1. Ogamala osunza nivuru ntti, txini enfanyeliwe otanalela na ofwaseya?

OSUNZAGA nivuru ntti, ohizinddiyela dhibaribari dhinji dha Bibilia, ninga nlibelo na egumi ya mukalakala, ekalelo ya abale akwile vina ovenya mu okwani. (Kohelét 9:5; Luka 23:43; Joau 5:28, 29; Ovuhulela 21:3, 4) Txino weyo ohiroma woona matugumano a Anamoona a Yehova vina ohoona wi awene anokosa mebedho ebaribari. (Joau 13:35) Txino weyo ohiroma omaga mandano ofiyedhana na Yehova vina  txino ohigana omulabela. Venevo ohivivuza: ‘Ddikose eni wi ddimulabele Mulugu?’

2. Mukadda Etiópia wafunelani obatiziwa?

² Jijene yobuwela mulobwana dhahi wa mukadda Etiópia, wakalilewo masaka a Yezu. Mudhidhi wavenyihiwe Yezu mu okwani, namafara waye Filipi wahimulaleya mulobwana oddu. Filipi wahimuziwiha wi Yezu wali Muttikitteliwi. Mukadda Etiópia oddule wahijeya murima na esile dhasunziliye, vina mohigoneela ohiloga: “Mone! Apa vakala manje; ehinddiwodhiha obatiziwa txini?”—Merelo 8:26-36.

3. (a) Nlamulo gani navahile Yezu anamafara aye? (b) Muttu ombatiziwa dhavi?

³ Bibilia ononisunziha mowooneya wi akala onofuna omulabela Yehova, jofuneya obatiziwa. Yezu wahiloga na anamafara aye: “Dhowani mwasunzihe athu a malogo otene, mwabatize.” (Mateu 28:19) Yezu vina wahivaha yotagiha modhela obatiziwa. Iyene wele obwinihiwa wotene, ottiya okuttuleliwa manje vamusorho. (Mateu 3:16) Na mukalelo wakakene Mukristu agabatiziwaga masaka abano jofuneya obwinihiwa mmanjeni maningo otene.

4. Obatiziwa wawo ontonyihedha nni?

⁴ Obatiziwa wawo, onotonyihedha wi onfuna okale marho wa Mulugu vina onfuna okale mwimeleli waye. (Masalmo 40:7, 8) Noona jaderetu ovivuza, ‘Ddikose nni wi ddibatiziwe?’

5. (a) Okose nni ohinatti obatiziwa? (b) Matugumano a Okristu akalelini amakamaka?

⁵ Ohinabatiziwa, jofuneya omuziwa Yehova vamodha na Yezu. Mohaganyedha ohiroma okosa ejene  mwa omusunza Bibilia. (Kengesa Joau 17:3.) Mbwenye kahiyo ejuwenevi. Bibilia onologa wi onofanyela okaana “gari yononelamo” efunelo ya Yehova. (Kolosi 1:9) Matugumano a Anamoona a Yehova anele wukamihedha okaana mandano ofiyedhana na Yehova. Ejo elobo yamakamaka, noona onofanyela woona matugumanoya.—Ahebreu 10:24, 25.

6. Wi obatiziwe onofanyela oziwa dhotene dhili mBibiliani?

⁶ Joziweya wi, Yehova kanjeedhela wi oziwe dhotene dhili mBibiliani ohinatti obatiziwa. Iyene kajeedheli wi mukadda Etiópia aziwe dhilobo dhetene ahinatti obatiziwa. (Merelo 8:30, 31) Iyo ninodhowavi banigasunza ononelamo wa Yehova. (Kohelét 3:11) Mbwenye wi obatiziwe, jamakamaka oziwa vina orumeela nipara na masunziho a Bibilia.—Ahebreu 5:12.

7. Nsunzo nawo na Bibilia nukamihedhi dhavi?

⁷ Bibilia onologa: “Muthu ohina nroromelo kanwodha omuziveliha Mulugu.” (Ahebreu 11:6) Yofuneyaya jawi okaane nroromelo ohinatti obatiziwa. Bibilia ononaddela wi attu eena akala mu sidadi y’o Korinto ahiwa dhasunziha anamafara a Yezu, noona “arumela, abatiziwa.” (Merelo 18:8) N’ekalelo yakakene, nsunzo nawo na Bibilia nihukamihedha okaana nroromelo na dholibela dha Mulugu vina guru dha mukutto wa yobolo ya Yezu enobolile mu ottegani vina mu okwani.—Josuwé 23:14; Merelo 4:12; 2 Timóteo 3:16, 17.

8. Txini enawukosihe wawaddela attu eena ejile ensunziwe?

⁸ Ogamusunzagavi Bibilia vina wonaga mukalelo onkamihedheya weyo mwigumini, nroromelo nawo  ninela oliba. Weyo onele ofuna wawaddela attu eena ejile ensunziwe. (Jeremiya 20:9; 2 Korinto 4:13) Kito onamwaddele ani?

9, 10. (a) Bani anfanyeliwe oroma ologana esile dhinsunza weyo? (b) Akala onofuna olaleya na mulogo txini enakose weyo?

⁹ Weyo podi wawaddela anamudhi awo, akwawo, anamwanddamani vina amarho awo a omabasani esile dhinsunziwe. Ejoya elobo yaderetu, mbwenye onofanyela okosa n’okurumuwa vina na oderetu. Na mudhidhiya weyo onele oroma olaleya na mulogo. Weyo ogoona wi oli womala nawale kaloga na namasunziha wawo wa Bibilia, wila onofuna odhowa mmalaleyoni na mulogo. Akala namasunziha wawo onowoona wi onoweedda mowiwanana na magano a Bibilia anddimuwa eeli a mulogo anele otugumana na weyo.

¹⁰ Txini enapadduwevo? Awene anele ologa na weyo wi aziwe akala onononelamo vina onorumeela masunziho a Bibilia, akala weyo onovirihamo enloga Bibilia mwigumini mwawo vina akala txibarene onofuna okala Munamoona wa Yehova. Kobuwela wi anddimuwa a mmulogoni, banasogorhela attu otene a mmulogonimwa, masiki na weyoya, noona kuwove ogalogagana. (Merelo 20:28; 1 Pedro 5:2, 3) Omamalelo wa makaniya, anddimuwa a mulogo anele wuwaddela akala weyo onele oroma olaleya na mulogo.

11. Ekaleleni yamakamaka okosa masadduwo ohinaroma olaleya na mulogo?

¹¹ Anddimuwa a mulogo txino anele wuwaddela wi onofanyela okosa masadduwo meena wi orome olaleya na mulogo. Okosa masadduwoya ekaleleni yamakamaka? Sabwani ologa na attu muselu wa  Mulugu, entapulela omwimelela wehu Yehova, noona jofuneya okalagawo na mukalelo onimuttittimiha.—1 Korinto 6:9, 10; Galásia 5:19-21.

12. Enfuneyela nni wi attu otene atxinuwe?

¹² Ehikalawo elobo yina enfanyeliwe okosa ohinatti obatiziwa. Murumiwi Pedro ohiloga: “Mutxinuwe, mmurugunutxele murima Mulugu; awodhe oulevelelani dhottega dhenyu.” (Merelo 3:19) Otxinuwa ontapulela eni? Ontapulela okubanya wopitta vina ottiya kakamwe elobo yabure ekosile weyo. Ninga motagiha, akala weyo wanziveliwa okosa mararuwo, onofanyela otxinuwa. Masiki akala ohikosa guru wi okose dhilobo dhapama, otxinuwa onofuneyavi, sabwani nili attegi vina jamakamaka okumbirha nlevelelo na Mulugu.—Roma 3:23; 5:12.

13. “Orugunutxa murima” entapulela eni?

¹³ Okalela okubanyavi mwa ejile ekosilihu enowakwana? Nne. Pedro ohiloga wila ninofanyela “omurugunutxela murima Mulugu.” Eji entapulela okoodda okosa dhilemelelo esile dhawale, wi orome okosa dhapama. Wi niladdanihe ejoya, kobuwela wi onkosa oleddo odhowaga wego-wegovi. Movira mudhidhi weyo ononelamo wi dila enfara weyo kahiyo ejuwene. Mwa venevo ogakosile eni? Mohaganyedha ogahimela buwiyela wi ottidde dila yaderetuya. Moligana-mwene ogamusunzaga Bibilia, onofiyedha woona wi dhihikalawo dhilobo dhiina dha mwigumini mwawo dhinfanyeliwe osaddula. Kakala womala nawale wi “orugunutxe murima”—ejo entapulela okosa masadduwo anukosiha—wira dhapama.

14. Onfanyelelani oviperheka wa Mulugu?

¹⁴ Ttarho yina yamakamaka enfanyeliwe okosa ohinabatiziwa ku oviperheka wa Yehova. Ogaviperhekaga wa Yehova, onokosa nlobelo venevo vanlogiwe wi onele omwebedha iyene bahi vina onele okosa efunelo yaye, eji elobo yamakamaka mwigumini mwawo.—Olibiha 6:15.

15, 16. Txini enimukosiha muttu oviperheka wa Yehova?

¹⁵ Olibela omulabela Yehova entapulela, okala egumi yawo yotene omwebedhaga iyene bahi. Kamubuwele mulobwana na muyana aneddelelana. Mulobwana agamuziwa deretu muyanaya, onoroma omukwela afiyedhaga omutela. Masiki aziwaga wi yogana yohivegana, mulobwanaya onorumeela omutela sabwani murima waye oli na iyene.

¹⁶ Weyo ogasunza mwaha wa Yehova, onele omukwela vina onele okosa guru vaddiddi wi omulabelege. Ejoya enele wukamihedha okosa nlobelo oganaga omulabela. Bibilia onologa wi muttu-muttu onfuna onfara Yezu “arome ovikodda mwinyene.” (Marko 8:34) Ejiya entapulela eni? Entapulela wi onowika vamburhoni voroma omwiwelela Mulugu mwigumini mwawo. Enfuna Yehova jamakamaka opitta dhofuna na dhogana dhawo.—Kengesa 1 Pedro 4:2.

17. Attu eena ankooddelani oviperheka wa Yehova?

¹⁷ Attu eena kanfuna oviperheka wa Yehova, sabwani anova anadhe attiye omwebedha. Awene kanfuna omunyimula Yehova, obe anologa wi akala  kaniviperheka wa Yehova kanapwattele muladdu mwa dhilobo dhabure dhinkosani.

18. Txini enawukamihedhe okwaranya wova omunyimula Yehova?

¹⁸ Omukwela wawo Yehova onele wukamihedha okwaranya makattamiho a wova omunyimula. Sabwa ya omukwela, onele okosavi guru wi yogana yawo ya omulabela yunuwevi. (Kohelét 5:4; Kolosi 1:10) Kuwoone wi okosa efunelo ya Yehova elobo yorutxa. Murumiwi Joau ohileba: “Omukwela Mulugu, kuloga ovirihamo malamulo aye; malamuloyá kanlémela.”—1 Joau 5:3.

19. Sabwaya jani kunfanyela wova oviperheka wa Yehova?

¹⁹ Kujeedhe okala muttu woligana wi oviperheke wa Yehova. Iyene txipo kanjedha wi nikose ejile ehinwodhihu. (Masalmo 103:14) Iyene onele wukamihedha wi okose dhili dhapama. (Izaiya 41:10) Omukuluvele Yehova na murima wawo wotene vina “iyene onoutonyihedha dilaya-dilaya.”—Gano 3:5, 6.

20. Ogamala oviperheka wa Mulugu, ttarho yina yofarelaya jivi?

²⁰ Weyo onivyona wi oli womala nawale wi oviperheke wa Yehova? Ogamala oviperheka wa Yehova, onele okala womala nawale wi okose ttarho endawo. Venevo onele ofuna obatiziwa.

21, 22. ‘Onavuwihe’ dhavi nroromelo nawo vanamwinjini?

²¹ Kaloga na musogorheli wa nikuru na anddimuwa a mulogo wawo wi aziwe wi onofuna oviperheka wa Yehova wi obatiziwe. Iyene onele ologa na anddimuwa eena a mmulogoni wi asunze na weyo magano meena a Bibilia. Awene agarumeela wi weyo  oli womala nawale, anele wuwaddela wi onofanyela obatiziwa va matugumanoni manddimuwa a Anamoona a Yehova. Vamatugumanoniva vanele okala diskursu enloga ejile entapulela obatiziwa. Namakosa diskursu onele wakumbirha abale anfuna obatiziwa wi aakule mavuzo meeli ohirutxa. Mwa wakula mavuzoya  aba weyo ‘onovuwiha vanamwinjini’ ezinddiyelo ya nroromelo nawo.—Roma 10:10.

²² Ogamala ondowa wabatiziwe. Weyo onele obwinihiwa kakamwe mmanjeni. Ogabatiziwa onele olagiha wi ooviperheka wa Yehova vina oli Munamoona wa Yehova.

23. Obatiziwa na “nzina na Baba, na Mwana, na Muya Wokoddela” entapulela eni?

²³ Yezu wahiloga wi anamafara aye agahibatiziwa na “nzina na Baba, na Mwana, na Muya Wokoddela.” (Kengesa Mateu 28:19.) Ejiya entapulela eni? Eji entapulela wi ninofanyela ononelamo olamulela onddimuwa wa Yehova vina mabasa a Yezu mu efunelo ya Mulugu, mukalelo onlabihedha Yehova muya wokoddela wi akwanihe dhofuna dhaye.—Masalmo 83:18; Mateu 28:18; Galásia 5:22, 23; 2 Pedro 1:21.

24, 25. (a) Obatiziwa ontapulela eni? (b) Kapitulu endawo ninasunze eni?

²⁴ Obatiziwa entapulela elobo yamakamaka. Ogabwinihiwa mmanjeni, entapulela wi ohikwa obe ohittiya ekalelo yawo na dhilemelelo dhawo dhawale. Ogafemuwaga mmanjenimwa, entapulela wi ohiroma ekalelo eswa ya mwigumini mwawo. Ejo vina entapulela wi onfuna omulabele Yehova mpaka musogorho. Kobuwela wi kuniviperhekela muttu womaningoni, nikuru obe mabasa. Weyo omperheka egumi yawo wa Yehova.

²⁵ Oviperheka wawo onele wukamihedha wunuwiha omarho wawo na Mulugu. (Masalmo 25:14) Eji kintapulela wi muttu onele ovuneya sabwa ya obatiziwa. Murumiwi Paulo ohileba: “Mulabele na wova, n’oribela murima ovulumutxiwa wenyu.” (Filipi 2:12) Obatiziwa kumaromowa. Kito weyo onawodhe dhavi onfiyedha Yehova? Kapitulu yomariha ya nivuru ntti enele wakula nivuzo ntti.