1-3. (a) Yehova onivahile nvaho gani? (b) Nigalabihedhe dhavi na mukalelolo wohifwanyela? (c) Ninalabihedhe dhavi nvaho obu?

MAMBALI wa mulobwana onomugulela mwanaye sikaleta eswa, nanda onowagalala sabwa ya omugulela mwanaye. Kito keliwa mwanaya weddiha bure-bure ofiyedha ompidana muttu? Mambaliya agewilemo dhavi?

² “Dhapama dhetene na mivaho dhetene dhawakwana dhinakelihu, dhindha odhulu, dhintita mwa Baba.” (Tiago 1:17) Lizu na ologana mazu, nvaho onivahile Yehova. Modhela lizu ninowodha ologa esile dhinubuwela iyo. Ninowodha ologa dhilobo dhinakamihedha attu ena. Mbwenye dhologa dhehu dhihikaana ewodhelo ya wavoreya attu ena.

³ Yehova onoziwa ewodhelo ya mazu, noona onisunziha olabihedha mofanyelela. Iyene ohiloga wi: “Mwano mwenyu muhibudduwe-wene mazu ovuta; mubudduwege mazu apama anlabela oleleya onfuneya, onapuriha abale aniwa.” (Éfeso 4:29) Ninele  wona mukalelo wa olabihedha deretu mazu nimwagalalihaga Yehova vina attu ena.

4, 5. Nivuru na Gano ninisunziha eni sabwa ya ewodhelo ya mazu?

⁴ Mazu ahikaana ewodhelo, noona enofuneya okalela txenjewa malogelo ehu. Bibilia onloga wi: “Mazu okurumuwa anoligana na muri wofufuma, mazu abure anogwadda murima.” (Gano 15:4) Moligana na muri wofufuma onvaha mundduri wozivela nsaka na nzuwa, mazu aderetu anoziva vina anolibiha. Mbwenye mazu abure anosilidha.— Gano 18:21.

⁵ Gano 12:18, onloga wi: ‘Mazu ohitanaleleya anosuva ninga supadda’ Mazu ovadda anogwadda murima vina anononga mandano. Txino weyo wahiromaga onyaguleya na dhologa dha muttu mwina. Nivuru nakakene nihiloga vina wi: ‘Nlumi na muziwi murobwe.’ Mazu aderetu anovoliha makwadda a osuveya wa murima. Anodhana murenddele vina wiwanana. (Kengesa Gano 16:24.) Oziwa wi mazu ahikana ewodhelo, enonikamihedha okalela txenjewa na dhologa dhehu.

6. Wang’anela dhologa dhehu ekalele eni elobo yorutxa?

⁶ Elobo yina enfwanyelela iyo okalela txenjewa dhologa dhehu jawi iyo notene nili attegi. Bibilia onloga wi: ‘Munlelo wa murima bwa okosa dhilobo dhabure,’ mazu ehu anowoniha esile dhinubuwela iyo. (Wita 8:21; Luka 6:45) Noona wang’anela dhologa dhehu elobo yorutxa. (Kengesa Tiago 3:2-4.)  Mbwenye enofuneya ovilibihedha ologa mazu aderetu.

7, 8. Mazu ehu aniwanana dhavi na mandano ehu na Yehova?

⁷ Sabwa yawi dhologa dhehu dhinopatta mebedhelo ehu na Yehova, enofuneya vina okala pasope na dhologa dhehu. Nivuru na Tiago 1:26 ninloga wi: ‘Muttu onubuwela wi onoziwa weddana magano a Mulugu ahiziwaga omaga nlumi naye, onovinyengetta mwinya: Omulabela waye Mulugu kampurana elo.’ Mazu aba ‘kampurana elo’ antapulela wi “kunna nipara.” (1 Korinto 15:17) Nigahiziwe wang’anela dhologa dhehu ninele oyelela mandano ehu na Yehova.—Tiago 3:8-10.

⁸ Ebaribari wi enofuneya okalela txenjewa na dhologa dhehu vina malogeloya. Wi Yehova anikamihedhe olabihedha deretu nvaho wa lizu,  ovano ninfuna niziwe mazu ahinfwanyelela iyo ologa.

9, 10. (a) Mazu gani anziveliwetxa ologa attu a nsaka na ovanene? (b) Ninkoddela eni ologa mazu onyakuwa?

⁹ Attu enjene a nsaka nttino anoziveliwa olabihedha malogelo onyakuwa. Attu ena anubuwela wi anavuruwaniwe agaloga mazu onyakuwa. Aliba epali [comédianos] anolabihedha mazu abure atamelaga wateyiha attu. Murumiwi Paulo ohiloga wi: ‘Ddabuno tadhaní dhetedhene: Owali, osilidhiwa, otakala murima, oruwana, ovadda mwano.’ Iyene ohiloga vina wi ‘mavego o’ruwana kanfwanyela okosiwa na Akristu’.—Éfeso 5:3, 4.

¹⁰ Ologa mazu onyakuwa elobo enimukubanyiha Yehova vina alabeli aye. Yonyakuwa entapulela elobo yopigidheya. Nivuru na Galásia 5:19-21 ninloga wi ‘oruwana’ na wira dha manyazo dhilobo ‘dhinttopa maningo.’ Dhotega dhinjene dhinokosa epaddi ya dhilobo dhonyakuwa. Akala muttu onoziveliwa ologa mazu onyakuwa ninga oruwana, kambo, ahifunaga ottiya, onottamagihiwa mmulogoni.—2 Korinto 12:21; Éfeso 4:19; koona epaddi Ononelemo Deretu 23.

11, 12. (a) Makani anwodha dhavi osadduwa bakala ottambi? (b) Omagedha ekalele eni elobo yabure?

¹¹ Kaninfwanyela wawaba attu ena. Elobo yaderetu ozuzumela oziwa vina ologa dhinapadduwela amudhihu vina akwehu. Vyaka zana dhoroma, Akristu o’roma antamela oziwa dhapadduwela abali  ena wi awodhe wakamihedha. (Éfeso 6:21, 22; Kolosi 4:8, 9) Mbwenye makani a waloga attu ena kanrutxa osadduwela ologa dha waba. Nigaddiddela ologa makani a waba, ottambi obe ologa dhilobo dhoviteya dha muttu mwina. Nigahikale txenjewa makani ninga abane anonittukulela okala anamamagedha. Afarizi ahikosa ejuwene modhela ommagedha Yezu dhilobo dhahakosiliye. (Mateu 9:32-34; 12:22-24) Omagedha ottambi wabure onwodha opigidha nzina na muttu mwina, onotota owanawana vina okubanyiha, onopatula mandano a attu ofiyedhana.—Gano 26:20.

¹² Yehova onfuna wi nilabihedhege mazu ehu wi nakamihedhena attu ottiya wamwalaniha. Yehova onowawidda abale ‘antota owanawana wa abali.’ (Gano 6:16-19) Ottambi woroma ologile ddi Satana Ddiabo, odduwene omudhivalele Mulugu. (Ovuhulela 12:9, 10) Ovanene attu anodhivalelena muttu na mukwaye. Mbwenye ejoya kinfwanyela opadduwa na Akristu ebaribari. (Galásia 5:19-21) Noona nihinatti ologa, enofuneya oroma otanalela dhinfuna iyo ologa. Enofuneya vina oroma okosa mavuzo aba: ‘Ebaribari? Miselu dhaderetu? Dhinele okamihedha? Ddinele okaana manyazo mwinya agamuziwa ologile? Kokala muttu mwina addilogaga miselu ninga esi ddigewilemo dhavi?’—Kengesa 1 Tesalónika 4:11.

13, 14. (a) Elobo gani empadduwa na muttu onziveliwa ologa mazu osilidha? (b) Oruwana txini? Akristu ankoddela eni oruwana?

¹³ Dila dhina iyo ninologa dhilobo nigamala  banitxinuwa. Kaninfuna walogelaga attu ena mazu annyimula. Mazu osilidha kanfwanyela okosa epaddi yehu. Murumiwi Paulo ohiloga wi: “Murabelihe vari venyu mazu owawa, osilidha, owali, onyanyuwa, olava, vina dhotakala dhotene.” (Éfeso 4:31) Mazu osilidha anowakumula attu, avyonaga ninga kana ttima. Nigalogaga na aima nag’anege dhologa dhehu wowi awene kanrutxa opattiwa na mazu anlogiwa.—Kolosi 3:21.

¹⁴ Bibilia onloga wi mukalelo mwina wa ologa mazu osilidha—oruwana. Oruwana entapulela odidela ologa na muttu miselu dhohifwanyela wi muttuya asilidhiwe. Elobo yokubanyiha muttu agalogaga mazu oruwana na mwadhiye, na mamuni obe na mwanaye! Ebaribari wi muttu ohinfuna ottiya oruwana, onofwanyela oburutxiwa mmulogoni. (1 Korinto 5:11-13; 6:9, 10) Ninga mumalele iyo woona, ologa mazu onyakuwa, ahili a ebaribari, anasilidha attu ena, enogwadda mandano ehu na Yehova vina na attu ena.

15. Mazu gani anwodha walibiha attu ena?

¹⁵ Ninalabihedhe dhavi mazu na mukalelo onimuzivela Mulugu? Ebaribari wi Bibilia kanloga dhilobo dhetene dhinfwanyela iyo ologa obe ohiloga. Mbwenye ononikokomeza wi ‘nilogege mazu anlibiha.’ (Éfeso 4:29) Mazu anlibiha babale ali ebaribari, ozivela vina aderetu. Yehova onfuna wi nilogege mazu analibiha attu ena. Elobo yorutxa ologa  mazu olibiha mottiyana na ologa mazu onyimula. (Tito 2:8) Ovano ndoweni nisunze malogelo a olibiha.

16, 17. (a) Otamalela ekalele eni elobo yaderetu? (b) Bani ofanyelela iyo omutamaalela?

¹⁶ Yehova na mwanaye Yezu anoziveliwa otamaalela. Iyo ninfuna n’atagihe. (Mateu 3:17; 25:19-23; Joau 1:47) Ologa mazu a otamalela ohikaana ewodhelo ya olibiha, wi ejo epadduwe enofuneya wooniha wi mazuya andela mmirimani vina woniha wi ninomuzuzumela muttuya. Nivuru na Gano 15:23 ninloga wi: “Oziva gani wa nzu vinvahana na mudhidhiyá!” Ninoziveliwa akala muttu mwina ononitamalela sabwa ya elobo ekosile iyo.—Kengesa Mateu 7:12; koona epaddi Ononelemo Deretu 27.

¹⁷ Akala weyo ohikaana elemelelo ya wona noderetu dhilobo dhinkosa attu ena, kunarutxiwege ologa mazu a otamaalela. Bani onfwanyela otamaaleliwa? Jofuneya watamalela abali otene. Mutagiha: Mbali onsasanyedha deretu diskursu yaye, muttu onivilibihedha ovaha yowakula, muzombwe oneddana nroromelo noliba oskola, mbali wowunuwelavo onivilibihedha odhowa mmalaleyoni. Otamaalela elobo yofuneya, vamuralani enofuneya mamuni omutamaalela mwadhiye mwa esile dhinkosiye vatakulu. (Gano 31:10, 28) Moligana na miri dhinveda oheleliwa manje, attu vina anofuna ovahiwa ttima. Aima vina anofuna otamaaleliwa, enofuneya woona esile dhinkosani dhili dhaderetu  wi watamaalele. Akala onokosa dhawene onele wenjedhedha nikuluvelo nawa vina guru ya odhowagavi akosaga dhilobo dhaderetu.

18, 19. (a) Ninfwanyelela eni ovilibihedha wi napangarhaze attu ena? (b) Ninakose dhavi nigamulibihaga muttu mwina?

¹⁸ Akala ninowalibiha vina wapangarhaza attu ena kuloga ninimutagiha Yehova. Iyene onowazuzumela attu ‘ovyeviha’ vina abale ‘akukumuwile.’ (Izaiya 57:15) Yehova onfuna wi ‘nidhowegevi banigatamaalela vina walibiha akukumuwile.’ (1 Tesalónika 5:11, 14) Nigavilibihedha okosa ejuwene Yehova onowona vina onowagalala.

 ¹⁹ Txino mmulogoni mwawo muhikala muttu okukumuwile ontamela nipangarhazo. Elobo gani enaloge weyo wi omukamihedhe? Ebaribari wi weyo kunawodhe ogomiha makattamiho aye, mbwenye enowodheya woniha wi weyo onomuzuzumela. Motagiha, enofuneya okala mudhidhene na iyeneya, egafuneya wengesa vamodha nlebo na Bibilia ninamukamihedhe obe olobela. (Masalmo 34:18; Mateu 10:29-31) Ogalogaga na muttuya kooniha wi dhologa dhawo dhindela mmirimani.—Kengesa Gano 12:25.

20, 21. Mukalelo wofwanyela wa ovaha malago buvi?

²⁰ Malago vina anokosa epaddi ya olibiha. Iyo nili  attu ottega, noona ninotamela olibihiwa. Nivuru na Gano 19:20 ninloga wi: “Akelá olagiwa, rumelá osumululiwa, onodha okala muzewitxi.” Kahiyo anddimuwa a mulogo bahi anfwanyela ovaha malago. Amambali anofwanyela walaga anawa. (Éfeso 6:4) Arogora a malago anofwanyela wavaha malago arogora ena. (Tito 2:3-5) Iyo ninowakwela abali, nigavahaga malago ninfuna nitanaalele wi ninanyimule. Elobo gani ananikamihedhe?

²¹ Wahiromaga ovahiwa malago akoddele weyo orutxiwana wiwelelawa? Akoddele eni orutxa wiwelelawa? Txino weyo wahizinddiyela wi muttuya onowuzuzumela, obe iyene walogile na mukalelo wokwela vina woderetu. (Kolosi 4:6) Joziweya wi nipara na malago ddi Bibilia. (2 Timóteo 3:16) Eji elobo yamakamaka masiki akala muttu onvaha malagoya kanengesa nlebo na Bibilia na weyo, malago ehu etene andela mwari mwa Nzu na Mulugu. Kaninfwanyela wamagelela attu otene okaana mubuwelo wehu, vina kinfuneya opupurutxa malebo a Bibilia wi akamihedhe monelo wehu. Ogobuwela mukalelo ogaziveliwe weyo olagaiwa onele oukamihedha ogafunaga walaga attu ena.

22. Onalabihedhe dhavi nvaho wa ologa?

²² Nzu na ologana nvaho wa Mulugu. Okwela ona iyo na iyene onele onikamihedha olabihedha deretu nvaho obu. Mazu ahikana ewodhelo ya osuva ninga supadda vina ovoliha ninga murobwe. Oziwa ejene enele onikamihedha olabihedha mazu ehu wi nakamihedhena attu ena.