Epaddi 1
Relijiau Dhotene Dhinosunziha Ebaribari?
1. Relijiau dhina dhinlabihedhiwa mu Afrika sivi?
OTHAMAGELA athu otene mu Afrika anorumeela wila jofuneya omwebedha Mulugu. Mbwenye kamuli wiwanana mwaha wa mukaleloya wa omwebedha. Ahikalawo abale ansuwaali mmusikithi, ena andowa veebuwani ya yeddelo yawa nanda enagu andowa okapela. Nona wubuwela wila mu Afrika muli relijiau tharu bahi kayo ebaribari. Mwari mwa Amwenyi, muhikala malamulo na dhorumeela dhothiyana thiyana. Relijiau ya yeddelo enothiyana vaddiddi mburo na mburo. Mwari mwa kapela dha abale anloga wila Akristu, muhikala vina ohiwanana onddimuwa vaddiddi. Kapela dhinddimuwadha dhigaalivi, ohikala matxikwi na matxikwi a kapela dhili woka mu Afrika wotene.
Relijiau Enlabihedhihu Enofanyeela Odhela Mwibaribarini
2. (a) Dila dhinjidhene txini enimukosiha muthu muthuvi okala wa relijiau relijiauvi? (b) Txini enkoodda olagiha wila relijiau yehu enomuhagalaliha Mulugu?
2 Athu aneebedhelani na mukalelo mukalelovi? Athu enjiya anfara relijiau ya ababi awa. Vina, mapadduwo awale vaddiddi anopakela relijiau enlabihedhani ovanene. Nivuru The Africans—A Triple Heritage (Akafiri—Yohalana Yatharumo) ninloga dhahi: “Emwenyi emwadheyile omadhelo wa nzuwa wa Saara modhela malogo a amwenyi aalamulela wenewale, . . . Okristu omwadheyile omaddowelo wa nzuwa wa Saara na dila yakakene. Akala Emwenyi emwadheyile omadhelo wa nzuwa wa Saara modhela supadda, Okristu omwadheyile omaddowelo wa nzuwa wa Saara modhela futhi.” Masiki na ejene, enjiya mwa iyo anorumeela wila relijiau enlabihedhihu enomuhagalaliha Mulugu. Mbwenye relijiau kinkala yebaribari sabwa yawila ababihu anolabihedha ejene obe sabwani amalabo a guru ahamagelela azamani ehu olabihedha eji.
3-5. Nladdanihedho gani ninnikamiha wona wila kayo relijiau dhotene dhinsunziha ebaribari?
3 Relijiau dhotene dhinologa wila dhinovaha dila yokuluveleya ya omulabana Mulugu, mbwenye esi kadhina dhubuwelo dhakakeene. Dhinosunziha dhilobo dhinjidhene dhothiyana thiyana mwaha wa Mulugu bani vina txini enjedheliye mwa iyo. Kobuwela eji: Niloge wila weyo ohigumela ganyo vakumpania enddimuwa vaddiddi. Siku noroma olaba, weyo oziwa wila musogorheliya ohibudduwavo, na lisensa. Venevo, weyo onowavuza anamalaba araru wila oziwe ejile enfanyeeliwe okosa. Namalaba woroma onloga wila musogorheli onfuna wila weyo oseele. Wanawili onloga wila weyo onofanyeela opintari numba. Wanoraru onuruma wila odhowe waperheke makarta.
4 Vasogorhova, weyo onowavuza anamalaba mwaha wa mukalelo wa musogorheliya. Woroma onloga wila musogorheli ddolapa, wa muzombwe vina wowali vaddiddi. Wanawili onloga wila iyene ddokiva, wa kalaba, vina waderetu. Wanoraru onupanga wila musogorheliya kayo mulobwana—iyene muyana. Mohaganyedha, weyo onononelamo wila anamalaba aba ooraru kanloga ebaribari. Akala weyo onofuna othiddeelavi ganyo eji yawo eswa, txibarene weyo onela otamela omuziwa txibarene musogorheliya bani vina txini enfuniye wila weyo okose.
5 Yakakene enopadduwa na relijiau. Vowila ohikala dhubuwelo dhinjidhene dhothiyana thiyana mwaha wa Mulugu bani vina txini enfuniye wa iyo, ninofanyeela oziwa deretu wila mukalelo wehu wa omwebedha wiwanane na ebaribari. Kito niwodhe dhavi osunza ebaribari mwaha wa Mulugu?
