1, 2. Yehova oniwamo dhavi akala iyo nili attu ororomeleya?

MWANAMULOBWANA dhahi eyelaga oskola, ohiddodda buddu na kobiri namottile. Elobo gani egakosiliye? Iyene kofuna agahikoya wi dhikale dhaye. Mbwenye iyene ohinvaha mwinya. Maye mwiweliye ohiziveliwa vaddiddi.

² Ababi enjene anoziveliwa sabwa ya ororomeleya wa aniwa. Baba wehu wa wirimu Yehova, “Mulugu wororomeleya,” iyene onoziveliwa vaddiddi akala iyo ninovilibihedha okala attu ororomeleya. (Masalmo 31:6) Noona ninfuna nimwagalalihe Yehova nitamelaga ‘wedda pama mwa dhetene.’ (Ahebreu 13:18) Nihiziwa wi weddana ororomeleya enorutxa vaddiddi. Ndoweni nisekeserhe mareliho a okala muttu wororomeleya.

3-5. (a) Enwodheya dhavi iyo ovinyengetta nanya? (b) Dhilobo bili dhinanikamihedhe okala attu ororomeleya sivi?

³ Wi nikale attu ororomeleya enofuneya okala wororomeleya na iyo nanya. Mbwenye eji elobo yorutxa. Nsaka na Akristu oroma, abali a mulogo wa Laodiseya anivinyengetta anyene. Awene anivinyengetta obuwelaga wi animwagalaliha Mulugu.  (Ovuhulela 3:17) Iyo vina nigahikale txenjewa ninele ovinyengetta.

⁴ Murumiwi Tiago ohileba wi: “Muthu onubuwela wi ddinoweddana magano a Mulugu, ahiziwaga omaga nlumi naye, onovinyengetta mwinya: Omulaba waye Mulugu kunpur’elo.” (Tiago 1:26) Attu ena anubuwela wi okala muttu wowali vina ologa ottambi kahiyo makani. Ddigavilibihedha okosa dhilobo dhaderetu Mulugu kandditanala. Akala iyo ninoroma wubuwela dhawene ninovinyengetta nanya. Elobo gani ananikamihedhe?

⁵ Nigavyang’ana musupeyoni ninowodha wona ejile eli otakulu wa maningo ehu. Nigamwengesa Bibilia ninowodha oziwa ejile eli mwari mwa maningo ehu. Bibilia ononikamihedha ozinddiyela mikalelo dhehu dhaderetu vina dhabure. Ononikamihedha vina oziwa mukalelo wawogolela mubuwelo, merelo na malogelo ehu. (Kengesa Tiago 1:23-25.) Nigavyonaga ninga attu owakwana, kaninawodhe ovyogolela. Enofuneya wi Bibilia anitonyihedhe ejile eli iyo. (Enthothobelana 3:40; Ajewu 1:5) Malobelo vina anonikamihedha ozinddiyela ebaribari yehu. Nimukumbirhege Yehova wi anikamihedhe oziwa apale vanfuneya wi nivyogolele. (Masalmo 139:23, 24) Bibilia onloga wi “Nabuya onowugiwa mara n’athu ahinna magano, oku andanaga n’abale anvirihamo.”—Gano 3:32.

6. Enfuneyela eni wi atelani aroromelegena muttu na mukwaye?

⁶ Okala muttu wororomeleya jamakamaka vamuralani. Akala mamuni na mwadhiye anokwelana muttu  na mukwaye awene anelege ororomelana. Otowa ororomeleya vamuralani onopadduwa na mikalelo dhottiyana. Motagiha, dila dhina muteli obe muteliwi txino onoroma wawona attu bali yovi, omukwela obe omugayela muttu mwina ohili mwadhiye obe mamune. Masalmo 26:4 onloga: “Kaddinedda na athu anawebedha amulugu ebewene, kaddinandana na abale anna mirima mili.” Nigavitaga ejile elihu, obe nigattiya okala attu ororomeleya na merelo obe mubuwelo wehu vamateloni, ejo onele ononga matelo ehu.

7, 8. Amambali anamulabihedhe dhavi Bibilia wi akamihedhena aniwa akale attu ororomeleya?

⁷ Aima vina anofwanyela osunza okala ororomeleya.  Amambali awa anofuniwana omulabihedha Bibilia wi asunzihe aniwa. Mbibiliani mukala vina dhotagiha dh’attu ahana nroromelo: Aká, wali mbava; Jeazi wahidhivala wi avahiwe kobiri; Juda wali mbava, wanniya kobiri dhakoyiye vina wahimuguliha Yezu na kobiri dha parata 30.—Josuwé 6:17-19; 7:11-25; 2 Amwene 5:14-16, 20-27; Mateu 26:14, 15; Joau 12:6.

⁸ Bibilia vina ohikaana dhotagiha dha attu enjene ali ororomeleya: Jakobi, wahawaddela anaye wi aperheke kobiri, Jefté na mwanaye ahakwaniha nipikirhelo nawa na omulabela Mulugu, Yezu wahikalavi wororomeleya masiki na dhoweha dhinjene. (Wita 43:12; Anamathonga 11:30-40; Joau 18:3-11) Dhotagiha esi dhikaana ewodhelo ya omukamihedha mwanawo oziwa ttima yokala muttu wororomeleya.

9. Yotagiha ya amambali enakamihedhe dhavi ororomeleya wa anawa?

⁹ Roma 2:21 ohikana miselu dhaderetu dha amambali, dhinloga wi: ‘Weyo wasunziha ena, kunwodha ovisunziha wamwinya? Weyo onlaleya wi kuwiye, oniyelani?’ Aima anowodha ozinddiyela akala babi onologa wi kakosa dhahi oku iyene akooddaga okosa. Akala amambali anologa na aniwa wi muroromeleyege oku awene akoodda ororomeleya, enele warutxa aima wiwelela sabwani amambali awa kanvirihamo dhinlogani. Aima agazinddiyela wi amambali awa anologa ottambi, awene vina anele osunza ottambi. (Kengesa Luka 16:10.) Akala aima anowoona wi amambali awa attu ororomeleya awene anele okala  attu ororomeleya agonuwa vina akaana aima.—Gano 22:6; Éfeso 6:4.

10. Ninfwanyelela eni okala txenjewa na dhologa dhehu dha siku-siku?

¹⁰ Enofuneya wi nikale attu ororomeleya mmulogoni. Makani a siku-siku anodha osadduwa bakala waba obe ottambi. Akala ninovuwiha miselu dhilogiwe na attu ena nihiziwaga niparana, ninowaza ottambi. Enofuneya ‘wang’anela nlumi’ nehu. (Gano 10:19) Okala attu ororomeleya kintapulela wi ninofwanyela ologa dhetedhene dhinubuwelihu, dhiziwilihu obe dhiwalehu. Masiki ejile enfuna iyo ologa ekale ebaribari, enofuneya ovivuza: Ejiya enfuna miyo ologa jokweleya? Enoddipatta wi ddiloge? Enofwanyela ologiwa? (1 Tesalónika 4:11) Attu ena kaleleyile, ‘anloga wi esidha dhinloga miyo s’ebaribari’ alabeli a Yehova, anofuniwana ologaga mazu ozivela vina aderetu.—Kengesa Kolosi 4:6.

11, 12. (a) Muttegi agavuba ebaribari ya muladdu waye onattabwihe dhavi makani aye? (b) Ogazinddiyela wi mukwawo okosa yottega enddimuwa onatanalele elobo gani? (c) Mpaddi mwina wororomeleya wa nikuru na Yehova buvi?

¹¹ Yehova ohavaha anddimuwa a mulogo muttorho wa okamihedha mulogo. Enele okala elobo yovevuwa wakela nikamihedho nawa nigakala attu ororomeleya. Sabwaya? Weyo kokala wamuredda nanda budhowa osipitale ogahinvitela omwaddela dotoro ejile enupa? Kokala dhawene, iyene agawodhile dhavi oukamihedha? Moligana na ejene, nigakosa yottega enddimuwa, kanivite. Enofwanyela waveda  anddimuwa a mmulogoni vina niloge ebaribari. (Masalmo 12:3; Merelo 5:1-11) Kito ogazinddiyela wi mukwawo ohikosa yottega enddimuwa? (Onamakutha 5:1) Txino weyo ogahiloga: ‘Oddu ddimukwaga webaribari,’ kaddinamuloge obe ogahubuwela wi anddimuwa a mulogo anele oziwa woka vina anele omukamihedha wiyelela mandano aye na Yehova.—Ahebreu 13:17; Tiago 5:14, 15.

¹² Enofuneya okala attu ororomeleya nigalebaga miselu dha mabasa a olaleya otaganyiha na majangarha mena. Ottiya ejo enofuneya okala wororomeleya nigattikittaga petisau ya opionero.—Kengesa Gano 6:16-19.

13. Ninakale dhavi attu ororomeleya nigakosa marhondda na Mukristu mukwehu?

¹³ Ninga Akristu kaninfuna otaganyiha mpinddu na webedha. Motagiha, iyo kaninguliha marhondda mmulogoni obe mmabasani a olaleya. Nigakosaga marhondda na abalihu, kanajele. Akala abali anonilaba, enofuneya waliva kobiri dhawa mowiwanana na mabasaya vina masiku alaganile iyo. Enofuneya vina olebela mabasa awa vina wavaha mudhidhi wovuma. (1 Timóteo 5:18; Tiago 5:1-4) Akala muzugu wehu mbali, kanijedhele weddihiwa na mukalelo wavawoka. (Éfesio 6:5-8) Enofuneya olabaga deretu vina wakwaniha nipikirelo na nlivo ninakela iyo.—2 Tesalónika 3:10.

14. Elobo gani enfwanyela okosa Mukristu ahinatti oroma marhondda na mbali mwina?

¹⁴ Kito akala marhonddaya ninkosa vamodha na abalihu? Dila dhina txino efuneyaga osokela elobo  yaderetwene obe oboleya vego wi muromena mpiddu wa attu eli. Egakala dhawene, ahikalawo magano a Bibilia anloga wi enofuneya olebela vego. Nsaka nagulile namavuhulela Jeremiya nddebe, wahakumbirha anamoona wi attikitte majangarha meeli a ogulana nanda bakwehiya vego. (Jeremiya 32:9-12; koona vina Wita 23:16-20.) Attu ena anubuwela wi okosa nipagano na ottikitta vego otowa nikuluvelo n’abali. Mbwenye eji enorabela makani manddimuwa agadhile opadduwa musogorho. Enofuneya oziwa wi murenddele wa mmulogoni elobo yamakamaka opitta nigano na marhondda.—1 Korinto 6:1-8; koona epaddi Ononelemo Deretu 30.

15. Yehova oniwamo dhavi mwaha wa otowa murima wororomeleya mmarhonddani?

¹⁵ Enofuneya okala ororomeleya na attu etene masiki abale ahili Anamoona a Yehova. Okala attu ororomeleya elobo yamakamaka vamentoni va Yehova. “Nabuya onosilidhiwa na mpimelo wawiyana, onoziveliwa na mpimo wawakwanela.” (Gano 11:1; 20:10, 23) Masaka a Bibilia, attu enjene anlabihedha balansa mmarhonddani mwawa. Mbwenye attu ena ananyengetta anamagula awa avahaga dhilobo dhing’onovi obe anologosaga muttengo munddimuwa ohiniwanana na marhonddayá. Moligana na nsaka nttile ombava wa marhondda ohikalawovi masaka abano. Mbwenye moonelo wa Yehova kusadduwile, onowawidda abale anajela attu.

16, 17. Elobo gani eneha ororomeleya wehu?

 ¹⁶ Notene ninogumanana makattamiho aneha ororomeleya wehu. Motagiha: Nigalebaga njangarha na otamelana mabasa, majangarha a guverno obe mabigiho a oskola. Mbwenye attu enjene anubuwela wi odhivala kahiye makani, mmakanini mwawa, anottapiriha miseludha akosihaga attu ena woona dhologa dhawa ninga ebaribari oku ehili. Bibilia wahittaga ologa wi ‘masiku omariha attu anere okala namakumbela vawa, anamajiwa murima na kobiri, . . . agarimeliwa ttima yokwela dhilobo dhaderetu.’—2 Timóteo 3:1-5.

¹⁷ Dila dhina enokala ninga attu ahinroromeleya anojavo. (Masalmo 73:1-8) Sabwa yokala attu ororomeleya, Akristu anoyelela kobiri, anopujiwa omabasani dila dhina ottamagihiwa omabasani, masiki dhawene ororomelaya elobo yamakamaka. Sabwaya?

18. Ekalele eni elobo ya ttima oziwiwa ninga muttu wororomeleya?

¹⁸ Oziwiwa ninga muttu wororomeleya elobo ya ttima enddimuwa, ovanene enorutxa wafwanya attu okuluveleya. Enowodheya iyo oziwiwa ninga attu okuluveleya. (Mikeya 7:2) Ebaribari, attu ena anelege wuteya wi weyo ottabwiha oderetu wawo. Mbwenye ena anele oziveliwa vina oukuluvela. Elabo yotene Anamoona a Yehova anoziwiwa ninga attu ororomeleya. Ena anasakula Anamoona a Yehova wi alabege mabasa awa sabwa yokala attu ororomeleya. Oku enagu attamagihiwaga omabasani wawa, Anamoona a Yehova anodhowavi alabaga.

19. Yehova onewemo dhavi sabwa yokala attu ororomeleya na dhilobo dhetene?

 ¹⁹ Ororomeleya na dhilobo dhetene enovaha mubuwelo wotxena vina wottugareya. Nivilibihedhe okala ninga murumiwi Paulo ologile wi: “Vowi ninotamela wedda pama mwa dhetene.” (Ahebreu 13:18) Elobo yamakamaka ja oziwa wi Baba wehu Yehova onotamalela guru enkosa iyo ya okala attu ororomeleya mwa dhilobo dhetene.—Kengesa Masalmo 15:1, 2; Gano 22:1.