1. Mowiwanana na Nzu na Mulugu, relijiau bili bahi dhiliwo sivi?

“KAVOLOWANI vamusuwoni muñgono,” ohiloga Yezu, “sabwani enddimuwa nanda yotapuwa ji dila endowiha omatolotxiwelo, nanda athu enjene anedda mudila eji; oku muñgono buli musuwoya vina eñgono ji dila endowiha wigumini, nanda athu añgonovi banfanya dila eji.” (Mateus 7:13, 14) Mowiwanana na Nzu na Mulugu, oli relijiau bili bahi: modha yebaribari, modha ehili yebaribari; modha yaderetu yina yabure; modha endowiha wigumini ya mukalakala, yina endowiha omatolotxiwelo.

2. Malebo antonyihedha dhavi wila kayo relijiau dhotene dhinimuhagalaliha Mulugu?

² Ohikala athu anubuwela wila relijiau dhotene dhinomuhagalaliha Mulugu. Versikulu esi dha Bibilia dhili mutxiddo dhinolagiha wila ejo kayo ebaribari:

• “Ana a Izraeli ahiroma wili okosa dhilobo dhabure vamentoni va Yehova, nanda ahiroma wawebedha amilugu a Baali vina maladdaniho a Astorete, vina amilugu a Siria, vina amilugu a Sidoni vina amilugu a Moabe, vina amilugu a ana a Amoni vina amilugu a akadda Filistia. Dhaene awene ahimunyanyala Yehova nanda kamulabile. Sabwa ya ejene owali wa Yehova wahavingela Aizraeli.” (Anamathonga 10:6, 7) Nigawebedha amilugu osemiwa obe mulugu mwina, banigamuthiya Mulugu webaribari, kaninarumeeliwe na Yehova.

• “Nlogo nthi ninddithithimiha [Mulugu] na milomo, mbwenye mirima dhawa, dhili wolapela vaddiddi wa miyo. Andidela oddebedhela yovi, sabwani awene ansunziha masunziho ali malamulo a athu.” (Markos 7:6, 7) Akala athu anloga wila animwebedha Mulugu anosunziha dhubuwelo dhawa, athiyaga osunziha esile dhinloga Bibilia, webedha wawa kwa yovi. Webedha oku kunrumeeliwa na Mulugu.

• “Mulugu Muya, nanda abale animwebedha anofanyeela omwebedha na muya vina ebaribari.” (Joau 4:24) Webedha wehu onofanyeela wiwanana na ebaribari ya Nzu na Mulugu.

3. Dila modha yozinddiyelana relijiau yebaribari na ejile ehili yebaribari jivi?

³ Niwodhe dhavi oziwa akala relijiau enomuhagalaliha obe kinimuhagalaliha Mulugu? Yezu ohiloga dhahi: “Muri wotene waderetu onobaala musapo waderetu, mbwenye muri wotene wovudda ombaala musapo wabure . . . Txibarene, nona, modhela misapo dhawa munela wazinddiyela athu aba.” Na mazu mena, akala relijiau ja Mulugu, eji enabaale oderetu; mbwenye, akala ja Satana, eji enabaale obure.—Mateus 7:15-20.

4. Mukalelo gani onlagiha anamebedha a Yehova?

⁴ Relijiau yebaribari enabaala athu ankwelana mukalelani vina anakwela athu ena. Eji eli dhaene sabwani Yehova ddi mulugu wokwela. Yezu ohiloga dhahi: “Modhela ejene athu otene anela oziwa wila nyuwo muli anamasunza aga, mugakwelanaga mukalelinyu.” Ngani relijiau dhinosoriha nigano nthi na webedha webaribari?—Joau 13:35; Lukas 10:27; 1 Joau 4:8.

5. Enciclopédia dhahi onloga dhavi mpinddu wogulihiwa adhari mu Afrika?

⁵ Koona mpinddu wogulihiwa adhari mu Afrika. The New Encyclopædia Britannica enloga dhahi: “Othamagela athu 18.000.000 a mu Afrika ahiperhekeliwa aliba mpinddu Amwenyi ninga adhari modhela dila ya Saara vamodha na Oceano Índico mwari mwa vyaka 650 na 1905. Mpaddi wanawili wa vyaka zana dha 15, Azugu ahiroma mpinddu obu nikome na nyaza ya omaddowelo wa nzuwa wa Afrika, nanda mpaka yaka ya 1867 wañgananiha athu a mu Afrika 7.000.000 na 10.000.000 aahimala operhengeziwa na paporo ninga adhari Wilaboni Eswa.”

6. Relijiau yavolowile dhavi mumpindduni wogulihiwa adhari?

 ⁶ Yimelelo gani yana relijiau mudhidhi obu wa mbigiddi mu Afrika, venevo vaburutxiwa alobwana, ayana na aima mmatakulu mwawa vina mwamudhawa, bamagiwe na pingwi, bagalebiwa na mujila woviha, bagaguliwa vina bagagulihiwa ninga ñgombe? Namaleba Bethwell Ogot ohileba dhahi mu jornale Daily Nation na o Nairóbi, Kênia: “Okristu vamodha na Emwenyi enothiddeela yorumeela ya wiwananihiwa wa nlogo na athu, mbwenye esi dhobili dhithanddile malogo aathiddeli adhari nanda ali odhala nsakulano na ziza. . . . Ninofanyeela orumeela muladdu ona Amwenyi na Akristu, Omaddowelo wa Nzuwa na Oriente Médio, vina ohona wawa wa mweddelo, okwene watoteli athu a mu Afrika mazana a vyaka dha goi yohengeseya.”

7. Asogorheli a relijiau ankosaga mabasa gani mukoddoni?

⁷ Relijiau ehili yebaribari enolagihaga misapo dhaye dhovudda mmakaleloni mena. Motagiha, masiki Bibilia vanrumiye wila “omukwele muthu mukwawo,” asogorheli a relijiau mwilaboni motene anokamihaga nohagalala vina anowaralihedhaga oraba koddo.—Mateus 22:39.

8. (a) Asogorheli a relijiau alibihedhi dhavi opiwa wa athu mmagudulanoni mu Afrika? (b) Mukumbuzi dhahi ologile eni mwaha wa asogorheli a relijiau mudhidhi wa koddo o Nigéria?

⁸ Ehiziweya vaddiddi wila yaka ya 1994 amameri na anamakutha ena ahikamihedha waapa athu o Ruanda. Relijiau yahikamihedha vina vaddiddi mmagudulanoni mena a mu Afrika. Motagiha, vari va koddo yokuthula nikami o Nigéria, relijiau dha mpaddi dhobili dhahalibihedha athu awa oraba koddo. Venevo vagoneela koddoya, mukumbuzi dhahi ohiloga wila asogorheli a kapela “aahinyanyala mabasa avahiwani na Mulugu wila akose.” Ohiloga vina dhahi: “Iyo ninloga wila nili arumiwi  a Mulugu nihikala arumiwi a Satana.”

9. Bibilia onloga eni mwaha wa arumiwi a Satana?

⁹ Bibilia onloga elobo yakakene: “Satana onovisaddulaga bagakala mungelo wa txeza. Nona, akala arumiwi aye anovisaddulaga bagakala arumiwi a oligana eji kayo elobo entikiniha.” (2 Korinto 11:14, 15) Dhaene ninga athu enjene abure vanshagani okala aderetu, Satana onowanyengetha athu modhela arumiwi a relijiau abene ankala ninga aligani, oku mabasa awa bali abure nanda misapo dhawa badhili dhovudda.

10. Asogorheli a relijiau animukooddaga dhavi Mulugu?

¹⁰ Mwilaboni motene, asogorheli a relijiau anolaleyaga okwela, murenddele na oderetu, mbwenye awene anlagihaga niwogo, ankoselaga guru koddo na dhilobo dhovuta. Bibilia onowaloga deretu awene. Onloga dhahi: “Anologa vamentoni vanamwinji wila anomuziwa Mulugu, mbwenye anomukoodda modhela esile dhinkosani.”—Tito 1:16.

11. Bibilia onloga dhavi mwaha wa relijiau ehili yebaribari?

¹¹ Modhela wengesa nivuru na Bibilia na Ovuhulela ninowodha ononelamo ejile enubuwela Yehova mwaha wa relijiau ehili yebaribari. Mwenemwale, relijiau ehili yebaribari enologiwa ninga muyana wa ezinddiyelo, “Babilonia, Munddimuwa.” (Ovuhulela 17:5) Koona mukalelo onimuloga Mulugu:

• “Jeberuwa munddimuwa . . . oddwene oraruwile na amwene a elabo ya vati.” (Ovuhulela 17:1, 2) Othiya omuroromela Mulugu, relijiau ehili yebaribari evivolotxile mpolitikani, dila dhinjidhene bigaapanga malamulelo ejile enfanyeelani okosa.

• “Mwa iyene muhifanyiwa nikami na anamavuhula, vina nikami na akoddeli, vamodha na athu otene apiwe velaboni ya vati.” (Ovuhulela 18:24) Relijiau ehili yebaribari enowathamagihaga vina enowapaga adhari a nroromelo a Mulugu nanda jijene ena muladdu wa athu matxikwi na matxikwi akwile mukoddoni.

• “Iyene ohivithithimiha nanda okalilewo na onyabi wotuwa manyazo.” (Ovuhulela 18:7) Relijiau ehili yebaribari ehikaana dhorela dhinji vaddiddi, esene dhinlabihedha asogorheliya wila akalegewo na onyabi.

• “Malogo otene ahipupurutxiwa na merelo [aye] a olabela muya.” (Ovuhulela 18:23) Modhela nsunziho nabure ninloga wila muzimu kunkwa, relijiau ehili yebaribari ehifugula dila ya makalelo otene a olabela muya vamodha na okwiri, vina ohiita ekalelo ya woviwaga abale akwile vina ohilibiha webedhiwa wa azamani.

12. Nlago gani ninvaha Bibilia mwaha wa relijiau ehili yebaribari?

¹² Na nlago novadda vaddiddi wila athu abudduwemo mu relijiau ehili yebaribari, Bibilila onloga dhahi: “Kabudduwanimo mwa iyene, nyuwo nlogo naaga, akala kamunfuna othega vamodha na iyene vina akala kamunfuna waakela mpaddi wa milili dhaye.”—Ovuhulela 18:4, 5.

13. Txini enaapadduwele relijiau ehili yebaribari vamodha na abale anlabihedha?

¹³ Musogorho mukukuvi, Babilonia, Munddimuwa, omwene wa elabo yotene wa relijiau ya othambi, onela otolotxiwa kakamwe. Bibilia onloga dhahi: “Milili dhaye dhinadhe siku nimodha bahi, okwa na olila, vina dala, nanda onela oddumeyiwa kakamwe na motho, sabwani Yehova Mulugu, odduwene onimuthonga, ddooliba.” (Ovuhulela 18:8) Wila nirabele waakela mpaddi wa milili dhaye, ninofanyeela ogwadda wandana wotene na relijiau ehili yebaribari nanda nihikaane mpaddi wene wa merelo aye, ninga okosaga mathanga na dhorumeela dhinimusilidha Mulugu. Eji elobo enfanyeela okosiwa na namaaguve. Egumi yehu eli mowopiya!—2 Korinto 6:14-18.