onele onivaha dhetedhene s’ohilaba. Ninofanyela olaba na guru vina nirumeele mabasa-mabasavi. (Mateu 6:11; 2 Tesalónika 3:10) Obe nigalobela  wa Yehova wi nittiye okosa elobo yabure, ninofanyela orabela mikalelo dhiganikwekwetteli okosa eloboya ejo. (Kolosi 3:5) Ovanene ndoweni nitanalele mavuzo ankosiwetxa mwaha wa nlobelo.

9. Nimulobelele ani? Txini ennisunziha Joau 14:6 mwaha wa nlobelo?

⁹ Nimulobelele ani? Yezu wahasunziha anamafara aye wi alobelege wa ‘Baba wehu oli wirimu.’ (Mateu 6:9) Iyene vina ohiloga: “Miyo ddili dilayá, ddili ebaribari, ddili egumi. Kawo onfiya wa Baba, ohivirile mwa miyo.” (Joau 14:6) Noona ninofanyela olobela wa Yehova modhela Yezu. Olobela modhela Yezu entapulela eni? Wi Yehova arumele malobelo ehu, ninofanyela oriha ettomo yavawoka evahiwe Yezu. Ninga musunzelihu, Yezu ohidha velaboni ya vati wi anivune muttegani vina mu okwani. (Joau 3:16; Roma 5:12) Yehova omuttoma Yezu ninga Namakutta Munddimuwa vina Namattonga.—Joau 5:22; Ahebreu 6:20.

10. Nigalobelaga ninofanyela okana yimelelo yavawoka? Katapulela.

¹⁰ Nigalobelaga ninofanyela okaana yimelelo yavawoka? Nne, nigalobelaga Yehova kannikokela okokora, ogilati obe wimela. Bibilia ononisunziha wi podi ologa na Yehova na mukalelo-mukalelovi wa nriho. (1 Mapadduwo 17:16; Nehemiya 8:6; Daniyel 6:10; Marko 11:25) Yamakamakaya wa Yehova bu mukalelo wehu waderetu wa ologa, ottiya yimelelo yehu. Iyo podi olobela na lizu nowiweya obe nohiweya mowiwanana na mburo olihu obe mudhidhiya akala mutana obe mattiyu. Nigalobelaga wa Yehova, iyo podi okuluvela wi iyene ononivuruwana masiki akala kavo muttu mwina onniwa.—Nehemiya 2:1-6.

11. Dhilobo gani dhinfanyelihu omwaddela Yehova?

 ¹¹ Nilobelele dhilobo gani? Iyo podi olobelela elobo-elobovi enrumeela Yehova. Bibilia onloga: ‘Nigamuloba elobo bari munfuneliye, iyene ononivuruwana.’ (1 Joau 5:14) Iyo podi olobelela dhofuna dhehu? Ndde. Olobela wa Yehova enofanyela okala ninga ninloga na mukwehu wofiyedheya. Iyo podi omwaddela Yehova elobo-elobovi eli mmirimani mwehu vina muyubuweloni mwehu. (Masalmo 62:8) Iyo podi omulobelela wi anivahe guru ya muya waye wotxena wi onikamihedhe okosa eli yaderetu. (Luka 11:13) Iyo vina podi okumbirha eziwelo wa Yehova wi nikose dhogana dhaderetu vina podi olobela wi nilibe nigavilelaga makattamiho. (Tiago 1:5) Ninofanyela okumbirha nlevelelo mwa dhottega dhehu. (Éfeso 1:3, 7) Iyo vina podi walobelela eena ninga anamudhi ehu, abalihu na arogora a mmulogoni.—Merelo 12:5; Kolosi 4:12.

12. Elobo gani eli yamakamaka okala vamburoni voroma nigalobelaga?

¹² Nigalobelaga, bani onfanyela okala vamburoni voroma? Ddi Yehova na efunelo yaye. Ninofanyela omutamaalela na murimehu wotene mwa dhilobo dhotene dhinnikoseliye. (1 Mapadduwo 29:10-13) Ninoziwa esuwene mwaha wa ejile yalogile Yezu agaali velaboni ya vati, Iyene ohawaddela anamafara aye mukalelo wa olobela. (Kengesa Mateu 6:9-13.) Iyene ohiloga wi awene anfanyela olobelela, otxenihiwa wa nzina na Mulugu, eji entapulela wi noniwé ninga nokoddela vina notxena. Musogorhomwa Yezu wahitonyihedha wi ninofanyela olobelela Omwene wa Mulugu wi odhe vina efunelo ya Yehova ekosiwege velaboni ya vati. Mumaleli Yezu ologa dhilobo esi dhamakamaka, iyene wahiloga wi nigamala podi ologa  dhilobo dhiina dhinfuna iyo. Nigamwika Yehova vamburoni voroma vina efunelo yaye nigalobelaga, ninele otonyihedha eli yamakamaka wa iyo.

13. Malobelo ehu anfanyela ogonela midhidhi mingasi?

¹³ Malobelo ehu agonele midhidhi mingasi? Bibilia kanloga. Malobelo ehu podi okala ohigonela obe ogonela mowiwanana na yofuneyaya. Ninga motagiha, nigafunaga oja kanikose nlobelo nogonela,  mbwenye ninfanyela ogonela nigalogaga na Yehova mwaha wa makattamiho ehu obe nigamutamaalelaga. (1 Samuwel 1:12, 15) Kanikosege nlobelo nogonela na efunelo ya osibiwa na attu eena, ninga mwapadduwelani masaka a Yezu. (Luka 20:46, 47) Yehova kansiba malobelo ninga abuwene. Yamakamakaya wa Yehova malobelo andela mmirimani.

14. Nilobelege dila ngasi, ejoya ennisunziha eni mwaha wa Yehova?

¹⁴ Nilobelege dila ngasi? Yehova ononiwoba wi nilogege na iyene mudhidhi wotene. Bibilia onloga wi “didelani mulobelani,” “lobelani,” vina “lobelagani muhilemágana.” (Mateu 26:41; Roma 12:12; 1 Tesalónika 5:17) Yehova oli womala nawale wi anivuruwane. Iyo podi omutamalela malabo otene mwaha wa  okwela na ovaha waye. Vina podi okumbirha wi anibarele, anilibihe vina anipangarhaze. Akala ninotamalela gari yolobela, ninele ofanya mudhidhi wologa na Yehova.

15. Ninfanyelani ologa “amen” omagomo wa nlobelo?

¹⁵ Ninfanyelani ologa “amen” omagomo wa nlobelo? Nzu ntti “amen” nintapulela “pu mwenemo” obe “ekale dhawene.” Obu mukalelo wa otonyihedha mmalobeloni mwehu wi enlobela iyo ebaribari. (Masalmo 41:13) Bibilia ononisunziha wi jaderetu ologa “amen,” masiki mwarimari obe na lizu nowiweya nitonyiedhaga wi ninorumela dhilogiwe.—1 Mapadduwo 16:36; 1 Korinto 14:16.

16. Yehova onowakula-wene malobelo ehu? Katapulela.

¹⁶ Yehova onowakula malobelo ehu? Ndde. Bibilia onologa wi iyene ‘Namakela nlobelo.’ (Masalmo 65:3, Malebo Okoddela) Yehova onovuruwana vina onowakula malobelo andela mmirimani a attu matxikwi na matxikwi, akosaga na mikalelo dhottiyana-ttiyana.

17. Yehova onalabihedha dhavi angelo vina emeleli aye velaboni ya vati wi akule malobelo ehu?

¹⁷ Yehova onowalabihedha angelo vina emeleli aye velaboni ya vati wi akule malobelo ehu. (Ahebreu 1:13, 14) Vahikala dhotagiha dhinji dha attu alobelile wi anonelemo mazu a mBibiliani mohigonela ahifiyedhiwa na Anamoona a Yehova. Bibilia onolagiha wi angelo anovitaganyiha mmabasani a olaleya ‘miselu dhapama’ elabo yotene. (Kengesa Ovuhulela 14:6.) Vina, enji wa iyo nahilobelaga wa Yehova mwaha wa makattamiho ehu obe dhofuna dhehu nanda banakela nikamihedho nafunehu modhela abali na arogora ehu a Okristu.—Gano 12:25; Tiago 2:16.

18. Yehova onlabihedha dhavi muya waye wotxena na Bibilia wi akule malobelo ehu?

 ¹⁸ Yehova onolabihedha muya waye wotxena wi akule malobelo ehu. Nigalobela wi nivilele makattamiho ehu, iyene podi olabihedha muya waye wotxena wi anivahe mweddihedho vina guru. (2 Korinto 4:7) Yehova vina onomulabihedha Bibilia wi akule malobelo ehu vina wi anikamihedhe okosa dhogana na eziwelo. Nigamwengesaga Bibilia, ninofanya malebo ananikamihedhe. Yehova vina podi omulabihedha muttu wi akule vamatugumanoni mowiwanana na esile dhafunehu wiwa obe omulabihedha munddimuwa wa mmulogoni wi anaddele mitoma dhindela mBibiliani.—Galásia 6:1.

19. Mudhidhi mwina enkalelani ninga Yehova kanakula malobelo ehu?

¹⁹ Mudhidhi mwina, txino, ninovivuza, ‘Sabwaya jani Yehova kanakula malobelo aga?’ Kobuwela wi, iyene onoziwa mudhidhiya vina mukaleloya onfanyeliye wakula. Iyene onoziwa dhinfunehu. Nidhowegevi banigalobela nitonyihedhaga wi ninofuna-wene ejile enimwaddelihu vina nilagihe wi ninomuroromela. (Luka 11:5-10) Mudhidhi mwina Yehova ononakula na mukalelo wahajedha iyo. Ninga motagiha, ninofanyela olobela mwaha wa makattamiho ehu, mbwenye ottiya ogomiha makattamihoya, iyene podi onivaha guru ya ovilelana.—Kengesa Filipi 4:13.

20. Ninfayelela eni olobela wa Yehova mudhidhi wotene?

²⁰ Nihikaana gari enddimuwa vaddiddi ya olobela wa Yehova! Ninokuluvela wi iyene ononivuruwana. (Masalmo 145:18) Vina nihiziwa wi nigalobelagavi wa Yehova na murima wotene, omarho wehu na iyene onodhowavi bugonuwa.