1. Mwaha wa webedha, athu angumana na osakula gani ovanene?

YEZU ohiloga dhahi: “Oddule ohili epaddi yaga iyene ohiddisadduwela.” (Mateus 12:30) Obe nili epaddi ya Yehova obe epaddi ya Satana. Athu enjiya anoona ninga animulaba Mulugu na mukalelo worumeeleya, mbwenye Bibilia onloga wila ddi Satana “onapupurutxa athu a elabo yotene ya vati enkaliwa.” (Ovuhulela 12:9) Athu matxikwi na matxikwi anorumeela wila awene animwebedha Mulugu, mbwenye mwatxibarene awene animwebedha Satana, Ddiabo! Ovanene apa athu anogumana na osakula oku: Omulaba Yehova, “Mulugu wa ebaribari,” obe Satana, “babi wa othambi.”—Salmo 31:5; Joau 8:44.

2. Mukalelo mwina onlabihedha Satana wila aakathamihe athu omwebedha Yehova buvi?

² Ogana omulaba Yehova ku osakula wa zelu, osakula ondiha nrumeelelo na Mulugu. Mbwenye muthu agamulabaga Mulugu Satana kanziveliwa; iyene onowatotela makathamiho abale ankosa ejene. Mukalelo mwina onkosiye eji bwa wabedda obe otota opambihiwa na athu ena, masiki epaddi ya amarho vamodha na athu a ntakulu. Yezu ohilaga dhahi: “Txibarene, amwiddani a muthu anakale athu a ntakulu naye.”—Mateus 10:36.

3. Akala ntakulu nawo obe amarho awo onowusadduwela sabwa ya omwebedha Mulugu, onakose eni?

³ Eji egoopadduwela weyo, onakose eni? Athu enjene anoziwa wila mukalelo onebedhani kukalile, mbwenye awene anowaganyedha onyanyala webedha oku. Anoona ninga  oku okoodda ororomeleyela ntakulu nawa. Koddi eji ehikala? Weyo kooziwa wila athu oofiyedhana vaddiddi a ntakulu nawo anoja mirobwe dhowopiya, weyo kugaapangile wila mirobwe esile dhinela waputhula? Weyo kugajile mirobwe esi na awene, kayo mwenemo?

4. Josue wapangile eni Aizraeli mwaha wa webedha mmasikuni aye?

⁴ Josue wahaalibiha Aizraeli onyanyala merelo na yeddelo yabure ya relijiau ya makolo awa. Ohiloga dhahi: “Ovanene, mmove Yehova nanda mmulabe s’ohikaana yovirigana vina nebaribari, nanda mwaburutxemo amilugu abale awebedhile azamani enyu kobela ejile ya Mwinje vina mu Ejipito, nanda mmulabe Yehova.” (Josue 24:14) Josue wannimuroromela Mulugu nanda Yehova wahimururya. Nigamuroromela Yehova, iyene vina onela onirurya.—2 Samueli 22:26.

5. Ninfanyeelelani onyanyala vitagano dha masalapitho?

⁵ Onyanyala relijiau ehili yebaribari ontapulela vina wila ninofanyeela otolotxa vitagano dhotene dha masalapitho txino dhinihuna, ninga erisi, thumwa, pethe na piri dha masalapitho na dhilobo dhina dholaddana na esene. Okosa eji koofuneya sabwani enolagiha wila ninimukuluvela kakamwe Yehova.

6. Akristu ooroma akosile eni na manivuru awa a masalapitho?

⁶ Koona ejile ekosile Akristu ooroma mwaganelani olabihedha relijiau yebaribari. Bibilia onloga dhahi: “Muthengo mwinjene wa abale alabihedhile masalapitho ahidhana manivuru awa nanda ahiddumeya vamentoni va athu otene.”—Merelo 19:19.

7. Nikose eni adomonyo aganooniha goi?

⁷ Athu enagu anroma omulaba Yehova nanda aalabihedhaga wene okwiri kakamwe, meera obe merelo a masalapitho txino ahonihiwa goi na adomonyo. Eji egoopadduwela, kalobela wa Yehova na lizu nowiweya, bugalabihedha nzina naye. Iyene onela wukamiha.—Vimarya 18:10; Tiago 4:7.

8. Akristu anawona dhavi amilugu osemiwa, maladdaniho na kwaduru dhinlabihedhiwa muwebedhani ohili webaribari?

⁸ Abale anfuna omulaba Yehova kanfanyeela okaana nne walabihedha amilugu osemiwa, maladdaniho obe kwaduru dha webedha ohili webaribari. Akristu a ebaribari ‘aneedda na nroromelo othiya weedda na mento.’ (2 Korinto 5:7) Anoriha nlamulo na Mulugu nthene ninkooddiha olabihedha nladdaniho notene muwebedhani.—Obudduwa 20:4, 5.

9. Nlago gani ninvaha Bibilia mwaha wa mukalelo onwodhihuna okala athu a zelu?

⁹ Bibilia onloga dhahi: “Oddule onedda na athu a zelu iyene vina onokala muthu wa zelu.” (Vimarya 13:20) Akala ninofuna okala athu a zelu, ninofanyeela wedda, obe otugumana, na Anamona a Yehova. Awene baneedda mu dila enthukulela wigumini ya mukalakala.—Mateus 7:14.

10. Anamona a Yehova anwodha wukamiha dhavi omulaba Mulugu?

¹⁰ Anamona anowazuzumela athu txibarene. Mabasa awa ba wakamiha athu a murima ononelamo ebaribari ya Bibila ejene enthukulela wigumini ya mukalakala. Jowodheya awene wukamiha modhela omusunza Bibilia na weyo, s’ohilogosa elobo. Anela wakula mavuzo awo vina anela wulagiha mukalelo wa othiddihedha mabasa eziwelo ya Bibilia mwigumini yawo.—Joau 17:3.

11. Onakamiheye dhavi mmatugumanoni a Okristu?

¹¹ Mmatugumanoni awa, abene ankosiwetxa mu Numba ya Omwene, weyo onela osunza vaddiddi mwaha wa dila dha Yehova. Onela olibiheya mu ogana wawo wa olabihedha relijiau yebaribari. Onela osunzihiwa vina mukalelo wa wakamihana athu ena osunza ebaribari ya Bibilia.—Aebreo 10:24, 25.

12. Nlobelo ninwodha dhavi wukamiha omulaba Mulugu?

¹² Venevo vansunziwe vaddiddi mwaha wa efunelo ya Yehova na esile dhinfuniye okosa, mohaganyedha ntamaalelo nawo mwa dila dhaye dhokwela ninela wunuwa. Onofanyeela vina wunuwiha efunelo yawo ya okosa  ejile enimuhagalaliha nanda orabela ejile enimusilidha iyene. Kobuwela wila jowodheya weyo onfiyedha Yehova mu nlobelo nanda omukumbirha wila ookamihe okosa ejile eli yaderetu vina orabela ejile eli yabure.—1 Korinto 6:9, 10; Filipi 4:6.

13. Owodhe dhavi ohagalaliha murima wa Yehova?

¹³ Na mudhidhi, oku bugadhowa vasogorho omuyani, mohaganyedha onela wona ofuneya wa okala Namona wovipereka vina wobatiziwa wa Yehova. Sabwa ya otugumana na adhari a Yehova, onela ohagalaliha murima wa Yehova. (Vimarya 27:11) Onela okala vari va athu oosanzaya abene analoga Mulugu dhahi: “Ddinela okala vari vawa, nanda ddinela wedda vari vawa, nanda ddinela okala Mulugu wawa, vina awene anakale nlogo naga.”—2 Korinto 6:16.